شاركي في النقاش

سجلي الدخول لإضافة تعليق.

التعليقات

3,000
  1. @mrt_raglha

    السلام عليكم وشن اخباركم
    اريام هدي طريقه العصبان
    والله عابيه بنزلها قبل حتى ماتطلبيهاوكنت ناويه نعملها مفاجأه
    اهي جت حاجه وحويجه

    دواره خروف او مصارين هدي أهم حاجه في العصبان
    تنظف وتقلب وتنقع في الخل او عصير الليمون لمده ساعه تقريبا
    ثم تنظف بالماء وتقلب مره ثانيه (يعني ترجع لطبيعتها)
    وهذه صورتها


    نص كيلو لحم مقطع مكعبات ونص كيلو كبده خروف مقطعه مكعبات ايضا


    3ربطات معدنوس
    3كسبر
    3بصل اخضر او بصل عادي من 3الى5متوسطه
    ربطه نعناع ربطه شومر(شبت)
    3حبات طماطم
    فلفل اخضرحار (حسب الرغبه)
    من 3الى 4 كوب رز مصري(حبه صغيره)
    نص كوب زيت
    3ملاعق كبيره طماطم معجون
    ملعقه من كل ملح وفلفل وحرارات ونعناع ناشف
    وربع ملعقه بزار (حسب الرغبه)
    وهذه صورتها محشيه


    الطريقه:-افرمي الخضره واغسليها واغسلي الرزوخلط جميع المقادير

    احشي المصارين وماتحشيهمش واجد حتىعلشان ماينفتحوش وتغلقي الاطراف بعود اسنان
    وتكوني محضره ميه علي النار فيها ملعقه طماطم معجون وملعقه بزار وشويه فلفل وملح
    لازم تحطي المصارين المحشيه والماء يغلي يعني ماينفعش عالبارد
    وبعد تقريبا عشر دقائق تخرجيهم من الطنجره وتحطيهم في الكسكاس
    وترجعيهم على النار يبوخوا لمده ساعه الا ربع
    وهذه صورتها لما طابت


    هيا تفضلوا وهذه الصوينيه ليكم والليم والمشروب عليكم







    وتأكلي بالهناء والشفاء
    (((قبل الحشي اذا ماعندكش مصارين يمكن اضافه بطاطا وكوسه وجزر مقطعه مكعبات
    وبازيلا اوحتى بدون بطاطا وكوسه وجزر وبازيلا
    و تبوخيهم لمده ساعه الا ربع وهدي اكله اخرى)))
  2. @mrt_raglha

    كيف حالكم كلكم يابناويت
    ان شاء الله عجبكم العصبان
    اريام نبي طريقه الكبسه عندي صاحب زوجي (راجلي) سعودي لما يجي لدبي
    يدير فيها وزوجي عاجباته خاصه برز( الشعلان)العلمين
    وسامحوني توا مش فاضيه نرجعلكم بعدين
    باااااااااااي
  3. @em_mohamed

    السلام عليكم


    شنو حالكن اليوم يا بنات ؟
    عيونى تشرفت بمعرفتك يا غاليه وأن شاء الله ديما انكونوا على اتصال
    وامانه لما اتجيبكم الطريق شور تورنتو تعالوا زورونا .
    والتاريخ اليوم الثلاثاء 4 محرم, 1428 هجرى
    بارك الله فيك على التذكير
    ان شاء الله نقدروا انصيموا لو ما جاناش عذر يمنعنا ,,,

    سلفيه ان شاء الله انكون اول وحده تزورك من البنات وانذوقك من ماكلتى ايقولوا اتهبل وناشطه وفايحه(وحده تشكر فى روحها )
    غير خلونى اشوى نعرف كيف الطرق هنايا
    لتوا نمشى لنهاية شارعنا وانولى مازلت خايفه انودر الطريق بالسياره وسواقتهم هنايا زى ليبيا يطلعوا فى الاحمر وما يعطوش الطريق (عليك تشويه سمعه اندير فيه ههههه),,,,

    امشيمشه
    حتى انا زيك كساد هنايا بس الفرق ان المدينه ناشطه وفيها هلبه امكانات وين تمشى وتدهورى وزحمه
    غير انا ما زال مانعرف حد
    فيت وحده امريكيه لقيتها فى المسجد وعطتنى تلفونها لكن شكلها مش جوى ومش حننسجم امعاها
    نبى بنت من بلادى ونلقوا على شنو انقصروا الوقت ,,,
    ان شاء الله اتجيك ام زهر وتونسك فى مدينتك ,,,,
    وبأذن الله انديرولكم زياره
    توا عندنا وين انباتوا فى سسكاتون
    بس مدينتكم شكلها ما هناش ع الخريطه خخخخخ(وحده اتناشب)

    امواج
    يادبه بطلى ماكله بيش تلقى ما تلبسى ههههههه
    حتى التفصيل فى كندا غالى
    صحتين يا حنا بس ردى بالك من وزنك على الاقل تحافظى على صحتك الله الحافظ
    وكنك امنقصه الخشوش ان شاء الله المانع خير ,,,

    ليبيا قلبى الحمد لله على السلامه
    وان شاء الله زياره ونياره

    حياه حلوه
    ان شاء الله ربى اينجحك ويفرحك بولد الحلال ,,,

    اريام
    ما شاء الله عصبان ورشده مره وحده
    شكلنا نعطوك الجنسيه وخلاص هههههه
    انا اموت فى العصبان اقصد المصارين وخصوصا لو حاره (شطه زياده) واتكون امحمره اشوى فى الكوشه يم يم


    مرت راجلها ما شاء الله ديما امنوره يعطيك الصحه وسلم ايدياتك
    سفهتينا بالماكله والصور
    عندى اشوى صور فى الكمبيوتر توا انزلهم بأذن الله
  4. @lybya_klby

    em mohamed
    السلام عليكم شنو حالكن اليوم يا بنات ؟ عيونى تشرفت بمعرفتك يا غاليه وأن شاء الله ديما انكونوا على اتصال وامانه لما اتجيبكم الطريق شور تورنتو تعالوا زورونا . والتاريخ اليوم الثلاثاء 4 محرم, 1428 هجرى بارك الله فيك على التذكير ان شاء…
    الله يسلمك ونجكي
    مبروك عليكي العتبه الجديده ان شاء الله عتبت خير

تابعي تجارب أخرى من هذا القسم.