~: : :OoO «-.¸¸,.-~*تجمع أحلى صحبه ,,,بنات ليبيا "التجمع الثانى" *~-.,¸¸.-..OoO: : :~

مشيميشة الحمد لله علي السلامة وان شاء الله انسجمتي في مشيتك ومعقولة ننسوك وانتي اللي جمعتينا في اللمة الحلوة ربي يفتحها عليك ويسر امورك قادر ياكريم .....قرين ستار صح كلامك عندنا 6 شهور ضلام و6 ضي حال يهبل اول ماجينا قريب انهبلت تعرفي مفش ضلام في الصيف بس قريب الساعة 11كيف المغرب الجو ونصلو في العشاء 12 ونص والفجر الساعة 2 يعني مفش ليل وياحنا في الشتاء نتمنو الضي الساعة 9 يطلع الضي والساعة 2 ونص ضلام نين اتصيرلك كأبة وخلي التلج حالة وحدها خليها ساكتة قالو شنو اجبرك علي المر قاله اللي امر منه ربي ييسر امورنا كلنا ويردنا لبلادنا في اقرب وقت

ماشاء الله تبارك الله ...
عيني عليكن باردة ...
يابتي ياخياتي بشوية عليا راني مش ملحقة معاكن خخخخخخخخخخخخ ... فاتني الصبح لقيته معرم العشية !!! ربِ يدوم علينا هالصحبة الطيبة والرفقة الصالحة يارب ...

شام ...
وعليكم السلام ورحمة الله وبركاته ...
كيف حالك يامشرفتنا الغالية وكيفهم الاولاد ان شاالله كلكم طيبين ...
شفتِ ام محمد وحركاتها الخطيرة ... ربِ يعافيها ويحفظها لإولادها وناسها واحبابها يارب ... ومشكورة يالغلا على مرورك العطر وانستينا ياغالية ...

ام محمد ...
وعليكم السلام ورحمة الله وبركاته ...
ماشاء الله الله اكبر لاقوة الا بالله ...
ناشطة عيني ماضرك ... ومنورة الموضوع ...
وياحنا اليوم مشيت لتهاني الصبحية واللهِ تهدريزة سمحة ناقصة غير انتِ ... والجو عندنا اللهم لك الحمد والشكر مع انه اليوم فى شوية ريح لكن الحرارة وصلت 8 وبكرة ياحنا وكان سخر ربِ قالو 12 يعنى بالمايوهاااات خخخخخخخخخخخخخخخخخخ <<< ياساتر ياربِ خخخخخخخخ ...

مشيمشة ياغالية ...
وعليكم السلام ورحمة الله وبركاته ...
ياحنا ماتزعلش انتِ صاحبة الفكرة الاساسية وام محمد قالت هالكلام واستأذناتك شوفي الموضوع الاول الصفحة الاخيرة ...
ياغالية ولا تزعلي الا زعلك وراهو فجعتيني وانتِ تعيطي خخخخخخخخخخخخ ...
ان شاالله جمعتنا المحبة والاخوة ...
وسماح ياغالية واللهِ اني تمنيتلك رحلة سعيدة لكن غريبة نحسابك تبي اطولي !!! باهي عاد قوليلنا شنو جو الرحلة ووين مشيتو <<< وحدة قصقاصة ... خخخخخخخخخخخخخ ...

سلفية ...
كيف حالك ياغالية وشنو اخبار بنيتنا !!! وشنو درتي عند الدكتورة !!! وكيف حالك عمك !!! شنو سمعتو اليوم من اخبار عليه !!!
وان شاالله يارب ياقادر ياكريم اتنوضي طيبة وتشوفي عمك على خير يارب ... قولي امين ياغالية ... ونبي انكلمك اليوم لقيتك كاتبة انك ماشية تراجعي وبعدين لما روحت من زيارتي قلت خلاص موخرة ووقت عشاء بكرة ان شاالله انكلمك ...

عيوني ياغالية ...
وينك اليوم !!! ان شاالله خير ... طمنينا !!!

بهراء ...
ماشاء الله تبارك الله ...
كيف حالك يابهورة وايش الاخبار ان شاالله طيبة ... وبداء الوحم معاك !!! الله يكون فى عونك ... بس تعرفي فرحتلك كارهة الاكل خخخخخخخخخخ كويس رجيم من غير رجيم ...
اسكتِ انا كإني عندي حالة ضعف !!! اكل فى اكل الله لا يوريك اروح احمل ممكن ابطل اكل خخخخخخخخخخخخخخخخ ...

السلام عليكم و رحمة الله و بركاته

مبروك علينا التجمع الجديد , و انشاء الله لمة خير و حب و ود
و احلي ما فيها {حفظ القران الكريم } الله يجعلها لمة مباركة
طبعا اني معاكم في الحفظ و ماشية فيه

و توا خلي نسأل عليكم
كيف حالكم و شن اخباركم , انشاء الله تكونوا بخير و صحة و سلامة

سامحوني ما قريتش ردودكم فبالتالي مش حنقدر نرد عليكم , ما شاء الله وصلتوا للصفحة التاسعة
اني هاليومين ظروفي مش و لا بد و مش لاقية وقت حتى بش نمشط شعري
خشيت بس بش نسلم عليكم

في حفظ الله

هناوة ياغالية ...
كيف حالك اليوم ان شاالله طيبة ...
اللهِ يبارك فيك ويحفظلك عيالك وزوجك من كل شر ويجبر بخاطرك ويسهلك امورك ... قولي امين ياغالية ...
وان شاالله انديرها الكيكة الايام الجاية ...
وانا الطريقة يلى عندي بالفستق ...
2 كوب دقيق ...
1 ملعقة صغيرة بيكنج بودر ...
1 كوب سكر ...
2 بيضات ...
1 صفار بيضة ...
1 ملعقة صغيرة فانيليا ...
1 ملقعة صغيرة قشور برتقال مبشور ...
4/3 كوب فستق مقشر ...
وبيضة لدهن الوجة ...
وتنقسم العجينة نصين وكل نص تبرمي كيف ماتبرم الكعك واذا تعباتك فى البرم بللي ايديك شوية مية وابرمي يكون طولها حوالي 25 سم وعرضها 8 سم وتقصيها اطروف وتدهني الوجهة بالبيضة وطيبيها فى درجة حرارة 300 ... وصحة وعافية ...

حياة ...
تخيلي وانا جاية نبي نرقد تفكرتك ياربِ نسيتتك بكل ... سماح ياغالية ...

غادة ...
كيف حالك ياغالية وماشاء الله تبارك الله ... عيني عليك باردة ...

قود لايف ...
ماشاء الله تبارك الله ... تسهف الكيكة شكلها والسندويتشات... يعطيك الصحة ان شاالله ... يسلم ايدياتك ياغالية ...
خخخخخخخخخخخخ وذكرتيني بحنانتي الله يرحمها ويغفر لها ... ياحنا كانت ماتسعمش كويس وغالي عليها عدالة الشاهي ومحلاه شاهيها يهبل المهم مرة قاعدة اطيب وخوي الصغير شرب طاسته وقاللها سلمك طيابة قالتله شنو كرهابة بيابة خخخخخخخخ ... الله يرحمها ويغفر لها كانت عليك حنانة تهبل وروعة ... وياما مواقف وياحنا مرة اتفرج على فيلم عمر المختار وحطينه سفرة العشاء ونقولولها هيا ياحنية تعالي تعشي تحلف وتقول ناكل والعرب يتقاطعو لا واللهِ ماني واكلة ... وكان تشوف الحروب توا والخبر يلى فى العراق شنو يصير فيها ... الله يرحمها ويغفر لها ويرحم جميع الموتي المسلمين ... اللهم امين يارب العالمين ...