(تجارب المطلقات) دعونا نتشارك بمعاناتنا واراءنا وتطلعاتنا لبناء مستقبل جديد

لين

الله يخليك يارب

فعلا اذا صليت بالليل وقرأت قرآن احس بالراحة

وعارفة بداخلي انها مرحلة وتعدي .. لكن لازم من التفكير

الله يصبرني يارب .. ويرزقك اللي تبينه على كلامك الحلو



أم ثلاث زمردات

تصدقين كل اهلي وقاربي يقولون اللي سويتيه صح .. بس انا فيني غباء

يعني اقول بنفسي هم يقولون كذا عشان كانوا يكرهونه .. هذا بحالة اذا حنيت له

وبلنسبة للدراسة انا سحبت ترمين عشان ارضي سموه .. كان يبي يخليني اكره الدراسه

بس ربي ما رد دعوات امي اللي كانت تموت من القهر اذا سحبت ترم

الله يكتب لنا اللي فيه الخير

تسلمين يارب واللي يخلي لك زمرداتك


ورده ذبلانه

ليه اسمك كذا يكسر الخاطر؟؟ :frown:

ان شاءالله اشوفك احلى وردة ..

وتسلمين حبيبتي وربي كلامكم يرد الروح


بلسم فقط

تدرين انك جبتيها :frown:

انا كل اللي تاعبني حاليا نظرة الناس

وغير هالشي .. انك ببيت اهلك غير وانتي ببيتك

يعني انا رجعت الحين .. وكأني رجعت وعمري 17

ما احس اني ممكن اتخذ قرارات بنفسي

مع اني احاول ابين لهم اني كبرت

اللي شفته بسبع سنوات وربي خلا عقلي اكبر من سني بكثير

لكن الله يعين الين ما ارجع اتأقلم على وضعي

تسلمين قلبي .. والله يعوضنا كلنا خير






.....





المنطــــــــلقات


ياااااااااااااااااه يابنات ما تتخيلون وش كثر أثرت فيني هالكلمة

قعدت اتأملها كثير .. حسيت ان نظرتي كانت تشائمية مره

فعلا الكلام مع ناس عايشين بنفس حالتك يخليك تتقبل نصايحهم

ان شاءالله استمر معكم على طول

والله لا يحرمني منكم

سارينا المنطلقة






.

مسا النووووور حبايبنا


الغاليه ســارينا
وربي أثرت قصتج فيني :(
أقول يا ربي والله اللي يشوف مصايب غيره تهون عليه مصيبته وأن اللي حصل ماهو غير زيادة أجر لنا إن شاء الله وتكفير عن ذنوبنا
ربي إذا أحب عبد ابتلاه سبحان الله عشان يشوف صبره ويكفر عن باقي ذنوبه سبحانك يا رب اللهم لك الحمد:(
ياقلبي والله مالي غير اني ادعيلج الله يفرج لج همج وهم كل مهموم يا رب ويبدل حزنج فرحه تدوم ع شفاتج وشفتنا جميعا
آمين يا ربي جميع

وتصدقين ماانتبهت بالبدايه على كلمة المنطلقااااات :) وربي اعجبتني مرررة هالكلمه بس خبروني مين الحلوة اللي جابتها واخترعتها خخخ
جد حلوة وتصلح لنا فيها روح الأمل والحياة الحلوة والسعد كله

وبجد أحس الزواج على صغر له سلبيات كثيره للأسف
مثل ماقلتي كنتي تموتين فيه لانج كنتي صغيره قلبج تعلق فيه بقوه مثل حالتي ونغطي عيوننا عن مر الحقيقه ونعاند الواقع عشان خاطر هالقلوب الرهيفه الطيبه،، ومهما قلنا أو ساوينا نعتبر صغار ومعاهم الحق

لاتنسين يالغاليه تصلين صلاة الإستخارة وتكثرين الإستغفار والدعاء وقيام الليل وثقي برحمة ربي واعرفي ان الخيرة فيما اختارهاااا الله ونعم بالله :)

،،،،،،،،،،،،،،،،،،
،،،،،،،،،،،،،،،،،

الغاليه ورده متفتحه وزاهيه فواحه ^_*
فديتج والله فرحتيني لاني طلعت النونو بينكم خخخ بس اللي حصل يخلي الوحده غصب اكبر عن عمرها
بس هم أظل الصغيره >>>صدقت الحكايه وفرحانه الأخت!!!
وبالنسبه لكلامك:
""لاكن الحزن اللي يجيني لاني مو مصدقه انني صرت مطلقه...""
بالنسبه لي لما عرفت مر الحقيقه وبعد ماصرت شبه مطلقه وكنت مرتاحه لاني بتطلق
اختي تدق علي تطمن علي اقول لها الحمدلله انا مرتاحه ان هالشي صار الحين مو بعدين بس بس تعذبني هالكلمه حيل(مطلقه)!!!وعاد انفجر ابكي وتقعد تهدي فيني خخخ ياحبي لج يااختي الله يحفظج وعيالج
مع انه طبعي كتوم لكني ماقدرت أخبي عن اقرب الناس لي خوفي من هالكلمه
لكني بعد التفكير والحين اقول ليش أكره هالكلمه وربي اختارها لي عشان يفرج لي هم كبير كان ممكن يصير اكبر سبحانك يا ربي مااوسع رحمتك :(
ليش أبكي على هالكلمه واهي مثل ماقلنا صارت لنا الحضن الدافي وطريق الخلاص والحريه
وإن شاء الله اهالينا مو مقصرين بحاجه عايشين بحضنهم معززين مكرمين ولافي مخلوق يقدر يهينا او يجرحنا بحضنهم
الله يحفظ أهالينا جميع ويقدرنا نرد أفضالهم علينا ونعطيهم كل حقهم


،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،

الغاليه لين هلا فيج يالغلا كيفك؟؟
طمنينا عليج :)


،،،،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،،،،

الغاليه أم 3 زمردات :)
تسلمين يا قلبو على التوضيح عسانا ماننحرم منج احسج فاهمتنا عدل وتعطين كل وحده النصايح اللي محتاجتها بالضبط
الله يسعدج ويوفقج يا رب دنيا وآخرة

،،،،،،،،،،،،،،،،،،،،،،
،،،،،،،،،،،،،،،،،،،،،،

الغاليه مصممة مواقع
وربي ضحكتيني خخخ اتخيل شكل الحفله كيف خساره ليش ماعزمتيني معك عشان احرق اللي عندي كمااان؟؟؟ بعدني لحد اليوم ماتخلصت منهم يبيلهم قعده محترمه لانهم دفاااتر من سنييين وقلت راح اقطعهم ماراح احرقهم عشان مايخترعون اهلي فديتهم خخخ
و ع فكرة عجبتني حكمة الهكوناا متاتاا ^_* ذكرتيني بايام ماكنت نونو كنت أردد هالكلمات كثير

،،،،،،،،،،،،،،،،،،،،،،،
،،،،،،،،،،،،،،،،،،،،،،،

الغاليه بلسم فقط
ويا رب تكونين بلسم جراحج وجرح كل انسان يا رب وبلسمنا كماان :)
عجبني كلامج والله الله يعطيج العافيه ع النصايح الحلوة وكلامج المقنع

باك سريع ^_^

بنات حبيت أستسمح منكم اذا تأخرت مااقدر أدش بأي وقت خاصه بايام الاسبوع لظروف الدراسه
ادعولنا حبايبي بالتوفيق دنيا وآخرة وانا نقدر نركز بدراستنا ونتخرج بامتياز يا رب
والله يوفقنا دنيا وآخرة جميع ويفرج همومنا جميعاً يا رب ويبدل احزاننا سغد ومسرة وافراااح ويهون علينا كل عسييير
ورددو دايم الدوووم واذكركم واذكر نفسي
اللهم أجرني في مصيبتي واخلف لي خيراً منهااا
مع الإستغفار بكثرة والصدقه وقيام الليل والدعاء


بنات ما ودي أقلّب عليكم الاحزان بس هالنشيد كنت مخزنته عندي من زمان ومن يومين بس فهمت معناه! عاد قلت أحطه لكم لانه عجبني
http://www.w7m.org/2007/Mar/1174083980.mp3

وعلى فكرة انا ماصارلي شهر من تطلقت أقل!! :)

الله يحفظكم
وداعة الله
:26:

السلامـ عليكمـ يابنات
كيفكم وربي وحشتوني حيل حيل
ورده متفتحه كيفك ياقلبي واش اخبارك يالغلا وربي الكـ وحشه
بلسمـ فقط كيفك غناتي وكيف امورك ان شاء بخير
اخر مره كتبت هنا كنت اذكر انه فجووره ببترك الملف بالله طمونوني على اخبارها كيفها وهل اتركتنا او للحين معنا

بنات كلكم كيفكم وكيف اموركم

انا انقطعت عنكم كثير بس والله فتره كانت حرجه ملل وضيقه ويكاء وصدااع شديد وكسل وخمول كل الاشياء خلتني اكره الدنيا


بنات طلبتكمـ محتاجه لدعواتكمـ انا احتمال اسوي عمليه يومـ الاربعاء
عملية ليزك لعيوني
امانه ادعولي وان الله يقومني بسلامه وارجع اشوف زين

وبسألكم اللي قد سوت هذي العمليه او احد قريبتها سوتها تقولي
هل هي سهله او لاء وصحيح انها بدون بنج

انتظر ردكم يالغاليات