~: : :OoO «-.¸¸,.-~*تجمع أحلى صحبه ,,,بنات ليبيا "التجمع الثانى" *~-.,¸¸.-..OoO: : :~

اهلين امل مصباحي شن اخبارك
من توه نقولك كل عام وانت بخير
وغدوه ان شاء الله نزلك احلي كيكه هديه مني
:26:

السلام عليكم

هذا تصحيح التسميع

بسم الله ماشاء الله ولا قوة ألا بالله
السلام عليكم ورحمة الله وبركاته
كيف حالكن اليوم يا بنات وشنو الأخبار ,,,
عيوني .. امواج ..ام تقى الدين...G Libya ...اريام الحنين ....ليبيا قلبي... تقربصتي ...حياة حلوه ...أمشيمشه ..ام مودي وميمي ..good life ..مرام ....greenstar ...المصباحى...ليبية100 100 .

أن شاء الله تكونن طيبات وسلمكن نشادات وانعنكن ما اتغيبن .
خلن انقوللكن أخر أخبارى
من اشوى كلمونى من المستشفى والحمد لله نتيجة التحليل حتى هى طلعت سليمه
طلع كيس دهنى امخلط امعاه جزء من نسيج الثدى متطرف وما فيش خلايا سرطانيه
اللهم لك الحمد والشكر والرضى ,,,,
والله يا بنات فضل ربى واسع وكريم فى عطائه بلا حدود
الواحد امغير يتوكل على ربه ويتيقن أنه يستجيب
سبحان الله لما كنت ندعى فى سجودى كنت انحس أن ربى قريب منى ويسمع فيا وانحس بالطمأنينه وأنه مش حيتخلى عنى اللهم لك الحمد والشكر ,,,
يارب قدرنى وقدر اخواتى على طاعتك وشكرك وحسن عبادتك يارب
فيه موضوع للاخت ديباج الجنان فى الفتاه المسلمه ياريت تقرنه يا بنات يحكى عن الجنه هى امدايرته كأنه رحله لوصف الجنان
لما تقريه اتحسى كأنك مشيتى فعلا معها فى الرحله واتحسى بالتقصير الكبير فى العباده
اللهم اهدينا وثبتنا وابعد عنا وسوسة الشياطين ...

خلنى انقوللكن خبر ثانى وهو اللى كان سبب فى كل المشاكل اللى كنت فيها
لما كنت ناخذ فى العلاج الكيماوى طبيب الاورام حكى لى على كل المضاعفات ومنها حدوث سن اليأس مبكر لأن الكيماوى يحطم المبايض وقتها كان املى المهم فى الشفاء وما فكرتش انى حنخش شيخوخه مبكره
بس سبحان ربى العظيم وقدرته رجعت طبيعيه بعد ماتم العلاج بثلاثة اشهر ومبايضى اللهم لك الحمد اشتغلوا ورد الطمث
اصعب شيئ على الانثى شعورها بالعجز حتى لو انها ام مليون طفل
اللهم أرزق كل محرومه الذريه الصالحه وأرزق اختنا ذات الهمه ما تتمنى وفرحها بالولد الصالح ,,,
المهم شاءت مشيئة الله انى أحمل (معليش ما خبرتكنش لأن الخوف من مضاعفات الحمل وسلامة الجنين خصوصا بعد تعرضى للعلاج بالاشعه خلوا احتمال اكتمال الحمل ضعيف يعنى ما بيتش انقول حتى نتأكد من كل شيئ)
وطبعاً الحمل فى حالتى يعنى هرمونات وممكن ينتج عنها عودة الورم وهذا خلا الاطباء يحطونى تحت المراقبه انا والجنيين ,,,
بعيد عنكن ماشيه جايه على المستشفيات شيئ اخصائيين اورام وشيئ اخصائيين علم اجنه ووراثه ونساء وتولد واشعه وسريب ما ريت مطوله
هذا وامعاه وحم ودراه كبد
بس فى نفس الوقت كنت فرحانه بعطاء الله وفضله وان قدرته أكبر من كل شيئ ,,,

يوم اكتشفت الحبه تحت باطى خفت لأن الكل ينتظر فى عودة الورم مع الحمل وايضا الفتره ما فاتتش العامين , وهذا عليش خبرتكن
وسامحنى كلكن على القلق اللى عيشتكن فيه بس حسيتكن عائلتى فى الغربه وقلتلكن
وانتن ما قصرتن لا بدعاكن ولا بسؤالكن الدائم الله يجمعنى بيكن فى الجنات العلا يارب ...

المهم اليوم لما كلمونى واطمنت على نتائج العمليه انها سليمه والثدى سليم والمرض ما عاودش
كان امعاهن خبر اخر ان الجنين سليم وانه ما فيش اى تشوهات خلقيه صارتله بسبب تعرضى للعلاج الاشعاعى او الكيماوى
اللهم لك الخمد والشكر يارب على نعمائك ,,

حبيت انخبركن توا بعد ما كل شيئ ماشى تمام حالياً وأسأل الله أن يحفظ جنينى ويحسن خلقه وخُلقه ويقذف التوحيد فى قلبه
ويحفظ جنين امشيمشه ويبارك لها فى ذريتها ويوصلها سالمه لاهلها ويجمعها بيهم على خير وترجع لنا بالسلامه
ويارب يرزق كل من تتمنى بالولد الصالح
ويشفى كل مرضى المسلمين
ولا أله ألا الله وحده لاشريك له له الحمد وله الملك وهو على كل شيئ قدير
أله ألا الله وحده لاشريك له له الحمد وله الملك وهو على كل شيئ قدير
أله ألا الله وحده لاشريك له له الحمد وله الملك وهو على كل شيئ قدير

شكلنا هكى نفتحوا حضانه للصغار ماشاء الله تبارك الرحمن (ههههه)

حياة
ماشاء الله سلم ايدياتك شكله ايهبل الحلو
ان شاء الله ربى يرزقك بولد الحلال (بعدها اتقولى ايام العزوبيه احلى)
ويا حنا الناس كيف ماقالوا لك البنات ديما ينشدوا
قبل الزواج كلمة ها مافيش حاجه ما توقفش
وبعد تتزوجى ها حامل وألا مازال
وكان جبتى ابنيه ما يبطلوش كلمة ان شاء الله اوليد
وكان اوليد ان شاء الله ربى يرزقك ببنيه وألا خى
وكان كبرتى ومعش اتجيبى ما يبطلوش ان شاء الله اتزوجيهم وتفرحى بيهم
وهكذا يعنى السؤال ما يكملش
فالافضل انك تعودى روحك على هالكلام لأن المجتمع كله هكى وما تخليش روحك حساسه وانك ما فيكش عيب بس الزواج هذا امقدره لك ربى امتى ما يطب عليك ربى يسخره وبسرعه
العرب الاولى ايقولوا (الزيزه والموت مكتوب ما منهن مهروب)
يعنى الزواج بأذن واحد أحد حيجيك بس ماتستعجليش على رزقك)
وأنا عارفه انك مش انتِ المستعجله بس ناسنا هكى اهتماماتهم
ربى ان شاء الله يفرحنا بيك قريب وتعزمينا كلنا فى بلادنا الحبيبه :icon28: :icon28: :icon28:

ليبيه
بعيد السو على الصغار وسلامتهم ان شاء الله ما ايشوفوا شر

ام تقى الدين
شنو حالك ياغاليه
وحلو الموضوع (ايشهى على راى البنات ) قعدت نقرا وحاله فمى
انا بصراحه الحلو مش شاطره واجد فيه يعنى عطينى حاجات التكركيب (حلوياتنا زمان اوكى انديرهن )بس الكيكات والحاجات اللى فيهن لبز واجد ديما يفشلن عندى
وما عنديش على التزيين والتنقريش
والحمد لله زوجى ما عندش واجد على الحلو وعيالى اللى اديرها العمشه ياكلوها ضناها هههه
بس نبى طريقة حلويات امتاع قهوه عندى ضيوف فى عطلة الاسبوع ولازم كم شكل مع القهوه والشاهى
وماشاء الله قلتى 80 عائله فى ابوظبى هذا غير اللى مش محسوبين
ماشاء الله الليبيين مع انهم حاره بس فى كل مكان
واللى توجع اننا كلنا طلعنا من بلادنا ونخدموا فى بلاد الغير
ان شاء الله ربى يرجعنا لبلادنا ونعمروها
تعرفى من ثلاث سنين دارت الجاليه الليبيه حفله فى تورنتو علشان العيد فحضروا 600 عائله ليبيه
تخيلى هذوم فى جزء من مقاطعه وحده فى كندا
يعنى لو حسبوا اللى فى كندا كلها يطلعوا ايعبوا وحده من المدن الليبيه
وبريطانيا فيها مازال اكثر
واحد نعرفوه عدا يشتغل فى دوله فى الكاريبى حتى اسمها انسيته المهم قال امقمعز فى قهوه خش واحد طايرتله وقال عطكم زحيقه
قال اطربقت من الضحك وقلت له شنو جابك هنا :42: :42:
وقلتى انك طبيبه مع وقف التنفيذ يا حنا الحال من بعضه زينا زى اعيونى
بس انتِ وين قريتى بالك نعرفوا بعض :26:

عيونى ربى يعينك شهرين زوجك امكسدلك
تعرفى الرجاله اللى متعودين على الشغل يملوا من القعده فى الحوش والكساد ويلخبطوك امعاهم
لا عاد تعرفى اتضمى اكويس ولا اديرى حاجه فيها الفايده
مرات انقول ربى يسعدهم ويبعدهم وياريته ديما شغل ههههه

قود لايف
ماشاء الله ديما تطبيقاتك روعه وذوقك حلو
تبارك الرحمن

المصباحى
ان شاء الله بطولة عمرك وطاعة ربك
ما اتقوليش مواليد 7 ابريل (هههههه)

امشيمشه الله يعينك على السفر ومشقة الرحله وتوصلى طيبه

امواج يابتى خشى حتى قولى خير
ولاباس على صاحبتك
وعطله سعيده مع السنافر
انا امس قالوا لى ياماما عندنا عطله الجمعه والاثنين يعنى قاعدين فى الحوش 4 ايام قريب انجلطت
ربى يحفظهم لكن المدرسه رحمه ههههه


وعلى فكره يابنات
الضيوف جايينى على يومين
وحدين عازمينهم على باربكيو (شوايات)
فشنو اندير مع الشوايات خصوصا اعويله ماشاء الله وفيه اصغار
طبعا الشوايات على زوجى فنان فيهن انا بس عليا السلايط فشنو اندير
والعيال شنو انديرلهم (اكيد مش حياكلوا لحم بس)
عطنى افكار

واليوم اللى بعده جايينى عائلات(وحدين اخرى)هذوم نبى انطيب ماكله
فشنو اقتراحاتكن
انا ما انحبش اندير حاجه من اليوم اللى قبلها يعنى لما يكون عندى عزومه انوض من الفجر ونبدا فى التطيب
وترتيب الحوش انديره كله اليوم اللى قبله ويقعد امغير لمسات بسيطه يوم العزومه
فشنو تقترحن الاكل
انا فى بالى العصبان هذا رقم واحد
لكن شنو اندير امعاه وخصوصا انهم واشون ماشاء الله فشنو انطيب
فكرت فى الرشده بس حتأخذ وقت
وشنو اندير شقاشق ,,,
ويا حناتى عندنا عطله من يوم الجمعه علشان الاستر هذا عليش نازلين فيها عزومات
انراجى فى افكاركن وعطنى حاجات حلوه لكن ما تاخذش وقت واجد ونقدر اندير كميه كبيره
حوالى 20 شخص بما فيهم الاطفال :42:

باقى البنات شنو الاخبار ؟

السلام عليكم
:icon28: :icon28: :icon28:
الف مبروك اختى ام محمد علي سلامتك وسلامة الكيس وعلي الحمل ربي يتمم حملك وحمل مشيمسة علي خير ...
ام محمد
ربي يعاونك علي العزومة بالنسبة ليوم العصبان اي حاجة اخري امبوخة مثلا رز كسكسواو مكرونة طبعا لو كان رشدة بالنسبة ليا انا خير وخير بس تعب عليك ومعاهن شربتنا الليبية .

والشقاشق اللي مع الشوايات تقدري اتديري بيتزا مشوية كنا انديروا فيها من قبل ايام بنغازي والشاليهات احلى ايام .هي زي البيتزا العادية بس تطييب علي الشواية وصلصتها وكل شي عاادى بس يمكن تعب عليك.

وماما تحب اتدير للاطفال كيكة او طاجين البطاطااللي زى العجة وتوست بالجبنة شقاشق يحبوهن العيال .
وربي يقدرك على العزايم يبن ايدين يا ريت نقدر انجي نساعدك..
ان شاء الله نكون ساعدتك

باقي البنتات كيف حالكم
:26: سلامات توا:26: