بكيت غصبا عني قدامهم ؟؟؟

السلام عليكم
مشكلتي مع اهل زوجي عنده 2 اخواته وزوجة اب لانه والدته متوفيه
غالبا لما ازور اخته الكبيره ما اطلع الا وانا جددا متضايقه من اسلوبها في احدى المرات كنت رايحه مع زوجي وقالي انا بروح وبجيك بعدين وخليك معاها وهذا الكلام وهي طبعا جالسه وساكته يعني ماتقول خليك معانا قلت له خلاص ودني البيت وانت اطلع وهي ساكته وهو كرر كلامه قلت له خلاص بروح ودايم لما اروح لها اذا بطلع حتى ماتتكلم يعني تقولي مثلا اجلسي ؟؟؟؟ مع العلم اني مو دايم اروح لها ولما تجي اضيفها واكرمها واعاملها احسن معامله وفيه بعد حركه ثانيه مرره مضايقتني منهم . هالايام صار زواج اخو زوجي ثاني يوم مسوين غذا للاهل في بيت ابوهم الي هو ابو زوجي واخواته هناك وزوجة ابوه وهم عارفين اني بروح لان من جلسنا ( انا وزوجي ) من النوم عطاهم خبر انا جايني لهم وتاخرنا شوي لان اصلا زوجي جلس متاخر بسبب انا ما رجعنا من الزواج الا متاخر جددا المهم على مارحنا صار الساعه 2 ودقايق وصلنا عندهم زوجي راح مع اخوانه وانا مع اهله وبنتي الصغيره ( 7 شهور ) طوول الوقت تبكي كالعاده المهم الا تسالني اخته الثانيه تبين نحط لك الغذاء ؟؟ قلت لها ليه تغذيتوا قالت ايه ؟؟! وراحت وحطت شوي رز وقطعة دجاج وجابته لي وكلهم مجتمعين بصوب ويشربون شاي وانا من وصلت ولاضيفوني وبعدين حطوا لي الرز لحالي ؟؟ كاني رايحه عشان الاكل ؟تفاجأت من الموقف لان الغرض هو ان نتجمع والمفروض ان ينتظروني اذا كنت اهمهم مو اني اروح وكلهم موجودين وانا لحالي مثل القطوه حاطين لي الاكل ؟؟ماعجبني الموقف لان مو اول مره حتى صار لي معاهم في الاعياد كذا يتجمعون وهم عارفين ان رايحين لهم مانوصل الا هم متغذيين وبعدين يحطون لنا اكل لحالنا ؟؟انا لو يصير عندي تجمع في بيتي مستحيل ناكل او احط الاكل ولسه وحده ناقصه من الاهل ؟؟ المهم بعدين زوجي جاء لي في الصاله لان سمع صياح بنته واخذها وغصبا عني بكيت :icon33:
ما احب ابكي قدام احد ماقدرت اتحمل الموقف هم فكروني بكيت عشان بنتي تبكي ؟؟ والحقيقه اني بكيت من الضغط الي انا فيه غير صياح بنتي وزوجي كان عاجلني قبل لا اطلع وكل شوي ويصارخ علي وانا حتى ماشربت شي واخر شي اوصل لهم وكلهم متجمعين ويشربون شاي ولا حتى ضيفوني وبعد فتره من جلوسي معاهم حطوا لي الاكل لحالي ؟! وهم خلاص اكلوا ولاحتى انتظروا وهم عارفين انا رايحين لهم ؟ وهذي مناسبة زواج ؟؟ بعدين طبعا ما اكلت واخته الثانيه لما شافتني ما اكلت بعد ما بكيت الا تقولي مثل ما حطينا لك الاكل قومي وغسلي الصحن ؟! طبعا تتكلم على انها تمزح ؟! لكن مزحها ثقيل بعدين زوجي قالي يالله نمشي وطلعت طبعا حتى ماقالوا لي شي لا اهتموا ؟؟ ركبت السياره وانا ابكي لهذي الدرجه مايحسون ؟ سبق ورحت لهم ونفس الشي رغم انا ماتاخرنا الظهر وهم اكلوا ولا حتى ينتظروون مو مهتمين بالمررره رحت ولا مارحت ؟ وانا موجبتهم ولاني مقصره معاهم بشي ودايم ابادر معاهم بهدايا وبزيارات وانا اتفاجأ من حركاتهم غير اني في مره رحت لاخته واول مارحت ماكانت موجوده في الصاله كانت في الحمام اعتقد وبعدين طلعت وشافتني من بعيد ولا سلمت علي وراحت تحوس وتمشط شعرها ومادري ايش تسوي وبعدييييين جت لي عادي وسلمت وهذي الحركه مكرره لها يعني ممكن اروح وتشوفني وهي ماشيه ولا تعبرني وتروح تحوس وبعدين اذا تذكرت:blink: تسلم :confused: والله ان اغلب الاوقات اروح واتضايق منهم واخر شي الموقف لما بكيت كنت اتمنى لو يرجع الموقف وامسك نفسي مادري كيف ماقدرت اتحمل ونزلت دموعي وياريت على ناس تحس ؟؟ شنو رايكم بنات لو انتوا تتعرضون لهالمواقف وبالذات الاخير وش يكون موقفك؟
بنات انا لما لقيت سابقا تصرفات تضايقني مرره قطعت عنهم وصرت ناادرا ما اروح لكن بعد فتره اعدت النظر في علاقتي معاهم وقلت خليني اقويها خاصه ان بنتي الكبيره ( 4 سنوات ) بحاجه لاطفال تلعب معاهم اسرتي في بيت اهلي ما فيه اطفال ومسكينه دايم تذكر بنات عماتها قلت عشانها اقوي علاقتي معاهم وعشان تحس بعدين ان بالفعل عندها قريبات