موضوع مختار :ريجيمي اللي نزلني بفضل الله من 86 الى 58/تجاوز الحد المسموح له من الردود

سلام بنات كيفكم كلكم اليوم مالي خلق أرد محبطه مره وضايق خلقي ..
أم عبد الرحمن هلا يا قلبي والله مره تعبانه أحس اني أدور في حلقه مفرغه على قولهم أخفف وينزل وزني كم كيلو وأخبص وأرجع الكم كيلو من جد احباط تدرين انه من 5 سنين وأنا على هالحال ما أدري تتوقعين بحقق حلمي وأوصل لوزني المثالي ..
اه والله العظيم ما أدري اليوم وش فيني عالعموم بطلع الحين يمكن بنام شوي والله يهونها ..
يلا أشوفكم بعدين على خير في حفظ الله يا أحلى بنات ..

غريييييييبه وين حلا؟؟

اجوديه

بالعكس يا قلبي لا تخبيص ولا شي
عادي انك مره بالاسبوع تفطرين كذا
وخذي معها كوب حليب منزوع الدسم وكوفي او قهوه عربي

وسعي صدرك الريجيم مو حرمان
الريجيم نظام

وبالنسبه لتعب المعده
انا كنت بالبدايه كذا
وخصوصا اذا شبعت يوووووووه اتعب من جد
الحين خلاص الحمدلله تعودت المعده
يعني تقدرين تقولين انها مرحله انتقاليه

وهذا السر اني قلت يوم بالاسبوع كلي من بره باعتدال
علشان نفسيتك وعلشان المعده

ثم حركه زي كذا كليجه الصبح مثلا
او حبتين شيبس خلال اليوم
او حبة جواهر جالاكسي سناك بين الغدا والعشاء او بين الفطور والغدا
كلها تعود المعده انها ما تتعب

وصدقيني احنا مشكلتنا قناعه ان الريجيم حرمان
وهذا اللي تعبني كثير اول الريجيم
كل ما اكلت شي اتعب نفسيا وتوصل للياس والبكاء
اخر شي شفت امي الله لا يضرها طول عمرها رشيقه والجينزات عندها اكثر مني
سالتها قلتلها كيف كذا واشوفك تاكلين كل شي
قالتلي ما انسى اللي اكله
بمعنى اذا راحت عند ناس واكلت ضيافه حبة بقلاوة - 270 سعره تقريبا -
تتعشى تفاحه فقط او لبن زبادي
واذا تغدت رز ما تاكل خبز بالعشاء
واذا افطرت ثقيل
تاكل الغداء والعشاء خفيف

ماشاء الله عليها تنظم اكلها اتوماتيكيا
وهذا المفروض


فلا يضيق صدرك يا قلبي وبالعكس تيكت ايزي واستمتعي بالكليجه لا تتعذبين
وبالعافيه
---------------------

رحيل

حبيبتي لا تضيقين صدرك خلاص شدي رياضه وواصلي بالريجيم بينزل وزنك باذن الله
انا بصراحه من تجربتي اكتشفت ان التخبيص وراه ريجيم فورا ما يزيد الوزن يوقف النزول مدة اسبوع يمكن وخلاص
ثم يرجع النزول
احنا غلطتنا اذا خبصنا خلااااص نكمل التخبيص ونرجع اللي نقصناه
اذكر لما كان وزني 74 كنت بالخبر عند اختي
وقررنا نطلع النعيريه ورحنا محل اكيد تعرفه رشيقه اسمه فلافل الامبراطور رهيييييييب
اخذنا فلافل وطلعنا الصبح بدري
لاانا قلتلهم قصوها نصين واكلت نص ساندويتش
وشربت لبن
رحنا البر لعبنا ومشينا وروقنا
بصراحه ما خليت شيبس ولا شوكولاته
كل شي اكلته
رجعت الجبيل وررجعت للجبيل والريجيم
اسبوعين وزني حالف ما ينزل
معليش واصلت وزودت المشي
فجاه رجع ينزل والحمدلله

يعني يا حبيباتي مستحيل ما تاكلون وما تنزلون وانتم طبيعين يعني مافي خلل هرموني او شي زي كذا
علشان كذا خلو شعاركم لا للياس

وبالتوفيق
------------------

منوري
هلا ياقلبي
ومافيها تدخل ابدا
انا صراحه اقرا القران على السرير
شوفي كيف
الساعه 7 الاولاد نايمين
الساعه 8 ونص انا على الجهاز
الساعه 9 اخلص منه
الساعه 9 ونص تقريبا اكون متروشه وعلى السرير
وزوجي يشوف التلفزيون وانا ما احب اشوفه
امسك المصحف واقرا متواصل لان خلاص هدوووء والاولاد الله يحفظهم نايمين

ياخذ معي الجزء تقريبا من ربع الى ثلث ساعه

وبس
اتمنى اكون افدتك
وعلى فكره لو قرات بنص النهار ببهذلوني الاولاد وبقاطعوني مليون مره الله يحفظهم

اليوم ان شاء الله بقرا البقره مره ثانيه يعني ماراح اقرا المائده
لان قراءتها كل ثلاث ايام تحفظ البيت
وبكره باذن الله بكمل قراءة الختمه وبقرا المائده

---------------------

يلا بقوم اسوي كبوتشينو

حلا وينها؟؟؟؟؟؟؟