
حبيباتي عضوات عالم حواء..
أنا عندي قناعة أنه الشيء على ما تتصوريه..
يعني لو حطيتي في باللك أن الشغالة شر لا بد منه<<مثل مايقولون
أو أن الكرف والشغل مايخلص
وغيره من العبارات والكلام المميت اللي دائما نسمعه راح يتسرب لنفوسنا الكسل والملل ونحس بالتعب ونعيش دور الضحايا للبيت وشغلها..
8 8 8
جتني ضيقة صدر بس من الكتابة..
لكن تعالوا معي
لو كل وحدة منا أستشعرت المتعة أثناء شغلها ببيتها
راح فعلا تحس بالمتعة.. مثل الأخت اللي حاطة تجربة كوب النسكافيه ربطت العمل بالاسترخاء..
لو نحط ببالنا حجم الإنجاز بدل حجم العمل
بإذن الله يدفعنا للعمل أكثر..
وفيه طريقة رائعة وهي طريقة الحوافز.. لو تكافئي نفسك على كل عمل تنجزيه مثلا تدخلي النت أو تشربي كوب قهوة أو تسترخي بالسرير.. وغيره كل عمل واللي يناسبه
الجدول طريقة جدا رائعة..
تخلي البيت دائما متجدد..
وفيه استراتجية جدا مهمة وهي أنك ماتقومي من مكان إلا وهو مرتب بالذات أماكن تواجدكم..
أنا دخلت لبيتي مخدومة-عند أهلي شغالة-وكنت كارهة الشغالات كره العمى فتعبت جدااااا في البداية وصرت ألاحظ السنعات وحركاتهم ولقيت هذي صفة مشتركة بينهم
وصرت أطبقها وماأبالغ لو قلت أنه 70%من الشغل خف علي
وعلى فكرة ترا ماتأخذ وقت إذا تعودتي عليها
وفيه نقطة ألاحظ كثير ناس لاغينها وهي تشغيل الأبناء-سواء بنات أو أولاد-ليش الوحدة تكرف عمرها ومستوليه على كل المسئولية.. بحجة أنها ماتبي تكرف أعيالها أو ترحمهم بالعكس الطفل متحرك متحرك بالخير أو الشر،و من تعويده على البر أنك تدخليه بشغل البيت .. قولي لهم يالله ننظف قبل لايجي بابا يشوف الدنيا حوسة.. وخليهم يلعبون مثلا يغمضون عيون أبوهم ويفاجؤنه.. وسوي لهم حوافز بدال الكب عليهم على الفاضي خليه على المليان..
وماأنسى أننا ذوات تستحق الرفاهية
يعني كل شيء يريح ممكن أجيبه للبيت
مثل الغسالة الأتومتك والمجفف الحراري وغسالة الصحون وغيرهم..
وفيه أشياء تخفف الحوسة مثل صناديق الأطفال ، أدراج بالصالة ، شبك غسيل قريب للحمام -أكرمكم الله-
اللي نقدر عليه
نجمع المصاريف هذي أهم من أشياء كثيرة نكب عليها الفلوس..
وطريقة ترتيب البيت أحيانا تخليه متعب
إذا كبير نحاول نختصره بتسكير غرف ودورات مياه
الأثاث نغير حسب اللي يريحنا
مثلا الأطفال الأدراج أحسن لهم من الدواليب ويكون مكانهم جنب المجفف
ممكن تحت الدرج يتسكر ويكون تحته علاق وأرفف للملابس اليوميه والشنط وجزم المدرسة..
وهكذا
ولا أنسى ومهمة جدا الأذكار قبل النوم التسبيح33والحمد33والتكبير34لها دور بانشراح الصدر وبركة الوقت والجهد
والحقيقة اللي مايمكن أنه أحد ينكرها أن كل وحدة منا تجيها فترة تطفش وتمل
فالمفروض لما نمر بهالفترة نحاول نغير بطريقة الترتيب أو ندخل النت نشوف أفكار السنعات وهكذا لحد مايرجع النشاط من جديد
المعذرة طولت وأكثرت لكن كلنا هنا لنستفيد ونفيد