مرحبا يا أمهات يا حلوات..
بداية هالأسبوع بديت مع ولدي أعلمه استخدام الحمام .. هو فديته عمره الحين سنتين وسبع شهور .. واللي اسويه انه عقب ما يقوم من النوم اشيل عنه البامبرز والبسه ملابس داخلية .. وكل نص ساعة تقريباً ادخله الحمام .. واقول له انك الحين ريال وشاطر وبطل ولازم نسوي في الحمام مب في البامبرز.
طبعاً أنا عارفة ومهيأة نفسي انه بيتعبني شوي وما بيتعلم بسرعة .. وطول هالثلاث أيام ما سواها في الحمام الا مرتين بس مع انه ـ عزكم الله ـ يتبول خمس ست مرات في اليوم تقريباً.
وطبعاً عارفة بعد انه ما بيعرف الحين يقول ابا الحمام .. وانه يحتاج لوقت.
بس في مشكلة ..
الولد متعود ـ عزكم الله ـ يتبرز كل اليوم الصبح بعد كوب الحليب بحوالي نص ساعة تقريباً .. وأحياناً يتبرز مرة ثانية العصر أو المغرب .. بس من وقت ما بديت اعلمه على الحمام وما البسه بامبرز بالنهار ما قام يتبرز .. يعني أول أمس ما تبرز طول اليوم لين وقت النوم يوم لبسته البامبرز .. يعني سواها وهو راقد مع انه بالعادة ما يسوي جذي .. وأمس بطوله ما تبرز حتى وهو راقد .. واليوم انا تميت اترياه لين الساعة تسع ونص .. ومن شوي شفت ويهه متغير وواقف وقفة عجيبة فسألته شو تسوي فقال لي فديته (كاكا) .. فخذته بسرعة على الحمام لكنه سبقني وتبرز في ملابسه .. ويوم حطيته على الحمام فكرت انه بيكمل لأني فكرت انه ما خلص .. لكنه ما سوا شي!!!! .. فهل هذا شي طبيعي والا في مشكلة؟
صراحة قلت يمكن هو نفسياً خايف يتبرز لأنه مب لابس بامبرز.
وبعدين يوم احطه على الحمام اتم وياه أكثر عن عشرين دقيقة ومرات نتم في الحمام نص ساعة لكنه ما يسوي شي وعقب ما نطلع ونلبس يسويها في ثيابه .. فهل هذا يعني انه مب مستعد بعده للحمام؟؟؟؟ .. مع انه فديته هو بروحه يقول لي عقب ما نطلع من الحمام (ماما ابا هاف) .. يعني ما يصمم يلبس بامبرز.
وانا من فترة قريت معلومة تقول ان مب المفروض نبدا نعلم الطفل على الحمام في الشتا .. فهل هذا صحيح؟؟ يعني انا بديت وياه في وقت غلط والا لا؟؟
وعندي سؤال بعد .. متى اعرف انه الولد فعلاً مب مستعد لتعلم الحمام .. يعني مثلاً لو طاف اسبوعين وهو على هالحالة فهل هذا معناه انه مب مستعد والمفروض اني اوقف المحاولة واكررها بعدين والا شو؟؟؟؟؟
انا قريت عن هالموضوع بس مالنا غنى عن التجارب .. أفيدوني أفادكم الله.
الموضوع مغلق