بديت أعلم ولدي استخدام الحمام ... ولكن.......!!!

اهلين با لأمهات وبعد :
اني بنتي متعبتني في حاجه وهي شربها الكثير للعصير والحليب كله شرب في شرب كيف اقطع هذه العاده عنها وخاصه قبل النوم لأنها تصرانها تشرب قبل ما تنام ابغى ردودكم الله يعافيكم

ونسيت بعد شي احب اسألكم اياه ويش تسون لو طلب منكم الطفل الحمام وانتم في السياره في الشارع مثل على طريق السريع ولافي حمامات ويش بتسوون ؟

اعلى ناسي2

احنا اتفقنا ان السالفة ما تنفع مع الطلعات الطويلة وحتى السفر بعد.

اليوم الجمعة وامي (ام زوجي) وعمي طالعين يتغدون .. وقالو لي عشان اسير وياهم مع ولدي .. بس ما سرت لان طلعات الاجازة تطول .. وانا ما بغيت أي شي يصير ويخرب على ولدي المرحلة اللي وصل لها .. عشان جذي يلست اليوم في البيت وقلت باشوف الاسبوع الياي لين وين بنوصل وعقب باطلعه فديته.

وحتى العمرة اللي ناوين نسيرها أنا وزوجي ان شاء الله .. المفروض تكون عقب ثلاث اسابيع تقريباً .. بس قلت لنفسي لو شفت ولدي ما تمكن من الموضوع بأجلها لين وقت ثاني.

على كل حال .. الله يقدرج ويعينج .. ويا رب يقومج بالسلامة انتي والبيبي اليديد :)



شمعة حواء..

حبيبتي .. جربي انج تشرطين عليها .. اذا تبين تشربين عصير فلازم تروحين الحمام قبل النوم .. يعني مثل ما هي تصمم تشرب انتي صممي انها تروح الحمام .. واذا عاندت لا تعطينها العصير في اليوم الثاني.

وعن الطلعات الطويلة والخط السريع .. فالأخت هيه دادا في ردها في الصفحة الأولى قالت انها تخلي وياها زجاجات أو أكواب لهذا الغرض.



بنوتة بغداد..

الغالية لا تحاتين سالفة الكلام .. ومادام الولد يسمعج زين ويفهمج فالكلام ياي في الطريق ان شاء الله .. وترا حتى كنت مثلج .. وكنت ميتة خوف على ولدي لانهم كانو يقولون لي لازم على الاقل يقول شي ولو بسيط يوم يكمل السنة .. وانا ولدي فديته كان مييييييييح مع اني كنت حريصة اني اكلمه واسولف وياه من أول ما ربيته لدرجة انهم كانو يضحكون علي يوم أتكلم وياه كأني أتكلم مع شخص كبير :) .. بس قالو لي انه ما دامه وحيد وما عنده يهال من عمره فعادي يتأخر في الكلام (مع اني انا اتكلم أحسن عن اليهال :icon31: .. ) .. وفديته ما بدا يقول بعض الكلمات المخربطة الا قريب .. فاتركيها على ربج ولا تحاتين.

عن تعلم الحمام .. حبيبتي الولد عمره ما بيقدر يقول (ابا حمام) من أولها .. لازم تعودينه الأول على موضوع الحمام وعقب بيبدا يتحكم في نفسه وبيقدر يقول أو حتى يأشر انه يبا يروح الحمام.

انا ولدي لين الحين ما يقول .. بس انا كل ساعة أو ساعة الا ربع بالكثير وديته الحمام .. ومرات يوم اسأله يقول لي (ما ابا) .. بس يوم احطه على الحمام يسويها :)

فانتي يا اختي لا تعتمدين على ولدج في هالمرحلة لانه حليله بعده ما يعرف .. بس مادامه يخاف من الحمام الكبير فجربي له النونية (القصرية) .. يمكن يوم يشوفها قريبة منه على الأرض ما بيخاف.

الشي الثاني .. الولد حبيبتي ما يعرف الأسماء الا اذا علمناهم .. يعني أنا قبل ما اعلم ولدي استخدام الحمام علمته الأول اسم (البول) و(الكاكا) الله يعز الجميع .. مرات مثلاً بتبول وهو يتسبح .. فاقول له هذا (بول) .. أو أأشر له على المكان في جسمه .. ويوم شفته عرف الأسماء بديت وياه التعليم .. (ما ادري عن باقي الأمهات اذا لهم وجهة نظر ثانية :) )

والثواب والعقاب احنا اتفقنا انه لازم يكون بجد .. يعني كافئيه بحرارة اذا سواها في الحمام .. أما اذا سواها في ملابسه فازعلي منه بجد ولا تطالعينه .. واحرميه من لعبته مثلاً ولا ترجعينها له الا يوم يسويها في الحمام .. انا مثلا قلت لج اني اودي الولد الحمام كل ساعة تقريباً .. فاذا سواها في ملابسه فهذا معناه اني باوديه الحمام عقب ساعة .. وطول هالساعة ما في لعبة الا عقب ما تمر الساعة ويروح الحمام ويسويها هناك.

انتي جربي وطولي بالج .. وان شاء الله توصلين مع ولدج للنتيجة اللي ترضيج.





نغمة تائهة..

الله يهنيج بعيالج ويفرحج بهم يا رب :)

طيب اني عندي بنت مو ولد وصعبه سالفه القاروره شوفو لي حل