بجدد حياتي واغير نظامي ...من ينضم ؟؟

اضافاتك روعه تسلم هاليدين
وبتتخلصين من عصبيتك بارادتك وبقوه عزيمتك ...:)
خلك معنا :)

سبحان الله افكارك تشبهني كثير ....
كنت كذا ولاازال كذا بشكل اخف شوي ...
اللي اتبعته لعلك تستفيدين منه ..:
-تركت متابعه نشره الاخبار لانها ليست لضعاف النفوس امثالنا:)
-تركت متابعه المواضيع في المنتدى السلبيه بجميع انواعها ..
-بطلت اقرا عن عذاب القبر بالتفصيل ...لاني كنت اعاني من هالنقطه ...وقررت اعمل الاعمال الصالحه اللي ترضي ربي ..
-استخدم الرسول صلى الله عليه وسلم اسلوب الترغيب والترهيب ليناسب جميع النفوس فهناك من يصلح له الترغيب وهناك من يصلح له الترهيب...انا مقتنعه اني من النوع اللي يصلح له اسلوب الترغيب اكثر ..فصرت اقرا عن الجنه ...واقرا عن فوائد الذكر ...وفوائد الاستغفار ...وفوائد الصدقه ...وماتتصورين شلون ارتحت نفسيا..الحمدلله
-جلست جلسه مع نفسي ...وكان حوار هادئ...غيرت من رؤيتي للموت ...
كنت ارى الموت بدايه محنه وعذاب قبر وخوف وظلمه ...
الان اصبحت ارى الموت ..حق على كل مسلم ...وهو مرحله انتقاليه للحياه الابديه ...مرحله لابد ان امر بها ..ويجب الاستعداد لها بالعمل الصالح ...
ممر نمر منه جميعا لحياتنا الدائمه ...
ارتحت جدا من هذا المفهوم...
مااقول لك ان مااهاب الموت وذكره ..ولكن وقعه اخف علي بكثير من السابق ...
-تمعنت في الركن الاخير من اركان الايمان ...نحن نردده ونعلمه اطفالنا ولانفكر فيه ...مجرد نطق ...
تمعني بمعنى الركن (الايمان بالقدر خيره وشره)
في لحظه ـامل تأملت هذا الركن ...وهل انا مؤمنه به حقا ؟؟؟
هل انا مؤمنه بالقدر ؟؟وهل انا راضيه ؟؟اذن لماذا اتسخط؟؟
لماذا اخاف من سقوط الطائره ؟؟
لماذاا خاف من الموت ؟؟
لماذا اخاف من المجهول ؟؟
كل شي مقدر ومكتوب ...
تمعني معي في الحديث ...هذا الحديث نعرفه كلنا ولكن هل عملنا به ؟؟
عن أبي العباس عبد الله بن عباس رضي الله عنهما ، قال : كنت خلف النبي

صلي الله عليه وسلم يوما ، فقال :

(( يا غلام ! إني أعلمك كلمات : احفظ الله يحفظك ، احفظ الله تجده تجاهك

، إذا سألت فاسأل الله ، وإذا استعنت فاستعن بالله ،

واعلم أن الأمة لو اجتمعت علي أن ينفعوك بشئ لم ينفعوك إلا بشئ قد

كتبه الله لك ، وإن اجتمعوا علي أن يضروك يشئ لم يضروك إلا يشئ قد كتبه

الله عليك ؛



رفعت الأقلام وجفت الصحف )) .

رواه الترمذي [ رقم : 2516 وقال : حديث حسن صحيح .

وفي رواية - غير الترمذي: (اِحفظِ اللهَ تَجٍدْهُ أَمَامَكَ، تَعَرَّفْ إلى اللهِ في الرَّخاءِ يَعرِفْكَ في الشّدةِ،

وَاعْلَم أن مَا أَخطأكَ لَمْ يَكُن لِيُصيبكَ، وَمَا أَصَابَكَ لَمْ يَكُن لِيُخطِئكَ، وَاعْلَمْ أنَّ النَّصْرَ مَعَ الصَّبْرِ،

وَأَنَّ الفَرَجَ مَعَ الكَربِ، وَأَنَّ مَعَ العُسرِ يُسراً)

كلمات من ذهب ...نرددها ولانطبقها ...
لما تمعنت في معانيها ارتاحت نفسي وهدأت ...
سقط ابني ...مقدر ومكتوب ...
تعورت بنتي ...مقدر ومكتوب ...
حصل لي موقف مقدر ومكتوب ...
الرضا الرضا الرضا ...
انا اسوي اللي علي والباقي على الله ...
بطلت تأنيب الضمير او بالاحرى خففت منه ...
كل ماجاني الشيطان يضيق علي ...
كالعاده من لوم النفس والاحساس بالتقصير ...
اوقفت كل مايجول في نفسي ..
مقدر ومكتوب ...
هذا هو الايمان ...
-صرت دايما ادعي ربي ان الله يشرح صدري ويرضيني بقضاءه ...
صدقيني يالغاليه النفس لازم نربيها ...ولا بيدخلها الشيطان من كل مكان ...ويخلي حياتنا جحيم ..
تذكري ...
انك بيدك تسعدين نفسك ...وبيدك تتعسينها ...لك الخيار فاختاري :)

ام هشوم
انت عشره على عشره :)
مااظن اني بكتب عن كتاب السر ....:)للاسباب اعلاه :)

العود المنثور ..
في انتظار عودتك :)وحياك


فروحه
الله يفرحك دنيا واخره ...
فرحت لمرورك :)


اشكركم بنات واعذروني ان كنت نسيت احد ....
دعواتكم لي :)

يامستجيب للداعي
اشكر لك سرعة ردك...وكلامك صحيح ميه في الميه
وانا فعلا في مرحلة تغيير ان شاء الله للاحسن
بس حبيت اقولك تعقيب بسيط انا مااخاف من الموت بحد ذاته على نفسي بالعكس انا دايم اتكلم عنه ومااخاف من سيرة موتي على عكس اللي حوالي يكرهون حتى سيرته <<تخيلي زوجي بس ابي افتح هالسيره يسكتني ويقول لي بعد الشر كيف تتكلمين عن نفسك كذا ...وانا بس ابي اوصيه لو مت وهذا امر الله يكثر من الصدقات عني ويستغفر لي دايم ويوصي عيالي على الدعاء لي ...يسكتني على طول ..يعني متى اوصيه بالله بعد مااموت.>>..
الموت حق وراحه من هالدنيا وليس يأس من رحمة الله بل حبا بقربه .. وانا دايم في ازماتي ادعي الله ان يحيني مادامت الحياه خير لي ويميتني مادام الموت خيرا لي ...لكن خوفي من الموت هو اني اسأل نفسي هل الموت فعلا راحه لي ولا بدايه لشقائي ...احيانا الجهل والبساطه بالتفكير ارحم للانسان من التفكر اللي زايد عن حده...وسامحيني يالغاليه على هالسوداويه بهالتفكير ...وانا قلت لك اني باديه بالتغيير حتى بالنسبة لافكاري للموت ...لابد من التفاؤل لابد من حسن الظن بالله ...لابد من التغاضي عن السلبيات والتفكير بكل شي ايجابي وعلى قولتكم جذب التفاؤل لحياتنا ...حتى راح تعكسين على اللي حواليك وتنفعيهم بأجابيتك...وسامحيني للمره الثانيه ...
وافكارك حلوه كلها حفظتها عندي وعجبتني ...الله يجزاك الف خير ..ويفرج همنا كله

الليل السرمدي .. اكيد مو انتي لوحدك اللي تفكرين بالموت كلنا نفكر فيه ..


الرسول صلى الله عليه وسلم لما حثنا على تذكر الموت كان قصده حثنا على الزهد بالدنيا والسعي وراء الآخره ..لكن مو بالشكل اللي يأثر على نفسيتنا ويجيب لنا اليأس ..


اكون معك صريحه طريقة تفكيرك بالموت والحاحك على زوجك اكبر غلط لانك بكذا تصيرين نكديه وانتي قصدك خير ..


الوصيه اكتبيها بورقه واعطيها احد تثقين فيه وخلاص ..

ذكر الموت له مواضع ومو بكل موضع


ا

.........

بالنسبه لي بما ان الموضوع فيه جانب من الفضفضه لايجاد حلول للتغلب على طريقة تفكير او اسلوب حياة او حتى هواجس شيطانيه ..

انا يضيق صدري احيانا اذا احتكيت ببعض أقاربي .. ما ادري ليه مع انهم حبوبين مره بس كذا اتضايق من مقابلتهم .

لدرجة اني خففت الزيارات لهم لدرجه توصل لمره او مرتين بالسنه بالكثير ..

اللي مو اقارب استمتع بصحبتهم .. بس المشكله بالاقارب ..

واللي اقصده من غير امي واخواني طبعا ..

انتم مثلي او انا عندي مشكله او ان المسأله عاديه بس انا مكبرتها .. ما ادري ؟؟

وبشكل عام الحمد لله دايم ما افكر بأي مشكله تمر علي بالعكس اذا مريت بمشكله حقيقيه ومنكده علي اشغل نفسي بأي موضوع لو بسيط عشان اتناسى وضعي ...



ويسلموو لكل المشاركات بالموضوع وع راسهم يا مستجيب الداعي :26:ا