امرأة عاملة؟ كيف تنظمين وقتك؟

اللى عندها فكرة او حاسة انها ناجحة بشئ تحكيلنا عنه خلينا نستفيد

ولو إني عندي شغل بس ÷اشارك معكم في الموضوع الجميل ده

في الأول بس عاوزة اقول إن في ايام الوقت بيتنظم وفي ايام لو كسلت في حاجة بتتراكم على حاجات تانية وكل حاجة بتبوظ فالفروض ما حدش يتضايق لما يحصل احباط في مرة او مرتين او حتى كذا مرة لأن الحياة كلها كده وطالا اخترتي تشتغلي يبقى لازم تقبلي التحدي ده

ثانيا في حاجات كتير بتساعد بعد توفيق ربنا يعني الأجهزة زي غسالة الملابس الأوتوماتيك، فرن الكهربا بالتايمر

تنظيمك انتي لأدوات المطبخ والأكل نفسها مهم وبيساعد كتير

هاقوللكم على نموذج ليوم من أيام الشغل عندي ويوم من أيام الأجازة مع العلم إن عندي طفلة بتروح الحضانة ودي قصة تانية

اليوم بيبدأ في العادة قبل الشروق بوقت معقول أو بعد صلاة الفجر بشوية المهم صلاة الفجر ما تروحش وده أول سر صلاة الفجر ، "الخير في التبكير" اليوم اللي ما اقومش فيه بدري بعد صلاة الفجر وقبل الشروق ما اعرفش أعمل فيه حاجة وافضل طول اليوم كسولة

المهم بأقوم من النوم لازم أبدأ بالصلاة في ناس بتأخر الصلاة لحد ما تعمل شاى أو تسلق بيض أو أو كل ده غلط الأول تصلي وتلحقي صلاة الفجر قبل الشروق تمام خلصتي لو وقتك يسمح اقري صفحة واحدة في المصحف واحدة بس وقومي على المطبخ
أنا بعد الصلاة مباشرة باسقي الزرع اللي عندي علشان لو انشغلت في المطبخ بانساه والدنيا حر وبعدين المطبخ
لو عندي غسيل باحطه في الغسالة وأشغلها وأنا في المطبخ بأعمل الآتي نفرض مثلا اني هاطبخ خضار ورز ولحمة أو فراخ
البصل بأكون مجهزاه – افرمي كمية في يوم أجازة وحطيها في علبة مقفولة في الفريزر وقت ما تحبي طلعي منها بالمعلقة للطبخ
الصلصة – نفس الشئ باجهز الصلصة كمية وأحطها
لو أنا مش عاملة لا ده ولا ده عادي برضه الكبة عندي على طول برة مفيش دقيقة واكون فرمت البصل والطماطم تتعصر في دقيقة تانية وقت ما يكون البصل بيتشوح على النار على ما اعصر الطماطم هيكون البصل اتشوح اروح حاطاه واسيبه يتسبك العملية دي كلها بالكتير تاخد 10 دقايق
الخضار نفسه بأكون مجهزاه ومفرزاه في التلاجة لازم تجهزي عندك كذا صنف- فاصوليا – بسلة – لوبيا مسلوقة وهكذا بحيث أول ما الصلصلة اتتسبك اروح حاطة الخضار وهو مجمد وعلى نار هادية واتركيه في نفس الوقت اكون عملت الرز وتبلت الفراخ وادخلها فرن الكهربا بالتايمراللي لازم اكون مطلعاها من بالليل موضوع الطبخ الصبح ده بالضبط بياخد من وقتك نصف ساعة أو ساعة الا ربع بالكتير (ممكن تأجلي الرز لما ترجعي من الشغل بس أنا باعمله الصبح علشان احط لبنتي وجبة الغدا منه) والأكل بيستوي مش هاقف ساكتة لو في مواعين اشطبها لو في سندوتشات تتعمل بسرعة وبعدين أدخل آخد دش (مهم جدا الصبح) واخرج البس بنتي والبس واطفي النار على الأكل هيكون استوى

الفرن بالتايمر مهم بقى ليه لو هاعمل أي صواني الصبح باحطها فيه واضبط التايمر وانزل ارجع الاقيها على وشك السوا او استوت وكذلك اللحوم والفراخ غير انه مفيد جدا في العزايم
رجعتي من الشغل مفيش حاجة تتعمل يدوب هاسخن الأكل ونتغدى وخلاص باقي اليوم معايا وهكذا كل يوم طبعا الغسالة هتكون خلصت دورتها قبل ما امشي اقفلها ولما ارجع اعصر الغسيل (غسالتي مفيهاش مجفف) وانشره الصبح تاني يوم بعد الصلاة على طول
لو عاوزة تشتري حاجة بعد الشغل براحتك او تزوري حد ما هو انتي خلصتي واجباتك الصبح طبختي وكل شئ هترجعي تلاقي اكل وغسيل جاهز للنشر
طبعا كل ده عاوز تعود بس مع الوقت هتلاقي نفسك بتنجزي كل ده وانتي مش حاسة بحاجة وطبعا في رمضان البرنامج مش بيتغير بأرجع قبل الفطار الاقيه جاهز يدوب اعمل سلطة وحلو وخلاص وبعد الفطار تصلي وترتاحي وتعملي اللي تحبيه

اكيد بيحصل دروبات في أيام معينة لو نسيت او كسلت في يوم احط الغسيل قبل ما انزل هيتراكم لتاني يوم الكمية هتزيد ومش هالحق اغسل كله وانشره مرة واحدة يبقى كل يوم تعملي جدول هتنفذي فيه ايه
بس العملية بسيطة قوي

لو مش قادرة تعملي أكل او تعبانة ما تجيش على نفسك لا يكلف الله نفسا الا وسعها خلاص قضي اليوم ده بأى حاجة من برة أي اكل يوم واحد مش مشكلة وتكوني استريحتي

غالبا باصحى الساعة 6 وعلى الساعة 7:30 بالكتير بأكون مخلصة كل الحاجات دي وواقفة عند الباب

الله حلو اوى يافاطمه
ماشاء الله عليكى وخصوصا حتة الطبخ الصبح دى والشاور
دا الواحد كان بيقوم مضروب بالنار وعينه مقفوله
ربنا يباركلك

لاروز انا قاعده في البيت بس ورايا مسؤليات كتير

اولا ببدا يومى بصلاه الفجر الحمد لله واقوم اجهز الفطار لجوزى وانا بعمل الفطار اكون خلصت غسيل الاطباق

بعد مااافطرهم واعمل الساندوتشات ليه هوا يروح شغله وانا ادخل انام شويه او اقعد على النت بعد كده اقوم ارتب الشقه كلها واشوف غسيل الهدوم واقوم اعمل الغدا بس طبعا وقى مش مزنوق بس مش بعرف اعمل اى حاجه وابنى صاحى لانه عاوز يتشال على طول ولو سبته بيعمل مصيبه ربنا يسترررررر فابلحق اعمل اى حاجه وهوا نايم


لو الوقت مزنوق عندى ومش عارفه اعمل حاجه من ابنى بكون دايما مجهزة خضار متنضف ومغسول في الفريزر والتوم والبصل ببقى حاطه منهم مفروم جاهز بردو بحيث لو اتزنقت اطلع منهم ببقى حاطه حاجات جاهزه بردو همبرجر سوسيس كبه في الفريزر مع شويه بطاط مقليه وسلطه وخلص في السريع

امى انا بقى بتشتغل لذلك تقريبا بتعمل زى مافطوم بتعمل من الفجر وهيا بتطبخ وتغسل الهدوم كله قبل ماتروح الشغل لانه بعد مابتجى بتكون تعبانه ومابتلحقش تعمل حاجه بس

واللى عندها افكار ياريت تفيدنا