والله قطعت قلبي هالبنت المسكينه ..
وش ذنبها انك تعاملينها بهالطريقة .. أقسم بالله العظيم أني أعرف بنت في سادس ابتدائي من أروع البنات وامها تعاملعا كصديقة مرضت مرض مفاجيء وتوفيت فجأة بعد معاناة من مرض مفاجيء ..
تخيلي لو هالبنت بنتك لا سمح الله وش بتكون مشاعرك وقتها .. بتندمين على كل لحظه قسيتي عليها فيها ..
ياأختي هذي بنت كتله من العاطفه , قارنيها بنفسك لما كنتي بعمرها ..
واضح ان بنتك مسكيييينه تحبك بس انتي ماتحبينها أو ماتتقبلينها .. وش ذنبها ..
أقسم بالله إني أتذكر بعض الكلمات قالتها أمي وأنا صغيره من باب المزح ,, لازالت تحز في نفسي وتسبب لي آلام نفسيه وأنا في نهاية العشرينيات !!
ماراح أقول لك حبي بنتك وبس ,,, لا راح أقول تخيلي انك فقدتيها كيف بتعيشين بدونها .. ؟ ؟ هل بتبكين عليها وتحنين .. هل بتندمين ؟؟
إذن ابدي من اليوم .. أول شي ارحميها .. ارحمي ضعفها وقوتك ..
ارحمي خجلها الزايد .. بسبب قسوتك
ارحميها إذا جت من المدرسه ونست الهواش حق الصبح !!
ارحميها إنها حبتك وانتي قاسيه كيف لو كنتي حنونه مثل باقي الأمهات
بعدين عامليها كإنسانه أول شي مايحق لك تهينيها ولا تجرحين مشاعرها ,, اعتبريها أمانة عندك وهي كذلك .. حاولي تعتبرينها صديقة لك تكلمي معها شاوريها اجلسي معها تابعوا برنامج ع التلفزيون تكون تحبه .. اعرفي هواياتها وشاركيها في بعضها .. اكسبيها بدل مايكسبوها رفيقات السوء في المتوسط والثانوي ..
احضنيييييييها وأقسم بالله أن الحضن له دور كبيييير في توصيل المشاعر ,, وأثبتت الدراسات أنه ينقل شحنات كهربائة من الجسم لمن يحتضنه وهذا له تأثير إيجابي على العلاقه .. حاولي ماتنام وهي زعلانه وقبل ماتنام روحي غرفتها وسولفي معاها لو كلمتين وبوسيها واقري عليها المعوذات وآية الكرسي حسسيها انها مهمه عندك ..
خليها تساعدك في بعض المهام مثل تزيين الحلى ,, أو السلطه أو العصير ..
حسسيها بأنك انتي وياها شي مختلف لأنكم إناث مميزين عن باقي البيت وهذا شي حلو ..
شجعيها على الكتابة ,, كتابة مشاعرها يومياتها و اطلعي عليها بدون ماتدري وشوفي وش تفكر فيه وش مضايقها .. جيبي لها دفتر حلو مع قلمه من سيتي بلازا عندهم تشكيلات مغرية للكتابة ..
امدحيها قدام الناس في وجودها وقولي للناس عن إنجازاتها حتى لو كانت بسيطه ..
ولو بنتك حسيتي انها محتاجه لطبيب نفسي وانتي ابخص لاتترددين أبداً لأن الطبيب النفسي مو وحش يخوف ويعقد بالعكس هو مثل أي طبيب للجسد .. مع ان الروح تؤثر حتى على الجسد .. وديها لطبيبه أفضل مثل الدكتوره حنان عطاالله ,, بتساعدك وبتساعدها لأن المشكله عندكم الثنتين ,, أنتي في عدم تقبلك لها وقسوتك وهي بتصرفاتها ..
آآآآآآآسفه لو قسيت عليك ياغاليه لكن أقسم بالله اني رحمت هالبنت وحسيت بمشاعرها تماما ..
الله يحنن قلبك عليها ويهيدها ويجعلها قرة عينك ياااارب . .
وتذكري مابينفعك إذا كبرتي غيرها .. فأحسني الغرس ليطيب الثمر ..
بنتي يمكن انا اللي مرضتها ...والاحساس بالذنب قتلني..تكفون وش الحل؟؟/ قديم
متابعة النقاش، صفحة 45