قصة حقيقية

حكاية حقيقة

راح احكي لكم اليوم حكاية حقيقية ومن مصدر موثوق اللي هو أنا لأني أنا بطلة الحكاية قبل ما أبدأ في سرد تفاصيلها أقول لكم انها صحيحة مية بالمية وربي الشاهد علي بس أبي تعليقاتكم ع القصة ......:06:

أول ما تزوجت زوجي سكنت بالدور الثاني عند أهله وكان أخو زوجي وزوجته كمان ساكنين معي بالدور الثاني ليله من الليالي كان زوجي مسافر وانا كنت لوحدي طبعاً لسه ما عندي أولاد المهم كنت نايمة وفجأة حسيت ان فيه احد يراقبني,, تعرفون احساس لما الواحد يكون نايم بس حاس ان في واحد معه بالغرفه ,, المهم ناظرت لقيت شخص قزم ماسكك يد الباب ويناظر فيني يشبه شخصية من شخصيات لعبة فاينال فانتسي بالبلايستيشن اسمه فيفي بس هذا شكله مروع كان يناظرني وانا اناظره وما شال عينه مني وبعدين كأن من قال لي ارجعي نامي ,,
قمت الصبح وانا متأكده من اللي شفته أنه مو حلم بس مع ذلك ما خفت وما حكيت لأحد .. يوم من الأيام كنا أنا وزوجة أخو زوجي نطلع أكل للبسس برا البيت وجت أخت زوجي وقالت لنا لازم نسمي ونلبس الطرحة عشان المكان اللي نودي فيه الأكل مسكون بعدين انا تذكرت اللي حصل لي وقلت لها وانا اسرد القصة وقاعده اوصف شكله لأخت زوجي شوي وما شفت لكم زوجة اخو زوجي إلا وتصيح وكملت بقية الوصف نفسه انا بكيت من الخوف لأني ما قلت لأحد ويعني طلع اللي شفته حقيقي سألتها كيف عرفتي قالت حتى هي ليلة من الليالي كان زوجها بايت برا البيت كانت نايمة وقامت آخر الليل تبي دورة المياة :اكرمكم الله: ولما خرجت لقيته برا يستناها عند المغاسل ويناظر فيها تقول انا قعدت اقرأ المعوذات وآية الكرسي وبعدين راحت تنام ونفس حكايتي ما جاها خوف المهم مشت الأيام وكان أخو زوجي دايم يروح للمستشفيات من أقل شي يعني عنده وهم لدرجة انه ما كان يبي يتحمم يقول لا بأمرض وهو يشتغل مع تاجر التاجر هذا لقي اخو زوجي في ارضه نوع من انواع الاحجار الكريمة وقاله التاجر خذها حلالك ما علينا ,,,المهم ابو زوجي نفس الحكاية كان عنده كوابيس واحلام والجاثوم {جثام} كل ليلة يجيه ومشت الايام وصار عندي ولدين وبعدها اخو زوجي سكن هو وزوجته في بيتهم الجديد جا يوم يبي يصلي الفجر تفجأ بأن هذا اللي شفته انا وزوجته جالس بالمجلس ويناظر فيه بعدين صدقونا وراح لشيخ سأله الشيخ اشياء كثيرة وقرا عليه بعدين قاله انت معك شي مو لك وهذا الشي اللي مو لك صاحبنا اللي يراقبكم هو الحارس تبعه ؟؟؟ قال ما اذكر اني اخذت شي مو لي قال لا تذكر بعدين تذكر الاحجار الكريمة وحاول يرجعها مكانها بس المكان اللي اخذها منها محوط وصار مو ملكه يعني ملكية ناس ثاني بعدها بأيام جاه اتصال من واحد قال انت فلان بن فلان قال أي نعم قال سمعت ان معك احجار ما تبيها وانا بخلصك منها قال ايه خلاص وتقابلوا وعطاه وتخلص منها بس لما سألناه من هو اللي قابلك قال مدري كيف شكله ولا ايش سيارته كأن على عيوني غمام (اثاري الامانه رجعت لأهلها) المهم من بعدها لاشفنا كوابيس ولا توهم اخو زوجي بالمرض وابو زوجي نام تمام (لأن اول الاحجار كان اخو زوجي حاطها تحت سرير ابوه) وتوته توته خلصت الحتوته ......
هاه وش رايكم قسم بالله اني قلتها لكم زي ما صارت بالضبط ........
..:D [/CENTER
]

8 تعليق 995 مشاهدة

شاركي في النقاش

سجلي الدخول لإضافة تعليق.

التعليقات

6
  1. @mrsalkout

    وااااااااااااااااي لو انا اللي شايفته جان صار فيني سكتة..
    عفية عليج انج صبرتي..
    يسلمو على فلم الرعب اللي صار لج
    :)

تابعي تجارب أخرى من هذا القسم.