[رابطة] أصحاب العمليات الجراحية للتنحيف

عمرها الغالي ..

طبعا وزنك منزلش مش لان العملية منجحتش معاكي بل لانك منجحتيش مع العملية ..

بصي يابنتي مش هقعد اتفلسف عليكي واقولك كلام يزعلك لكن بما ان المثل عندنا بيقول يابخت من بكاني وبكي علي ولا ضحكني وضحك الناس علي فهقولك ان نجاح او فشل عمليات السمنة رهينه بالشخص نفسه يعني بالعربي ( نساعد من يساعد نفسه )

العملية بتشيل عنك جزء من اعباء الرجيم وهو الشعور بالجوع .. بقية الاجزاء عليك انتي .. يعني اي شخص بيعمل رجيم بياكل اكل مخصوص وبيحبه وكل شيء وبيديله طاقه تمكنه من ممارسة حياته لكن عقبته الوحيده بتكمن في ان اكل الرجيم غالبا مبيكفيش خاصه للجماعه الي اوزانهم كبيرة زي حالاتنا يعني معدتهم كبيرة فطبيعي ان حبة طماطم ولا حبة خيار مش هتشبعنا ابدا حتى لو كان معاها علبة زبادي .. بعد العملية نصف علبة زبادي ونصف حبات الطماطم والخيار تعتبر وجبة كاملة ومشبعه جدا بالنسبة لنا .. اي اكل زياده عن كده هيبقى بالمصري طفاسه وبالعربي شفاحة .. فهمتي علي ..

يعني الحزام او الدبابيس ايا كان نوع عمليتك هتساعدك انك متشعريش بالجوع لكن ملهاش علاقه ابدا بانها تقلل شهيتك بالعكس هتفضل زي ماهي .. ملهاش علاقه بانها تمنعك تتونسي بالاكل او تحطي حرتك فيه .. واكيد مش مسؤولة مطلقا لو شفتي اكل لذيذ وجريتي عليه رغم انك لسه واكله من شويه ومش محتاجه ابدا تدخلي معدتك شيء جديد ..

يعني دلوقت انتي انوي من الآن بدال ماتشيلي العملية وربنا يحاسبك على الي صرفتيه فيها بدون فائده والي عرضتي نفسك وحياتك فيه للخطر بدون نتيجه فانتي استخيري ثم انوي وابدئي من جديد خالص .. سجلي وزنك الي هتبدئي بيه وكأنك لسه عامله العملية النهرده .. شوفي لو بتحسي بالجوع بسرعه وبتاكلي كميات كبيرة بشكل عادي يبقى لازمك جلسة تضويق اعمليها في اسرع وقت ..

امنعي من حياتك كل شيء له علاقه بالسكريات او المكسرات او اي حاجه تفتح النفس .. يعني عيشي على اكلك العادي بس احذفي منه الرفاهية بكل اشكالها .. يبقى الاكل هيكون شيء من اللحوم شيء من الخضار شيء من الفواكة شيء من النشويات .. باي كمية تحبيها طالما انك قادرة على اكلها .. بس هتمنعي بقى في المقابل كل المشروبات المحلاة ايا كان نوعها .. الآيسكريم .. الشوكلاته .. اللب والسوداني .. المعجنات المسكرة زي الدونتس او الكرواسوون او او .. كل ده ممنوع نهائيا

مقليات كلي لو انك قادرة تاكلي .. بس في وجباتك بس يعني مش تكوني لسه متغدية وبعد شويه تروحي تاكلي بطاطس شيبس .. لاه ..

اعملي حركه باي طريقة كانت .. رياضه مشي اي شيء ان شاله حتى رقص .. اعملي اي شيء من دول غصب عنك حتى .. يعني محدش بيقولك استمتعي وانتي بتعمليه او كوني قادره ومبسوطه .. لاه اعمليه غصب حتى لو ملكيش مزاج هو في النهايه هيعود عليكي بفائده ..

كوني على ثقة مفيش ولا وحده من الي استفادوا من العملية استفادت صدفة او نزل وزنها بدون تضحية .. اطلاقا .. هاتي لي وحده كده ممرتش عليها لحظات كتير حرمت نفسها من عزيمه او تحسفت على صحن بتموت فيه وابعدته عشان متضعفش وتاكل منه او بصقت لقمة كانت خلاص على وشك تبلعها بس عشان ميزيدش وزنها ويروح كل الي عملته هدر .. شوفي الكل انحرم من اشياء كتير والكل ضحى وعلى قدر الحرمان والتضحية كانت النتائج يعني الي تعبت اكتر وحده هي الي نزلت اكتر وحده والي عاشت حياتها واكلت عادي والقت اللوم على الحلقة في النهايه هي للاسف الي خرجت خسرانة..

عندك فريقين اهوه فريق انحرم واستفاد وفريق معملش حاجه وقاعد يتحسب عل الي كان السبب .. وطبعا انتي حرة تقفي مع اي فريق فيهم ..