أنا عن نفسي وردة جوري أو رسالة من تأليف المرسلة مع دعوة صادقة وحبها للخير لي أغلى وأحلى هدية ..
ما أبغى هدية حلوة وغالية واللي جابتها بس ودها تتفشخر انها جابت واشترت وهي من داخل ودها تذبحني ولا تعاملها معي عادي ومو ذاك الزود..
لأن الهدية بمعناها مو بقيمتها , وعن هداياي وسط لا غالي ولا رخيص . مع ان اغلب اللي ردوا يشوفونها رخييصة .
بس لا نكذب على نفسنا ونسوي فيها اهل عز ودلال واحنا اغلب الشعب السعودي من ذوي الدخل المحدود والدنيا غلا ونار..
والحقيقة مرة وحدة فقط جتني هدية اعتبرتها غااالية وحزنت على اللي جابوها وقعدت اقول ياحليلهم خافوا اشره عليهم وكلفوا على نفسهما , مع ان سعرها في أقصى تقدير ما يتجاوز 1200 ريال وأتوقع انها اقل ..
عز الله لو بفكر زيكم كان انتحرت من زمان ,,,
مع اني والحمد لله أقدر أجيب احلى هدايا لكن ليش أكلف على الناس دامهم ممكن يفكرون زيكم ويشيلون هم هديتهم لي لو صار عندي مناسبة وكأن الحكاية سلف ودين ..
اسمها هدية والمبدأ تهادوا تحابوا.. مو أجيب لك غالي بس عشان تهديني غالي أتفشخر فيه قدام زوجي وأهلي ويشبع غروري :eek:
يعني لو جابت لي وحدة باقة ورد مرتبة ب 50 ريال وحطت لي فيها بطاقة كاتبة فيها كلام حلو أو بيت شعر بقول هديتها مالها داعي ورخيصة!!!
ولو وحدة جابت لي خاتم ذهب في أي مناسبة بقول لو ارتاحت أحسن !!!:o
والله حتى اللي تجيب لي عطر ما يتجاوز سعره ثلاثين ريال وريحته حلوة ومن قلب صافي انه يعني لي كثثثثثيييييييير وأذكرها بهديتها دايم و لا أقول إلا عطر فلانة وأتعطر منه وأنا كلي فخر وسعادة انها افتكرتني بهدية وتعزني من قلبها مو من جيبها ..
يابنات العلاقات الإنسانية أكبر من أننا نقيسها بالفلوس ,, والوحدة مالها حق تزعل إلا لو شافت ان اللي اهدتها جابت لها شي رخيص ومنتف أو مستعمل أو جديد وباين انه مخزن عندها من سنين من الهدايا اللي جاتها وتقوم تهدي الباقين غيرك هدايا بشي وشويات ومرتبة وفخمة .. هنا بتعرفي ان الهدية تكشف لك عن عدم معزتها وتقديرها لك وانها جابتها ( سد حلق وتسكيته)
أما لو هي تعتبر الهدية بمعناها ورمزها للوفاء والمعزة والمحبة فما لك حق تزعلين ولو زعلتي فمعناها انك تبغين كل الناس تفكر وتتصرف زيك وهذا مو منطقي ..
لأن في ناس يكون عندهم ضائقة مالية وقت مناسبتك ولا يحبون يبينون وفي نفس الوقت يستحون يجونك بيد فاضية فيجيبون شي مو من عادتهم وكثر الله خيرهم ..
ومو شرط ان الموظفة تهدي هدية غالية وفخمة لأن كثير منهم زوجها ما يوديها السوق أو ما يخليها تشتري اللي نفسها فيه كهدية لأحبابها وتتفشل هي من الناس بسبب زوجها وأهلها حتى لو كان لبسها وبيتها كشخة لأني أعرف كثثثير من الرجال اللي يكرهون هدايا الحريم ويحسونها نقص عقل وبالبركة يوافق يخلي حرمته تشتري وأي كلام بعد .. فليش تلومونهم على شي مالهم دخل فيه..
هذي وجهة نظري واللي بتضحك ولا ما بيعجبها عادي لأني بطبعي احب البساطة وأكره التكلف كره العمى ونفسي علاقاتنا تكون مبنية على الصفاء والمحبة الحقيقية مو على بكم جبتي لي وايش اشتريتي لي ومن وين ..
غنيه وأحب الهديه!!
متابعة النقاش، صفحة 19