جروب حتى لا نفقد أزواجنا

هو دة المطلوب و نايس جابت من الاخر اوعي تقولي لة عشان ما يحبطكيش

و الله يا نايس يا حبيبتي انا مش عارفة لية مش بقتنع بالموضوع دة حاسة انة فرقعة

اصل ربنا خالقنا كلنا يعني المفروض بناكل كل الاكل اللي ربنا خلقة الموضوع

دة بقى مشوش على تفكيري حاسة انة فية شيء غلط

بس مش عارفة اية هوه على العموم مدام انت جربتية و كان كويس

يالله كملي فية بقة و ربنا يعينك و يعيننا و انا كدة على ما أعتقد

ان جسمي من النوع التناسلي

لقيت المقالة الفكاهية دي فقلت انقلها لكم

السمين و الطبيب و الريجيم

"طب ما تكتب ده فى مقاله، أكيد فيه ناس تانيه مروا بنفس المشكله و مش لاقيين حل لها"

دى كانت نصيحه من صديق لى لما قعدت اهرج معاه على دكاترة الريجيم و النصائح الكليشيه اللى كلنا، أعضاء نقابة مطرح ما يسرى يمرى، بنسمعها و بنعتبرها نوع من الخيال العلمى الغير منطقى.


حكايتى من الأول إنى بطبيعتى شخص رياضى، مارست كل انواع الرياضات الحيه، فيما عدا كرة السرعه لأن فقعها كان حيحولنى لصينية عجه. و ظللت امارس الإسكواش و كرة القدم بإنتظام لحد ما إبتديت حياتى العمليه......أن أن أأأأأأن.

ساعتها نتيجه لضغط الشغل و مواعيد العمل الغير أدميه، و ظروف مرور بلدنا المنيله، قلت الفرص المتاحه للرياضه و أصبحت مواعيد الأكل و نوعياته بالضبط كما جاءت فى كتاب "ليه مالناش زلومه؟" لدار نشر خرز البقر الشهيره.

يعنى وقت الغدا بيبقى دليفرى على عنوانى الدائم فى الشغل، و لما أرجع البيت أدّب الوجبه الأساسيه بكل ما فيها من تقليه، ثم اتخمد انام تنفيذاً للمثل الشهير: "نام بعد كل أكله، حتفضل الدهون فى جتتك ترعى".

المهم بدأت ملحمة دكاترة الريجيم بعد ما مر شكل جسمى بمرحلة القله ثم اخيراً توقف عند شكل الزير. رحت الأول للمشهور د.فاروق شاهين، بتاع 1/4 فرخه 1/3 كيلو كفته "مسوى او مشلوق" (هو بينطقها كده)..قعدت معاه سنه و نصف أخر إلتزام و كنت باخد معايا خيار و جزر فى علبه بلاستيك للشغل و أستحملت تريقة الزملا و قاومت ريحة ساندويتشات هارديز السخنه. خسيت فى اول 6 شهور 10 كيلو و السنه اللى بعدها 2 كيلو...و سبته لما إكتشفت إن زبائن العياده كثيرون و لكن الريجيم واحد.....و برضه بعد ما الدكتوره الحلوه اللى كانت بتوزن الزبون قبل ما يدخل له مشيت.

و بعدها جربت د.ناجى بطرس بتاع الإبر صينيه اللى جاهدت حتى اخفى أثارها من ودانى بكافة الطرق المخابراتيه، و بعدها جربت طريقة د. محمد أبو الغيط بتاع 3 أيام جزر و بعديهم 3 أيام خيار و لما تجوع إشرب ميه و يوم الجمعه لخبط و كل طماطمايه......و جربت غيرهم كتير، و لكن دايماً النتيجه واحده، خسسان اول كام شهر و بعدين ثبات ممل حتى أخر العمر، عمرى مع الطبيب طبعاً....جربت كل أنواع الريجيم: الكيميائى و الطبيعى و اللى بحساب الكالورى، و ما بقاش ناقص غير إنى أجرب ريجيم الشفط و السيليكون الفيديو كليبى.

المهم جه بعدها وقت إبتديت فيه عملى الخاص و كان برنامجى اليومى يسمح بتوفير ساعتان يومياً للرياضه، قمت فحّت نفسى لعب فى الجيم اللى إتعرفت فيه على صديقى صاحب المقوله اللى إبتديت بيها المقاله، و اللى كان فى نفس الوقت المسئول عن وضع برنامجى "الفحتى" و الغذائى.....و هو الحقيقه طلع بيفهم كتير و نجح فى خلال عام فى تخسيسى حوالى 45 كيلو (يعنى تقريباً خسيت أختى الصغيره).....ثم بدانا برنامج تثبيت للوزن.

بعدها طبعاً فرحت، و خصوصاً إنى بقيت ألاقى مقاساتى فى المحلات العاديه مش فى الخيّاميه، و إرتحت من نظرات الترزى و عينيه اللى كانت دايماً لاقيانى "لقيّه"، و إرتحت برضه من عذاب و إحراج لف شريط المتر حوالين البطن و الليّه.

بس شغلى الحمد لله كبر، و بقى بيتطلب وقت أكتر، و بالتالى اصبحت الرياضه تعتبر مكسبات طعم، بس الشغل ظل هو اللى بيوفر أساسيات الطعام...فبالتالى بدا الوزن فى الزياده من تانى....صحيح بشويش بس أنا عارف طبيعتى، تو ما أبدأ أزيد، مع الوقت مش حقدر أوقف زلومتى.

ساعتها لعنت الريجيمات و الجيمات، لأن الأولى مش بتاكل عيش معايا (لأن مافيش رجيم فيه عيش أصلاً) و التانيه مش مناسبنى مواعيدها و ضرورة الإلتزام بـ 3 مرات فى الإسبوع. و كمان لازم يصاحبها قواعد فى الأكل زى: ماتكلش كاربوهايدريت مع بروتين، يعنى إنسى وجبة الرز و الملوخيه و الفراخ..

ساعتها العند ولد فكره ريجيم جهنميه....و هو إنى أجرب طرق جديده ما دام القديمه بتخلينى أخد بالقديمه...قررت إنى أجرب شهر (مش خساره) ريجيم مطرقع فيه عكس كل القواعد المتبعه.....ماهى مادام طلعت خنقه معايا يبقى الإتجاه الآخر أكيد حيبقى هو السالك، زى كوبرى 6 أكتوبر كده...الإتجاه اللى إنت رايحه دايماً هو الزحمه..يبقى الحل إنك تغير نظامك و إتجاهك حتى لو كنت فاكر إنه مش حيوصلك، ما هو الإتجاه التانى كده كده بيعطلك.

ريجيم فيدو إفتكاس:


1) الإفطار

شاى بلبن او نسكافيه باللبن او من غير...إنت و ذوقك و إشتراطات تعميرة طاستك.

2) الغذاء

زى ما إنت عاوز...لحمه مع رز، كاربوهيديت مع رجل كرسى، أى خضار، سلطه لو عايز....المهم تقوم شبعان و متهنى و مبسوط.....و كمان ممكن تطلب ديليفرى فى بعض الأيام.....هو أحنا حنعيش كام مره، كومبو بيج تيستى لارج، بيتزا ستافت كراست، سوبر ستار هارديز....صاروخ من بتوع مؤمن مجهول المقادير...براحتك، شعار الغذاء هو "عيش اللحظه".

الحاجه الوحيده اللى تاخد بالك منها هو إنك تاكل كميات ادميه، و تراعى توافر كافة العناصر الغذائيه.....فقط لا غير، و فى نفس الوقت عمرك ما تقوم نصف بطن و تعتمد على إنك تشبع بخيار او فاكهه....دول زى البهارات، عمركم سمعتم عن حد إتغدى ساندوتش ملح..!!!

3) العشاء

ولا حاجه...سيبك من موضوع السلطه و الزبادى، حتجوع اكتر و حتتحسر على حالك اكتر و أكتر.

بس خلاص......و يوم فى الأسبوع لخبط زى ما إنت عاوز......زى ما إنت عاااااااااوز، إفطر و إتغدى و إتعشى يا ضنايا ده الأكل متعه....

النظريه الإفتكاسيه الغير علميه تركز أكثر على توافر الراحه النفسيه، خاصه و إن كل دكاترة الريجيم بيحطوا ريجيم لواحد مش بيحب الأكل، يعنى مش ذويييق...و بالتالى بنستحمله شويه و بعدين تحت إغراءات المسبك بننهار و ندفس.....و كمان بيقولوا لك "حاول تلعب رياضه مرتين فى الإسبوع"...لا يا شيخ، جديده دى..ما هو لو انا أقدر أنتظم كنت ليه جيتلك عيادتك..؟!!!!

ميزه ريجيم فيدو إفتكاس هو إنك، صديقى الدفـّاس، تقدر تستحمل الجوع شويه، لأنك عارف إن جائزتك وقت الغدا بعد ساعات قليله، و الجايزه الكبرى تستلمها اخر الإسبوع من غير 0900....مش عذاب 7 أيام و بعدين لخبطه فى وجبه واحده فقط أخر الإسبوع تتخن فيها كل اللى خسيته و تكتئب أكتر.

يعنى الريجيم ده لضعيفى الإراده...اللى شحن الإراده بتاعهم يقدر يصبرهم 4 او 5 ساعات فقط....و حتى العذاب ده بيبقى اول إسبوع إفتكاسى فقط و حله بيبقى بشرب مياه و عصير (غير محلى...أو محلى، دماغك) و ممكن كمان تشرب شاى او نيسكافيه بسكر دايت (يحبـّز، بس ما تشيلش فى نفسك)....بعد كده حتلاقوا إن بطنكم إتعودت على هذا النظام و كمان حتلاقوا إن الإمتناع تماماً عن الطعام أسهل بكثير جداً من أكل الجزر و الخيار.....و خصوصاً إنكم عارفين إنها ساعات قليله قبل الوليمه الكبيره.

نقطة نظام

أنا مجرب و لست طبيباً، و عارف إن العلم بيقول إنك لازم تفطر علشان الميتابوليزم يشتغل، و تاكل كل ساعتين تلاته لنفس السبب، و اللحمه مع الرز بتتحول لدهون و العشا بيقلل الجوع....إلخ. و بيقول لك ما توزنش نفسك كل يوم...لأ بقى إوزن نفسك كل ساعه، حتلاقى نفسك قبل الغدا خسيت و بعده تخنت، و قبل النوم خسيت تانى....و الصبح خسيت اكتر....إحساس رائع الصراحه إنك تشوف جسمك و هو عامل زى البالونه.....بس إنت بقيت بتعرف تتحكم فى درجة نفخها.

أى طبيب ممكن يقول إن رجيمى ده كلام فارغ و مضر.....بس القطنه ما بتكدبش يا دكتور. أنا بفضل هذا الريجيم، اللى عايش عليه بقالى 6 شهور، قدرت أخس 10 كيلو و حالتى النفسيه الغذائيه فى أقصاها، و فى أى خروجه مش بحس إنى إبن البطه السوده، لأنها بتبقى فى يوم اللخبطه أو وقت الوجبه اليوميه المفرحه......و مع مرور الوقت و إلتزامى بالنظام الصحراوى فى الإفطار و العشاء بقيت ممكن أطنش و أتعشى الخميس مع لخبطة الجمعه....شفتم الهنا !

و كمان بقيت بلعب رياضه بمزاج مش كعقاب، بلعب حين ما يسره مش يا نهار إسود لازم العب احسن ميعاد الدكتور بكره.....و كمان إتعلمت أأخر شويه الغدا (بعد تمرين) حتى أكسر فترات الليل الطويله بدون اكل.....و اخيراً بقيت أستطعم طعم الخيار اللذيذ فى بقى، و مابقيتش أحس إنه فرض و عامل زى الخابور المغرّى.

كل اللى بقوله إن اللى جرب كتير و يأس أكتر أو زهق و قرب ينتحر.....يجرب الريجيم ده إسبوعين، لو حسيتوا بدوخه و فرفره و الوزن زى ما هوَّ، يبقى معاكم دكاترة الريجيم و ربنا. أما لو خسيتوا، 2 كيلو على الأقل و تحدى، يبقى كملوا و ماتنسوش تدعوا لى فى كل صلاه.

فادى رمزى

أخصائى سمنة و اكلات بالسمنه

هههههههههههههه مقالة دمها خفيف جدا وخصوصا كتاب ( لية ملناش زلومة) ضحكتنى من قلبى

حبيبتى نايس وحبيبتى صدى بشكركم على ردودكم الجميلة وانا مش بقوله على حاجة بس هو عارف انى بخفف

هو موجود معانا على طول مش مسافر يعنى بس شغله طول اليوم ومش بيرجع الا بليل ووجبتنا الرئيسية العشا

وبيتضايق لما متعشاش معاه وعلشان كدا بتعمد يكون فيه شوربة خفيفة وسلطة اخد معلقتين شوربة واكل سلطة كثبر واحاول اخد زبادى والله المستعان