[رابطة] أصحاب العمليات الجراحية للتنحيف

اني ساكنه في بريطانيا حبيبتي بس ماقدرت اعملها هنا فقلت بعملها في مصر لاننا رايحين مصر في الصيفيه وابغى اعملها في مصر او اي دوله عربيه تكون اسعارها كويسه وبنفس الوقت الدكتور يكون متمكن

في مصر ما اقدر افيدك انا ساكنه في دبي و مسويا عمليتي في مستشفى بالهول الاوربي-دبي و دكتوري كثير ممتاز وطيوب على فكره هو بريطاني من اصل عراقي و عيلته عايشه في بريطانيا و ينزل كل شهر اسبوع على بريطانيا يشوف عيلته بس ما بعرف اذا كان له عياده هناك كمان مش عارفه لو هالمعلومه بتفيدك او لا!!!!

حياتي عدن ..

لو عاوزه تعملي ربط اعمليها في مكان غير مصر مش مشهورة عندنا اوي وبتكلف كتير زيها زي برا .. لو هتعملي تدبيس هتكون ارخص بالنسبة لك عن نفسي انا عامله تدبيس في مصر .. هتكلفك في حدود 10 - 12 الف ريال سعودي غير الاقامة والتذاكر طبعا معرفش من عندك لهناك تكلف كام اكيد انتي ادرى..

هتحتاجي تقعدي في مصر عشرين يوم على الاقل قبل ماتقدري تخرجي وتتحركي بطبيعية .. ده اكيد لو عملتيها جراحه زيي .. اما لو عملتيها منظار هتكلفك اكتر بس هتتعافي اسرع .. بصراحه معرفش مين بيعملها منظار بس بيني وبينك الي كان بيدور في ذهني قبل ماعمل جراحتي ان الي بيفتح ويشوف قدامه اكيد هيدبس اظبط من الي هيدخل كاميرا قد النمنمه عشان يدور بيها على حته يحط فيها الدبوس .. عرفش هل هو جهل مني ولا تخلف طبي بس ده الي كان مسيطر علي وقتها وبصراحه برضه حسيت اني ادفع خمسين ستين عشان عملية قد تنفع او تفشل فكرة لا تستحق التقليب في الدماغ .. معرفش ظروفك ايه لكن ده الي كان في بالي انا وقتها ..

بالنسبة لشفط الدهون انا مجربتش بنفسي حد معين لكن اعرف وحده بتقول بنتها عملت عند دكتور في القاهرة اسمه عادل نور الدين .. انا حفظت الاسم صم عشان لو بعد عشر سنين ربنا رضي علي وقدرت اشفط ابقى اروح له .. طبعا مازالت الاسرة كلها معارضة اني اخضع للجراحه تاني وانا نفسي معنديش اي نية لذلك في الوقت الي الحالي ولا السنتين تلاته الجايين بعد الي شفته لكن مين عارف مهو الواحد مبيفضلش على حاال ..

في وحده شفتها جسمها خرافي ماشاء الله قالوا لي عامله عملية في مصر عند الي موت سعاد نصر .. مين هو الله اعلم بس اكيد هو مشهور بس انا فاكره انه مستشفى الجولف وعلى فكره هي مستشفى نظيفة وكنت ناوية اشفط فيها زمان برضه بس الكلام ده من عشر سنين يعني كان لسه الواحد فيه حماقة الشباب وعنده استعداد يغامر لكن سبحان الله في الاربع سنين الاخيره بدأت الحماسة تقل وفي السنة الاخيرة انمسحت مسح ..

بالنسبة لك مش هينفع تشفطي او تشدي قبل مرور ثلاث سنوات على عمليتك اي كان نوعها .. يعني متفكريش من دلوقت في شفط خاصه لو بتفكري في حمل او انجاب .. انزلي وزنك كله الاول بعدين اعملي تصليح جدار بطن .. انا اعرف دكتور مدحته لي دكتورة النساء الي كنت بتابع معاها في اخر حملي وبتقول ممتاز وبياخذ 4 الاف في العملية اول عن آخر بس بصراحه مجربتوش ولا شفت شغله ولا حتى فاكره اسمه هو مكتوب عندي في دليل الهاتف لما تحبي تروحي له بعد سنتين ابقي فكريني ادور لك عليه ..

مقدرش انصحك بطبيب معين للمعده او الشفط لكن اؤكد لك على الاستخاره فسبحان الله ممكن تروحي لدكتور ممتاز بيعالج بنسبة 99 في المية ويطلع حظك بعد الشر الواحد في المية التعبان وممكن العكس تروحي لدكتور نص نص وتطلعي انتي من النص المحظوظ الي تنجح معاه العملية ويبقى تمام .. الاستخاره ثم الاستخاره ثم الاستخاره وان شاءا لله هيوفقك للصح ..

مهو انتي مقلتيش نوع عمليتك ايه وطولك كام ووزنك قبل العملية كان قد ايه عشان نقدر نفيدك ..

عن نفسي بدأت العملية بوزن 119 كيلو ونصف .. النصف قبل المية طبعا

في اول سنة نزلت ثلاثين كيلو .. خلي بالك احتجت سنة مش سبع شهور عشان انزلهم..

بعدين قعدت اكتر من ست شهور او سبعه عشان انزل العشرة كيلو التانيين .. يعني متستعجليش وزنك ماشي حاله على مااظن واحد وثلاثين كيلو في سبع شهور ممتاز ماشاء الله خاصه لو عمليتك مش تحوير ..

لو عمليتك تحوير ووزنك كبير يعني فوق المية وثلاثين مثلا يبقى قليل النزول بعض الشيء لكن مظنش ابدا انك كده اكيد نزلتي تحت المية ..

على كل حال لو انتي شايفه ان نزولك قليل فعملي مشي او رياضه هتفرق معاكي كتير جدا وعلى فكره برضه توقعي ثبات الوزن ..

يعني انا قعدت اعمل رجيم الشهر الي فات ثلاث اسابيع وانا داخله في مسابقة نزول الوزن ووزني ثابت مش راضي ينزل برغم الرجيم يأست ياس غير عادي لاني عملت كل مافي طاقتي ووزني ثابت مابين 84-85 .. المه اعلنت انسحابي من المسابقة وانكتمت وسكت

سبحان الله فجأه وفي خلال اسبوع لاحظت اني بدخل الحمام اكرمكم الله كتير .. توقعت ان جسمي كان مخزن ماء والله اعلم بالسبب .. في خلال اربع خمس ايام كان وزني نازل للـ 82 .. مفاجاة مش كده؟

الحمد لله طبعا مصدقتش نفسي لاني انذبحت ثلاث اسابيع من الرجيم وحاسه اني بخس وبنحف لكن مش باين على الميزان غير الصعود في الآخر سلمت امري لله وبطلت رجيم فطلعت الحكايه كلها سوائل ..

المهم انتي اصبري واهم حاجه اعملي الي عليك ولاززم تتعبي يعني لازم تحرمي نفسك شويه وتتعبي في الحركه والمشي شويه وفي النهايه هتشوفي نتيجه تستحق .. دعواتك لي بقى اني انزل من الثمانين لانها طولت وبوخت اوي بقالي فيها اكتر من ست شهور زي ماقلت لك ونفسي بقى اشوف السبعينات بيقولوا هناك الجو ايه ..