مشاكلي المزمنة مع اهل زوجي

السلام عليكم ورحمة الله وبركاته
[أخواتي حابة استشيركم في مشكلتي واخذ آراءكم في حكايتي
انا قبل كدة عرضت مشكلتي مع زوجي الي من بداية زواجنا يهددني بالطلاق في أي مشكلة تتعلق بأهله..هو عنده ثلاثة أخوات بيعتبرهم بدل أمه المتوفاة وهو اتربى يتيم الاب وأمه توفت وهو بالجامعة..الحاصل انه من أول يوم في حياتي مع هذا الرجل وهم يحاولوا يفرضوا وجودهم في حياتنا لدرجة انهم تدخلوا في الموضوع الخاص الي بين الزوجين وما وقفوا اتصالات لأخوهم لمدة خمسة أيام لحد ما جاهم الخبر اليقين ايش رايكم بصراحة في دا التصرف ,يعني انا اسمع في أمهات ممكن يحبو يسألو ويطمنوا بس بصراحة مو أخوات, وبهذي الطريقة السمجة, وياريت جات على قد كذة ؟بس تلاقيني اسمع من ناس أجانب عن ليلة دخلتي وكيف اني قلبت الفندق على راسي واني كنت وقحة في ردي على اخته لما اتصلت تنصحني وطبعا هذي كلها افتراءات انا ماراح اتخيل اني ممكن اسامحهم عليها في يوم من الايام,الحاصل تدخلاتهم استمرت على مدى الاعوام وأمثلة على تدخلاتهم انهم جلسو ينتقدوني في شهر العسل لما سافرت في عدة امور خاصة لايتسع المجال لذكرها,ويحاولو يأذوني بالكلام الصريح وبالتلميح في اي فرصة يلاقوها,انتقدوني في طبخي وادارة شؤون بيتي في اول مرة يجوني فيها واشتغلو تعليقات سخيفة وانا باذوب في داخلي مو قادرة ارد عليهم احتراما لوجودهم في بيتي ,تدخلوا في موضوع تأخر حملي وجلسوا يفترضوا افتراضات سخيفة وصلت لدرجة انهم يقولو نفكروا مابينام معاكي,ولما حملت وولدت تدخلوا في موضوع سابع الولد وكانوا يبغو يسووه على مزاجهم وفي المكان الي هم يحددوه لا ونزلوا عندي وانا توني مخلصة الاربعين واشتغلت اضيفهم وانفخلهم واطبخلهم حتى زوجي ما مداه يحط يده عليا وانا غايبة عنه اربعين يوم .المهم استمر مسلسل التدخلات وخصوصا خلال اجازة زوجي الي معتقدين انها من حقهم هم والمفروض اننا نتفرغ لتماشيهم او استقبالهم او حتى مشاكلهم الخاصة مع ازواجهم يدخلوا زوجي فيها وهو مافي يده شي يعمله لأنه اصغر منهم وازواجهم تقريبا مربينه ولهم عليه افضال ,وما يستفيدو الا انهم ينكدوا عيشته وهو ماله غيري يفرغ غضبه وزعله فيا وفي اولاده,الي قاهرني انه اخواته متزوجات وعايشات حياتهم وانا زوجي شغله بعيد عني وما يجيني الا يومين في الاسبوع,ولما استنى الاجازة عشان نتفرغ لبعض ونخلص من ضغط العمل الاقي ضغوطاتهم هم ,ولما اعترض او اشكيله عن اي تصرف ضايقني يصيح ويعصب ويقول هم بدل امي وانا ابيعك عشانهم؟ رغم انه بعض المواقف تحصل قدامه والغلط يكون راكبهم بس لايمكن يغلطهم وانا دايما المخطأة في نظره حتى تطاول بناتهم الصغار الي لسه ما اتزوجوا يحصلها مبررات ويلومني انا.مع انه تطاول مباشر وصريح في بعض الاحيان بس هم ابدا مايشوفوا اخطاءهم.المهم مرت السنين من مشكلة لاخرى لحد ما وصلت لدرجة اني انفجرت واتكلمت عليه وسبيت اخته لاول مرة من يوم اتزوجته ,طبعا هو مستحيل يمشي الموضوع بالساهل وهدد بالطلاق بعدين تركني معلقة خمسة شهور رغم اني اعتذرت لاخته رغم اني اتكلمت عليها في غيابها بس هو زي عادته يعطيهم كل مشاكلنا بالتفصيل. واعتذرت له ورميت نفسي عند باب الشقة الي منعني من دخولها بس مشي من عندي من غير ما يطل فيا ولا يعبرني .
المهم اهلي لما اتفاقمت المشكلة حلفو اني ما ارجعله الا بشروط وبوجود حكام ورجال .طبعا هو في فترة الخمسة اشهر هو الي اتبهدل اكتر مني لاني رجعت بيتي الي هو في الاساس بيت ابوي وغيرت المفاتيح وانحرم منالاطفال الا مرة في الشهر .طبعا ربنا اخذ بحقي واعترف بأخطاءه وبانه ظلمني ووافق على شروطي الي كانت تتضمن انه ما يطالبني باي شي اتجاه اخواته ولا يدخلولي بيت ولا ادخلهم بيت ومالهم اي علاقة فيا هو يواصلهم براحته من غير تقصير في حقوقي وحقوق اولاده لكن ما يطالبني بشي ناحيتهم واذا حبيت اصلهم فهذا الموضوع يرجع لارادتي الحرة ومن غير اي ضغط وقت ما انا نفسي تطيب وانسى الي سووه فيا..بس معليه انا عارفة اني طولت عليكم بس ابغى رايكم بصراحة في المشاكل وفي شرطي وهل هو صحيح او لا ؟؟؟؟؟/RIGHT]

36 تعليق 3,819 مشاهدة

شاركي في النقاش

سجلي الدخول لإضافة تعليق.

التعليقات

33
  1. @am_alhloh_1

    الباب الييجيك منه الريح سده واستريح
    قرار صائب بس هذا ما يمنع اولادك يزورون عماتهم اما انتي حره ابعدي عنهم افضل
  2. @toyks_oshahy_1

    سبحان الله احس فيه ناس تدور المشاكل طالما ان كل وحده عندها زوج وشايله عمرها ليش ينكدون على اخوهم ياختي قرارك هذا هو عين العقل اساسا انتي مو ملزمه باخواته

تابعي تجارب أخرى من هذا القسم.