يومياتي في قراءة سورة البقرة.. وشو صار معاي

السلام عليكم ورحمة الله وبركــــــــــاته

ربيعتي خبرتني عن موضوع خطبتها وكيف انها حاسة انها غير متوفقة في الزواج ابدا مع انها لا ينقصها شي ابدا والحمدلله.. جمال وحسب واهل طيبين وشهادة ووظيفة وفلوس.. كل شي عندها والحمدلله وماشاء الله...

ولكــــــــــــــــــــــــــــن
محد يبى يتزوجها.. ويوم يتقدمون.. خلاص يختفون ولا يرجعون!!

كسرت خاطري والله.. حسيت اني بصيح عليها لاني من نفس حالتها للاسف..

سبحان الله والحمدلله.. اللهم لا اعتراض.. وانا لا اشكو الهم واعرف ان الزواج قسمة ونصيب وان شاء الله يكون نصيبي زين

المهم.. كانت وايد زعلانة وحزنت وقالت.. انا متأكدة ان فيني شي وحد مسوي لي سحر.. واهلها يبون يودونها عند المطوع.. الخ

سبحان الله اتذكرت اني قريت موضوع كم وحدة من الاخوات ان تيسرت امورها يوم قرت سورة البقرة..فلا اراديا قلت لها ليش ماتقرين سورة البقرة؟؟
واذا تبين .. حتى انا ببدأ معاج

وثاني يوم حصلت وحدة مطرشة لي ايميل بقصة وحدة وتجربتها في قراءة سورة البقرة وسويت لها فور وورد وقالت يبالي ابدأ.. وانا نفس الشي قلت بدال ما اروح عند المطاوعة والله اعلم اذا صدق مطاوعة.. بقرأ السورة لمدة 40 يوم

الحين قررت اني احط يومياتي باللي يصير معاي.. وبشو حسيت بعد ما قريت السورة

صراحة بديت ليلة الخميس.. كنت تعبانة لان شكلي بزكم.. بس بديت والحمدلله..
وقريت سورة البقرة.. ونمت.. حلمت اني اكل قطايف بالقشطة (حتى وانا راقدة ابا اكل..لول).. وحسيت بطعم القشطة,, وقلت في خاطري ياليتها كانت قطايف الجبنة (لاني احب قطايف الجبنة..لول)

ويوم قمت.. الحمدلله.. ما زكمت صح اني كنت بين البين بس ما طحت مريضة (الحمدلله)

ليلة الجمعة..حلمت ان امي فارشة سفرة عند الباب (امي تحب النور او الاضاءة الخارجية.. ماتحب اللمبات اللي داخل البيت.. ويوم كنا في بيتنا القديم كانت تفتح باب المجلس على مصراعيه عشان يدخل النور ونتغدى قريب الباب).. المهم..امي فرشت السفرة عند الباب وجمعت اليهال (عيال الفريج) عشان ياكلون معانا.. وييت انا وقلت اهووو شو ها مافي مكان هني.. خلاص انا باكل هناك في الميلس..

وجلست واختي الكبيرة مجابلتني (للعلم اختي الكبيرة حــامل) وخالتي جالسة على يميني (للعلم خالتي عايشة في دولة ثانية) وشفت عمري اكل بيتزا وشي ثاني..بس ما اذكر شو هو!!! (فجعانة بس همي الاكل..لول)

ليلة السبت
نمت والحمدلله نفسيتي كانت وايد هادية ومرتاحة .. (يالله ما احلى الراحة النفسية)
وحلمت بواحد في دوامي.. شعره كان مموج (مع انه في الطبيعة.. شعره سيدة) وحضني ( يعي) وكنت مبسوطة (ما صدقت حصلت حضن..لول) وقمت من الرقاد مستغربة بس هادية
ولين الحين يومي حلو ومافي اي مشاكل الحمدلله

الاحد: بداية الخير..ربحت جائزة حلوة.. وابدا ما كانت في بالي :)

اليوم خامس يوم.. الحين بروح أقرأ السورة وبكرة ان شاءالله يكتب لكم اذا حلمت بشي او صار شي معين معاي

بنات.. اللي حابة تبدأ معاي ومع ربيعتي وتحط لنا يوميا شو حست واذا حلمت بشي واذا شي صار معاها عشان نتشارك.. حياها اللـــــــــــــــــــه..
ومكنم نستفيد.. ولا تنسوني في الدعاء..

واشكر..كل وحدة من الاخوات اللي دعت لي في الحج عن ظهر الغيب... والله يجزيها الخير ويدخلها الجنة لانها ما نستني..

انتظرا تفاعلكم... وجزاكم الله خـــــــــــــــــــيراملاحظة: انا كل يوم بتم اعدل في الموضوع وبضيف شو صار معي يعني كل يوم بتحصلون سطر او سطرين زيادة في الموضوع..


ملاحظـــــــة مهمة ومفيدة: اللي تبى تقرأ القران في الدوام وهي فاضية او فيها الحلوة وماتروم تمسك المصحف وتبى تقرأ من النت
حصلت موقعين وايد حلوين وصراحة الله يجزي كل شخص اشتغل على هالموقعين الجنة ان شاءالله.. لانه صدق متعوب عليهم

1. http://quran.muslim-web.com
تقدرين تختارين القاريء.. وتقدرين تشوفي الصفحات مع التفسير مع خاصية الحفظ.. وااااايد حلو السايت

2. http://tanzil.info/
هذا السايت فيه اكثر من لغة.. العربية والانجليزية زالفارسية والهندية..ألخ وفيه ايضا التفسير واختيار الصفحة..ألخ بعد مفيد وحلو

انا ضفت السايتين للمفضلة عندي عشان ما اضيعهم... يعني الحين ما في عذر للتكاسل


ملاحظة: ليس القصد من الموضوع اشعال البدع مثل القراءة لاربعين يوم حتى يتحقق الشي اللي نبغيه.. القصد هو استشعار مدى عظم سورة البقرة وتأثيرها في نفسية الانسان.. وهذا الشعور اللي اريد احس فيه..الراحة النفسية لذلك ببدأ لاربعين يوم وان شاءالله يخبركم شو صار معاي