السلام عليكم ورحمة الله وبركاته
اشلونكم يابنات عساكم بخير..
اليوم حابة اقولكم قصتي لعلكم تتخذونها عظة وعبرة، قصتي يابنات تذكير للغافلات بأمور عديدة
مارح اطول عليكم ابي اسرد لكم قصتي اللي صارت لي اليوم انا وزوجي الغالي
اليوم الظهر نوينا نطلع نروح الاحساء نتسوق كعادتنا كنت ابي اتبضع وزوجي بعد كان يبي اغراض
المهم يابنات ان زوجي صار له كم يوم يشتكي من سيارته انها ترقل (تهتز) كان يقولي التواير فيهم شي وكل يوم يقول بروح للتشييك ومايروح على اساس انه بيشيكها لان ورانا سفرة للامارات بعد كم يوم.
المهم قال يالله وصلي العيال عند امج الساعة 12 بنطلع قلت اوكي ورحت وصلت اليهال وسلمت على امي يابنات واقسم لكم ان قلبي كان ناغزني انه في شي بيصير تعوذت من الشيطان ووساوسه
المهم لحد ماوصلنا حدود الدوحة نزلنا نصلي وعقبها راح زوجي السوبر ماركت وناطرته انا بالسيارة،واشوف عامل ينظف والله يابنات اطالعه وهو بعد يناظرني وانا اقول في قلبي اعطيه ولا لا (اقصد بيزاات) مو بخل يابنات لاوالله بالعكس بس انا شوي جبانة اخاف من الناس خصوصا اذا زوجي موموجود((انا عادة لازم اطلع بيزات قبل لااسافر او قبل اي شغلة عشان ربي يوفقني)) خفت اناديه ويشوفني زوجي ويهاوشني يقولي ليش تكلمينه ونفس الوقت ابي اعطيه بيزات من باب الصدقة ودف البلاء
والله بنات اناعادة يوم اشوفهم اذا حد معاي اعطيه واذا بروحي مااتشجع اخاف منهم احس بيسحب بيدي والا شي جذي
واخر شي قلت لا يبه خلني اعطيه دفعة بلاء عنا وعطيته بعد تردد دام 5 دقائق.
المهم حركنا ويوم مسكنا خط السعودية عاد انا زوجي المصون الله يحفظه لي من كل شر يسرع مووووووووووووت على باله بطل الراليات ههههههه>>>>تبي تخفف من وطئة الصدمة قامت تنكت لاتلومونها
تخيلو كان يسوق على سرعة 160 وكان باقي لنا نص ساعة عالهفوف الا واسمع صوت انفجار قووووووووووي وربي قوي يابنات وقامت السيارة تشوح وتطلع عن سيطرة ريلي وربي شفت الموت وشوي ندخل الطعوس والصدام انكسر والتاير تنتف والله كان شي لايصدق تخيلو على سرعة 160 يعني عادي السيارة تقلب بس سبحان الله لطف ان السيارة بس طلعت عن سيطرة زوجي ووقفت تمينا انا وزوجي نشوف بعض مصدومين والناس اللي ورانا مصدومين بس موقادرين يقفون تخيلو الجهة الامامية للسيارة انتهت
يقولي زوجي سبحان الله تدرين هالحركة عادي ان السيارة تقلب ونروح فيها بس اشلون وقفت مادري:44:
تدرون شنو اول شيئين جاو في بالي؟؟؟
**الصدقة :فعلا الصدقة تدفع البلاء وتطفئ غضب الرحمن
**الموت: اللي يجينا بدون سابق انذار فعلا الواحد مايعرف متى يجي يومه
والله ثم والله يابنات ان شريط كامل مر قدام عيني في غضون دقايق من اعمال زينة سويتها واعمال شينة وهل ربي راضي عني واذا مت على نطق الشهادة ولا لا اشيائ كثيرة كثيرة يابنات جات في بالي ماتصدقونها كلها بس في دقايق
اللي ابي اوصله ان الانسان لازم يذكر الموت،، ماذا اعددنا لاخرتنا يابنات ماهو الزاد الذي نتخذه في رحلتنا للاخرة والله ولا شي غير اللهو تذكروا ان الموت حق علينا كلنا وكلنا بنموت بس اشلون بتكون خاتمتنا هنا الاهم
شي ثاني تصدقوا يابنات تصدقو في كل لحظة وكل وقت مارح تخسرون شي والله مارح تخسرون احنا نخسر على نفسنا الالاف ونستخسر على غيرنا ريال وماندري ان هالريال يمكن يكون سبب في انقاذنا من اشياء كثيرة وسبب في سعادتنا
واخيرا وليس اخرا انا مابي منكم لاتقييم ولاشي بس كل اللي ابيه ادعولنا انا وعيالي وزوجي بالثبات على هالدين وحسن الخاتمة والله يحفظنا في سفرنا ترى الدعاء لاخيك المسلم في ظهر الغيب مستجاب الله لايحرمني منكم ويحفظ لي بوعيالي وسندي وتاج راسي من كل شر
واشكركم انكم عطيتوني شوي من وقتكم :)
شاركي في النقاش
سجلي الدخول لإضافة تعليق.
التعليقات
130- الحمد الله على سلامتكم والله يبعد عنكم كل شر يارب
- الحمد للة على السلامة
- الحمد الله علي السلامه واللهم ياسميع ياعليم انك تحفضها وتحفظ لها زوجها وعيالها ياالله
- الحمد لله على سلامتكم والله يثبتكم على دينه وطاعته ويريكم الحق حقا ويرزقكم اتباعه الباطل باطل ويرزقكم اجتنابه ويصلح لكم ذريتكم
- الحمد لله على سلامتكم قصتك مفجعه والله يباعد بايام الشر ولابد اننا نتصدق فعلا ونستغفر ونركض لفعل الطاعات لان الانسان يفرح اذا رائ صحيفته مليانه بالاعمال الحسنه فلنسرع والموت اقرب من حبل الوريد وعسى الله يرحمنا ويغفر لنا وللمسلمين والمسلمات الاحياء منهم والاموات
والله يثبت زوجك وعيالك ويرزقك برهم
مواضيع مشابهة
تابعي تجارب أخرى من هذا القسم.