تسهيل الشغل في رمضان / متجدد شاركينا

اللهم بارك لنا في رجب وشعباااان وبلغنا رمضااااان



سبحااااان الله وبحمده
سبحااان الله العظيم


لاحول ولا قوة الا بالله

الله يجزاكم خير الجزاء على الموضوع المهم في الوقت الأهم
أنا عن نفسي أخذت الطريقة من الوالدة الله يحفظها لنا وطبقوها خواتي والحمد لله النتائج رائعة
من 15 شعبان أبدأ العمل بشراء كيس بصل كبير وطماطم وخضار وورقيات مثل شبت وبقدونس
! / أقطع البصل في قطاعة الخضار وكذلك الطماطم وبعدين أحمسها زين وأحط معها الثوم والبهارات ومعجون الطماطم لحد ماتتسبك وأتركها لما تبرد ثم أوزعها في أكياس بلاستيك صغيرة كل كيس يكفيني يوم.

2 / أغسل البقدونس والشبت كل واحد لوحده بعدين أفرمهم وأفرشهم بكيس بلاستيك وأجمدهم .

3 / أغسل الجزر وأبشرة وأفرشة بكيس بلاستيك وأجمدة للحشوات .

4 / أقطع الخضار كوسة وفاصوليا وبطاطس قطع صغار وأوزعهم في أكياس صغيرة تكفي ليوم تصلح لشوربة الخضار والحشوات.

5 / أجيب رقائق السمبوسة الجاهزة وأحشيها بالحشوات اللي أبغاها بعدين أحطها في صينية كبيرة بالفريزر وأغطيها بالقصدير لحد ماتجمد ثم أصفها في علبة بلاستيك كبيرة وبين كل طبقتين أحط كيس نايلون حق اللحم أقصة على كبرالعلبة وكل حشوة في علبة وأكتب عليها علشان ما أخربط بينهم .

6 / أصلح أصابع الجبنة بالرقائق وأفرزنة نفس طريقة السمبوسة للمنتو الكذاب .


7/ أجيب التوست وأعمل كودو التوست اللي في كتاب أم عبد العزيز أفرد التوست وأبقسمطه وأفرزنة وفي رمضان أقلية وأحشيه .


وفي رمضان الله يبلغناه وإياكم جدولي:

أنام الساعة 6 الصباح وأقوم الظهر أصلي وأقرأ قرآن وأفطر عيالي
الساعه ثلاث أعجن العجينة اللي أبغى وبعد صلاة العصر أدخل وأسوي الحشوة الحمدلله كل شي جاهز الكشنة والخضاروالبقدونس والجزر كله مفرزن .
وأسوي الشوربة و القهوة والشاي والعصيرات وأطلع التمر.
أطلع السمبوسه وعلى الفرن طوالي أو الزيت.
أحط صينيتين صينية للفطور الأول وثانية للفطور الثاني وأحط عليها كل أغراضها ومواعينها.
أخلص قبل المغرب تقريبا بنص ساعة أجيب لعيالي شي ياكلونة وأتابع برنامج ذكرى على المجد صراحة يأثر فيني ذاك البرنامج ثم قبل الأذان بعشر دقايق أحط سفرتنا .
نفطر ونتفرج على البرامج إلى العشاء أقوم لمطبخي أغسل مواعينة وأظفة وأسوي العشاء في نفس الوقت وإذا خلصت بديت أصلي العشاء والتراويح ويرجع زوجي من المسجد يجلس يتابع الحرم وينتبه للبزارين علشان أصلي وأنا مرتاحة.
بعد العشاء ألتفت لشغل البيت كنس وغسيل ملابس وكوي وغيرة ووقت السحور أسوي السحور ونتسحر وأغسل المواعين وبعد الفجر أنام.
هذا جدولي في رمضان وأحس إني الحمد لله مترتبة.
في رمضان ممنوع جرايد تدخل البيت وممنوع انترنت .

من بداية شعبان أحاول أنظف البيت صح وأبعد عني الخرابيط اللي ما أحتاجها وأخلي جوه إيماني مثلا البطاقات اللي عن رمضان في النت أختار كذاوحدة وأطبعها وأغلفها ومن بداية شعبان أحطها تعطي جو حلو وفرصة للواحديحاسب نفسة.
أدخل السوق قبل رمضان وأخلص مشاري العيد كلها طبعا بصهوبة ألفى أشغالي بس أحاول أخلصها وأزين توزيعات العيدوأغلفها وأرفعها وأغطيها عن الغباروأحضر لإحتفال العيد وأجيب الأدوات الخاصة من بالونات وغيرها .
وبكذا في رمضان ما أشيل هم المقاضي ولا العيد.
الله يبلغنا وإياكم شهر رمضان ويجعلنا من صوامة وقوامة ومن المغفور لهم
آآآآآآآآآآآآآآآآآآآآآآآآآآآآآآآمييييييييييييييييييييييييييييييييييييييييييييييين

والله حبيبتي مو بدري توكلي على الله وأبأي حملة تنظيف وفرزنه كنت زيك في يوم من الايام

وما راحت الي والفريزر مليان ما شاء الله لبعد رمضان كمان وزي الفل ما صار له شي

سلام ياحلويين تصدقون كل ما دخلت هالموضوع تحمست لرمضان
الله يبلغناه على خير والمسلمين جميعا.
بس عندي سؤال جزاكم الله خير فيه بعض المواد اللي تفرزونها
لها مدة انتهاء سريعه مثل عندنا التوست صلاحيته ثلاثة ايام
والسمبوسك اتصور 10 او14يوم بالكثير
كيف افرزنهم طوال شهر رمضان؟ مع الشكر لجميع المشاركات.