شاركي في النقاش

سجلي الدخول لإضافة تعليق.

التعليقات

1,551
  1. رمال انت مخاصمنى مش رديتى عليا وكمان مش سلمتى عليا لما سلمتى على البنات كلهم؟؟؟؟؟؟؟؟؟؟؟؟؟
  2. muslima627
    إزيكم يا بنانيت عاملين إيه معلش مش عارفه أطمنكم عليه أنا يوم الخميس الساعه إتنين بالليل جالي طلق جامد ونزل عليه سوائل غريبه رحت رايحه المستشفى جري ودخلت الطوارىء هناك عملولي اللازم كله وقالوليلي إن ده طلق كاذب والسوائل ده بسبب الربط مش …
    يا خبر يا حبيبتى الف سلامة عليكى .. معلش اتحملى شويه لحد بكرة وان شاء الله تحددى معاد العمليه وتخلصى بقه من الوجع ده انا مجربة قبلك يا قلبى .. بس انا برده هقوللك حاجه .. ان الطلق الكاذب ده مش ممكن يكون فى شدة الطلق الطبيعى .. لانه لو كان فى شدتو كان زمانك على اخرك دلوقتى ومكنتيش هتبقى ساكته وكان زمان البيبى لا قدر الله تعب منك لان البيبى بيتعب من الطلق اكيد ومن انقباض الرحم وانبساطة .. مش ممكن يكون طلق طبيعى ابدا هو اكيد وجع متعب بس مش طلق .. اطمئنى وما تقلقيش وريحى نفسك ارجوكى على الاخر واجرى بكرة على الدكتور يا قلبى
    ربنا يطمننا عليكى يا مسلمة يارب وتقومى بألف سلامة
  3. أم اياد 2009
    بنات انا جيبت نتيجة التحاليل النهاردة وحاسة انها ملخبطة شوية بصو انا حاقولكو النتيجة وانتو تقولو رايكو LH 11 FSH 9 والبرولاكتين 34.5 عارفين انا فرحانه ان في لخبطة في الهرمونات عشان اقدر اعرف انا حتعالج ازاي بدل ما انا كنت حامشي في سكة غ…
    ام اياد ازيك يا حبيبتى .. كويس انك جبتى لنا النتيجة .. بصى يا حبيبتى هرد عليكى نقطة بنقطة
    اولا ..
    طبعا انتى عملتى التحليل فى معمل المختبر .. عايزين نتفق على ان طالما عملناه هناك يبقى نعتمد النتيجة دى وما نشككش فيها ابدا ونسلم بإنها نتيجة سليمة ومظبوطة
    ثانيا
    انتى وزى ما قولتى ان فى لخبطة فى الهرمونات والحمدلله اننا عرفنا فين المشكله علشان نبدأ ناخد خطواتنا الصح .. وعلى فكرة انا مكنتش مقتنعه بكلام الدكتور بتاعك اللى قاللك ان الانيميا هى اللى مأخرة الحمل .. لان فى ناس كتير جدا عندهم انيميا مزمنة وبيحملوا زى الفل طبيعى فا الانيميا مكانتش سبب رئيسى فى تأخر حملك يا ام اياد بس كنت مستنيه اشوف نتيجة تحاليلك علشان اشوف تخمينى صح ولا لا
    فا انا اتأكدت دلوقتى ان انتى كنتى محتاجة بس تعملى التحليل ده من زمان فى معمل كويس علشان تتعالجى والحمدلله انك عملتيه وعرفنا المشكله فين .. واضح من التحليل ان فى تكيس لان زى مانتى عارفه ال ال اتش لازم يبقى نص الاف اس اتش وده مش موجود فى تحليلك .. علشان كده انتى محتاجة علاج وزى مانتى عارفه انه موضوع بسيط اوى اوى اوى ومحتاج منك تتابعى مع دكتور كويس بالاضافة الى التزام بس بالعلاج وانك تخسسى روحك شويه حتى لو مكنتيش محتاجه تخسى
    ثالثا .. البرولاكتيييييييييييييييييين
    البرولاكتين قبل ما يكون لبن فى الصدر فا هو هرمون وارد انه يعلى او يوطى ومالهوش اى اعراض تعرفك انه عالى ومش لازم تشوفى افرازات بتنزل علشان تعرفى ان كان فى او لا.. وعلاجة بسيط جدااااا .. انا كان عندى الهرمون عالى برده واخدت علاج وشهر ولا شهرين والدنيا بقت تمام عندى ومكنتش بحس بأى اعراض فى صدرى يعنى كنت زيك بالظبط وفوجئت بالتحليل بردة ..
    انتى نسبتك مش عاليه اوى وان شاء الله فى وقت قصير يرجع الهرمون لمستواه الطبيعى ما تقلقيش .. بس حكايه الاعراض .. انسيها تماما لان التحليل قدامك بيتكلم لوحده ..
    بس انا عايزاكى تختارى طبيب كويس عندك ياام اياد وتاخدى خطوة سريعه طالما عرفنا فين المشكله يالا ابدأى علاج واكسبى وقت يا حبيبتى .. وانا فرحانة اوى اوى لانك خلاص قربتى من حلمك يا ام اياد .. بمجرد ما عرفنا فين المشكله حلينا نصفها .. وربنا يكرمك يا قلبى
  4. oshy2005
    يابنات انا رحت للدكتور النهاردة وكشف عليا بالسونار وقالى الحمد لله كل شئ تمام وخلصت وسالته على السفر وقالى سافرى وقبل ما اخرج بقولهه ربط عنق الرحم مهم لاقيته بيقول اه نعمله نعمله مش عارفة ليه حسيت ان الموضوع تجارى لو كان قالى وقت السونار…
    اوشى حبيبتى انتى حبيبة قلبى وربنا يعلم بعزك قد ايه .. انا مش زعلانه منك يا قلبى ولا حاجه .. انا حتى لسه مش سلمت على باقى البنات يس انا بشوف البنات اللى عندهم احداث وبرد عليهم الاول .. وعموما انا بسلم عليكى وببوسك كمان موووووا .. وكنت لسه جايه لك فى الكلام
    انا لسه شايفه مشاركتك دى دلوقتى ... مالك رابكة روحك ليه يا بنتى
    الموضوع بسيط .. عادى احيانا الدكاترة بينسوا حاجات ولما بتقوليها قدامهم بيفتكروها معذورين مفيش مشاكل
    فا قصه انك حسيتى انه بيتكلم من منطلق تجارى دى مش تهمنا لان اللى يهمنا مصلحتنا اولا واخيرا وخلينا نبص الاول الربط ده هينفعنا ولا لا وانا مع انك تعملى ربط بصراحة لاسباب كتير
    اولها ان الحمل ده جه بعد صبر وتعب وعمليه وخلافه ومش عايزين نخسرة تحت اى ظرف .. ومش بقوللك ده علشان تقلقى لا اى حمل فى الدنيا معرض فى اى وقت انه لا قدر الله يتحرك من مكانه خصوصا فى الشهور المتقدمة

    ثانيا ان انتى حامل ماشاء الله اللهم بارك يارب فى توأم وده يخلينا نبقى متوقعين مفاجآت ويخلينا نكون حريصين بزيادة علية

    ثالثا انتى هتسافرى دلوقتى وكمان احتمال قبل الولادة ترجعى علشان تولدى والسفر فى حد ذاته بردة اجهاد عليكى ولازم نكون واخدين احتياطاتنا كويس

    رابعا بقه ان انتى هتبقى لوحدك لما تسافرى ومش معقول هتفضلى نايمه طول الشهور الجاية على ظهرك لا هتضطرى تقومى وتعملى كل حاجه فا نعمل الربط احسن علشان ما يكونش فى اى قلق من الحركة

    خامسا بقه .. ان عمليه الربط دى بسيطة اوى وسهله خالص وهتحافظ على بيبيهاتك لحد معاد الولادة القيصرى
    يعنى لو لاقدر الله حصل طلق بدرى الربط ده هيحافظ على الحمل لحد ما تكونى رحتى للدكتور بتاعك وعملل لك القيصرى ... ومسلمة عاملاها ومفيش مشاكل تقدرى تسأليها عليها وتطمئنى .. وانا لو مكانك يا اوشى كنت عملته بدون تردد اطلاقا ..
    علشان كل اللى فات ده انا بطلب منك طلب .. استخيرى كويس جدا جدا جدا جدا .. واللى ترتاحى له اعملية بعد ما تستشيرى دكتور عادل طبعا لانه مرجعنا الاساسى واستشارته هتفيدنا كتير جدا
  5. @am_ayad_2009

    رمـــــال
    ام اياد ازيك يا حبيبتى .. كويس انك جبتى لنا النتيجة .. بصى يا حبيبتى هرد عليكى نقطة بنقطة اولا .. طبعا انتى عملتى التحليل فى معمل المختبر .. عايزين نتفق على ان طالما عملناه هناك يبقى نعتمد النتيجة دى وما نشككش فيها ابدا ونسلم بإنها نتيجة…
    ريمو ازيك يا جميل وحشاني مشاركاتك اللي زي العسل والله
    بصي يا حبيبتي انا متفقة معاكي في الكلام الجميل اللي انتي قلتيه
    بس ما عادا حكاية اني اخس دي المفروض تقوليلي اتخني شويتين لان انا محتاجة ازيد حوالي 15 كيلو عشان اوصل لاقل من الوزن الطبيعي
    وبعدين انا الدكتور مش قالي ان الانيميا بتمنع الحمل هو كان حيعملي حقن مجهري فلما شاف كدة قالي انه ممكن يحصل حمل بس مش حيستمر لان نسبة الهيموجلبين قليلة جدا بس كدة
    مش عارفة ليه انا حاسة اني متوترة من ساعة ما جبت نتيجة التحليل جايز لاني مش متوقعة انو يطلع عندى حاجة
    لاني عشت سنين وسنين اوهم نفسي اني زي الفل يلا حسيب الله ونعم الوكيل في الدكاترة اللي مش بتهتم بالمرضى
    يعني لازم احنا اللي ندور على نفسنا ونقرا كتير عن حالتنا
    بس ارجع واقول الحمد لله اني لحقت نفسي قبل ما كنت ادخل في دوامة الحقن المجهري والله انا دلوقتي عرفت ان ربنا بيحبني قوي
    لان سبحان الله كل ما كنت انوي اعمل الحقن كانت تحصل حاجة تمنعني اول مرة ظهر موضوع الانيميا وتاني مرة حصل موضوع عائلي غير متوقع منعني تماما اني اعمل حاجة
    واخيرا اديني اكتشفت لخبطة الهرمونات
    الحمد لله ان ربنا راضي عني وانا عندي امل كبيييييييييييير ان ربنا حيكرمني في يوم من الايام انا وكل البنات

تابعي تجارب أخرى من هذا القسم.