ابي طريقة كبسة الربيان الله يعافيكم يا اخواتي

هلا اختي
كبسة الربيان من افضل الاكلات الي احبها ودايم اسويها لان زوجي واولادي كمان يحبوها
بس انا اعملها بدون مقادير راح اقول لك على الطريقه والمقادير راح تكون تقريبيه والمقادير هذي تكفي لثلاث اشخاص
المقادير
2بصل متوسط الحجم مقطع مكعبات
2فص ثوم مقطع قطع صغيرة
2 طماطم متوسط الحجم مقطع مربعات
1 حبة فليفلة خضرة مقطعه مكعبات
1 جزرة مبشورة
ربع كيلو ربيان طازج مقشر ومنضف
2 كوب رز بسمتي منقوع في ماء لمدة ساعة
قبضة من الخضار المشكلة المجمدة
1 حبة بطاطس مقشرة ومقطعة مكعبات
بهارات مطحونة
بهارات كاملة(ليمون ناشف اسود - دارسين-فلفل اسود-هيل)
ملح حسب الرغبة
كمية من الماء

الطريقة
تحمسي البصل مع الثوم في قدرفيه قليل من الزيت على حراره عالية لحد مايصير لونه اشقر بس يكون لونه غامق عشان يعطي لون للكبسة
بعدها تضيفي الربيان وتحركيه معاه لحد مايصير لونه وردي بعدها تضيفي الفليفلة وتكملي تحريك لحد مايذبل الفليفلة شوي بعدها تضيفي الطماطم وتخففي الحرارة وتغطي القدر لحد مايذوب الطماطم ..
بعدين ترجعي تحركيهم وتضيفي لهم البهارات المطحونة وتضيفي الماء تقريبا الكمية لكل كوب رز كوب ونص ماء..
بعد ماتضيفين الماء تحطي البهارات الصحيحة مثل( الهيل والفلفل الاسود والليمون الناشف والدارسين) والملح طبعاً وبعدين نضيف الجزرة المبشورة والبطاطس والخضار المجمدة..
واول مايغلي غلوة وحدة على طول نضيف الرز ونخليه على حرارة عاليه واذا قرب ينشف الماء نخفف الحرارة ليما تصير حرارة خفيفة مرة ويفضل تحطين صينية ستيل تحت القدر عشان لايلصق الرز بالقدر ..
بعد فترة تقريباً نص ساعة تشوفين الرز ان كان نضج تكون الكبسة جاهزة للتقديم على طووول
ان شاءالله الطريقة مضمونة مية بالمية لان هذي الي معتمدتها من قبل حتى لااتزوج..
اذا سويتيها واعجبتك ادعي لي

تحياتي

http://forum.hawaaworld.com/showthread.php?t=328106ا

السلام عليكم مشكورين اخواتي على الاهتمام
انين الجراح لو ما احط خضار مو احسن و بعدين الربيان مع الطبخ ما راح يذبل معي يعني يستوي بزيادة
اشراقة امل الله يعافيك على الروابط

هلا حبيبتي
اذا ماتبين تحطين خضار مجمدة عادي تقدرين تستغنين عنه بس انا قلت لك على كل شي اضيفه
للكبسة عشان اكون نقلتها لك بامانة
اما الربيان لاتخافين ابداً انا اسويه مثل ماقلت لك ولامرة صار فيه شي دايماً يطلع مضبوط مع الرز
لانه ماراح ياخذ سوى الا مع الطماطم والرز والباقي بيكون على نار عاليه يعني مجرد تحمير خارجي فقط
اتمنى اكون وضحت لك الفكرة
جربي وان شاءالله بتدعي لي

الله يعافيك يا انين الجراح ماقصرتي والله راح اجربها وادعيلك