طريق الامل ( خبرات متبادلة حول مراكز العقم فى مصر ) الجزء الثامن

متقوليش كده يا قلبى.....إحنا أخوات و انا تحت أمرك....
و بعدين عادي....أنا كنت أكثر واحدة جهلا بكل الأمور ديه...و لو عرفتى مدي الجهل بتاعى هتفطسى على روحك من الضحك...لكن هنعمل إيه الحوجة و الخوف من اللخبطة خلوا الواحد عامل زي الدودة فى البحث ...و مبينامش إلا لما يجيب قرار الموضوع...

المهم....سيبك من الكلام اللى قالته صاحبتك.....بالنسبة للميتفورمين....يفضل اننا ناخده قبل التنشيط على الاقل بشهرين.....و نفضل مستمرين عليه لحين حدوث حمل....يعنى نستمر عليه مع التنشيط و لما يحصل حمل نفضل برده ناخده لحين رؤية نبض الجنين.....و كمان فيه دكاترة بينصحوا بالاستمرار عليه لمده أطول فى الحمل للوقاية من الاصابة بسكر الحمل....

و أي سؤال احنا كلنا تحت أمرك يا حبيبتى....بس انا حاسة انك قلوقة زياده عن اللزوم...و ده مش كويس يا قلبى....دوري على اصل المعلومة...و لما تطمنى توكلى على الله و نفذي و متقلقييش نفسك كتير...لأانك هتكونى عملتى اللى عليكى و الباقى ده بتاع ربنا.....و ربنا يا حبيبتى يهديكى لكل اللى فيه الخير

ياه ما شاء الله رفعه كده بتانى شهر

ده ممتاز فعلا

لا مش قلقوه بس تايهه و بعدين الموضوع ده كله ما كانش على بالى و ما كنتش اعرف اى معلومات عنه خالص

و الدكاترة لو الواحد مش عارف معلومات كويسه بيسيبوه كده مش فاهم حاجة و بيتريقوا كمان اننا بنقرا عل النت بيقولوا النت ده عامل مشاكل و لخبطة بالمعلومات
بس بصراحه يا اشتقت معلوماتك متكامله و انتى كمان مجربة ده بيخلينى افهم ايه الطريق اللى هامشى فيه و اسال الدكتور عن ايه بالضبط

كان دكتورمحمد المليجى قبل ما اعمل التحاليل من سنتين قالى اخذ سيدوفاج لانه قالى يمكن يكون فى تكيس و التحاليل هى اللى تثبت بس ما اخذتوش قلت لما اوريه التحاليل و لما وريتها له قثالى ما فيش تكيس و لا حاجة رغم انه التحاليل وقتها كانت عجيبه شوية كان ال lh 3.9
fsh 4.2
بس برضه قالى مفيش اى مشاكل و ما علقش على البروجسترون و بس كده حكيت قصه حياتى

و الله انا عملت التحاليل دى من فترة يعنى من اسبوعين تقريبا بس ما رضيتش اشغلكم معايا علشان ما اتقلش عليكم

بس برده فيه حاجة يا قمر....
إن مسألة الاستجابة ديه شئ نسبى و بتختلف من جسم لجسم...و حتى للشخص الواحد بتختلف من وقت للتانى....
علشان كده باقولك احنا بس نعمل اللى علينا و نسيب الرزق ده لربنا....

و أديكى شفتى أنا اول فترة علاج الدنيا ظبطت معايا هوا....و اللى حيرنى انى بعد الإجهاض لما خسيت و التزمت بالعلاج و خدت تنشيط بجرعات عالية كمان ربنا مأرادش لسه إنه يإذن بالحمل...و كان اللى محيرنى انجسمى ده هو نفس الجسم اللى استجاب للعلاج بسرعة فى الأول....ليه دلوقتى و بعد تظبيط الأمور مش عايز يستجيب كويس.....

لكن فعلا اولا و أخيرا إحنا ماعلينا سوي السعى....أما إدراك الرزق فهو بيد الله وحده سبحانه و تعالى...توكلى على الله و اعملى اللى عليكى و سيبى النتيجة على ربنا و هو مش هيخذلك أبدا