كل من تسال عن بالون المعده تجربه شخصيه انا عملت العمليه وشوفوا الاعراض والنتائج/ قديم

مساكم الله بالخير يا بنات
انا قبل سنه ونصف سويت هذي العمليه في مركز النخبه الطبي الجراحي بالرياض سواها لي الدكتور ب11000 حدعشر اللف ريال
طبعا مع الادويه والمغذي كلفتني حوالي 13000 ريال تعبت شفت الموت لما حطيتها حتى اهلي تعبو نفسيا مني
الاسبوع الاول كنت اخذ سوائل بس ونزلت 7 كيلو اول ماسويتها كان وزني 102 تقريبا
الاسبوع الثاني حاولت اكل لو شي بسيط والله يكرمكم ماقدرت صرت ارجع عالعموم انا ما استفدت منها ذيك الفايده اللي تذكر مانزل وزني لاقي من 86 تصورو بعد هالتعب يعني لازلت سمينه لا وبعد لما تجين تشيلينها ياخذون منك 1500 يعني قمة الاستغلال صراحة وهالكيلوات ما امداني اجلس سنه الا ورجعت لوزني السابق لانك بعدها تحسين براحه بعد ماتشيلينها
والله انها تسوي عذاب نفسي غثيان وحالتك حاله حتى المناسبات تكرهينها كانك تتوحمين وبالنهايه معدتك ماتصغر ولا شي لما يشيلها الدكتور تتوسع وترجع مثل ماكانت ومتحصلين الا الام بالقولون وتصيرين حساسه جدا معدتك ماتتحمل شي والله اني ندمت على هالخساير اشد الندم وقلت ليتني سويت دايت وسويت بهالفلوس بعد كذا عملية شفط وشد ابركلي من هالحوسه
والله يشهد على كلامي انا مابي الا مصلحتكم مافيه مثل الدايت هو اللي ينحف او عمليات مضمونه مثل عملية السليف (قص المعده ) او التحزيم او التدبيس هذي للاوزان فوق الميه
اذا كنتو اقل من كذا اتبعو دايت احسن لكم واي استفسار ارسلولي على الخاص والله ينحفنا جميعا بالصحه والعافيه ويبعد عنكم الشر قولو آمين

اب

ياربي...كل ماتحمست اسويها ...اسمع شي يخوفني..والله خلاص بنفجر من الحيره...

رفع