اولا : انا كتبت مباشرة بدون تنسيق للموضوع
فمعذرة ان كانت الافكار غير مترابطة
ثانيا: ادخل بالموضوع..
(بشكل عام)
لاحظت اثناء قراءتي لمواضيع متفرقة
جمل تتردد كثير الي هو موضوع الزوجه الاولى هي الاساس وانها ماتنلام لو سوت الي تسويه
والثانية مالها حق باي شي وهي الي طابة عليها وتتحمل ماجاها
وانها سارقة الزوج من زوجته الاولى ( ياحرام)
الصراحة استغرب هالتفكير
باي حق تكون الاولى لها صلاحيات ماتكون للثانية
(هو الشرع قاله؟)
الشرع يقول الثنتين عند رجال ولكل منهم حياة مثل جارتها تمام مافيه فاضل ومفضول
هذا شي...
الشي الثاني ( الثانية سارقة الرجال ؟)
هو الي طق باب بيت اهلها وطلبها على سنة الله ورسولة وهي قبلت فيه كزوج..
واذا كنت بنمشي على مبدأ انها سراقة الزوج
يعني السالفة سالفة سرقة
فالأولى سارقة الرجال من امه
واحيانا نسمع عن حريم نكلوا في ام الزوج
وبعدين تقولين الزوجه الثانية ليش تقبل؟!!!!
مو اذا ماقبلت منيره بتقبل حصه ولا سلوى ولا سمر
يعني الثانية على راسك يا الاولى على راسك لان زوجك الي يبي يعرس عليك
يعني ان فيها زعل ..ازعلي عليه مو عليها
مع انه المفروض ماتعارضين قضاء الله وقدرة
وان كنت تغارين فاطلبي الله الصبر ويذهب عنك الغيرة ويشغلك بطاعته
الجارة صحيح مو سهلة بسبب كيد النسوان وبسبب ميلان الزوج للثانية في البداية
وهنا انا ما الوم الاولى في قهرها
و الشرع ماله ذنب
الذنب هنا ذنب الرجل( والرجال اسم الله عليه..يعرف يعدد ابو الشباب ويقول هذي سنه وتلاقونه يعرف كل الاحاديث في التعدد الضعيف منها والصحيح"يعني ينافس الالباني ماشاء الله
ولما يجي الواجب الي هو العدل" ماعندك احد"
المهم نرجع لصلب الموضوع
وبعدين لو فكرنا بطريقة تلقائية...( يا الاولى اذا زوجك اعرس عليك ودور غيرك تغارين عليه؟ تشوفين انه يستاهل غيرتك؟؟؟؟)
ماتشوفين معي لو انه ظالمك وساحب عليك انك تهتمين بنفسك وصحتك وعلاقاتك وزياراتك واطفالك وتتركينه لين يعقل ويراجع حساباته؟؟
وبامانه وخليكم حقانيات( هل الاولى دايما مظلومة والثانية مجرمة ؟؟؟)
وكمان اسمع جملة ( بعد ما اخذ عمرها وضاعت سنين شبابها معه)!!!
طيب هو ما قضى شبابه وضاع معها ؟؟
ولا( عمره مكانك راوح)
والي تقول ( لايمكن اخذ واحد متزوج واني استحقر الي تتزوج متزوج)
يا اختي اتقى الله
الله بيبلاك او يبلى بناتك واحمد الله ان الله ماحدك على هالشي
اتقوا الله ياحريم
انت ضامنة ان زوجك مايعرس عليك؟
ولا انت يا الأولى ضامنة ماتكونين في يوم من الايام ثانية؟
انا عارفه ان الحين الي بتقرأ كلامي بتقول اني زوجة ثانية
انا جربت كلا الحالتين ورأيي هو هو
وبالنسبة لي وهذا رأيي الشخصي:وجدت ان التعدد مع مخافة الزوج وصلاح الزوجتين شي في صالحي انا كزوجة اولى او ثانية
لي يوم اشوف نفسي وعيالي اروح اتمشى اتسدح اتصنفر اكلم
ويجي اليوم الثاني وانت مستعدة للجهاد
"زوجك "لاني بصراحة
احب اعيش من عمري ايام لي ولعيالي
طبعا هذا رأيي الشخصي
ارجو ما اكون ضايقتكم بالكلام او زعلت الاولى
والله يعطي الانسان على قد مخافته وارتباطه به
اشغلنا انفسنا بالتافه عن المهم
الله لا يشغلنا الا في طاعته
...........
على فكرة ..
بعض الكاتبات في هالمنتدى تعجبني ارائهم ياليت يتحفوني برأيهم بالموضوع
واحب النقاش بالعقل
....
ههههه
الحين بهالموضوع بنقش كل العضوات الي ازواجهم معرسين عليهم " من ردودهم" بس ياليت بالعقل نتكلم وبطريقة منطقية
عموما يعطيكم العافية جميعا
الموضوع مغلق