امانى 61

الاسم غريب ويمكن يكون جديد بالنسبه ليا اول مره اجرب وكانت النتيجه رائعه ندخل على التفاصيل
المكونات
نص كيلو كنافه- 3 معالق زبده- ومعلقة زيت- وكوب لبن مركز
الحشو
علبة لبنة بينار 200جم
كيسين كريم شانتيه
كوب عصير منجا فريش بااااارد جدا
نص كوب سكر
معلقة جيلاتين مدوبه فى ربع كوب ميه دافيه
واحداية منجا مقطعه مكعبات
الطريقه
فى صنيه نحمر الكنافه بالزبده لحد ما لونها يبقى ذهبى
وبعد ما نطفى عليها نضيف كوب اللبن المركز ونقلب الكنافه لحد ما تتجانس وتتماسك مع بعض
نجيب الصينيه بتاعة التشيز كيك ونحط طبقة الكنافه ونضغط بايدين ونعلى من الجناب ونساوى السطح والجناب بادينا كويس
بعدكده نحط الصينيه فى التلاجه عشان تتماسك الكنافه كويس
فى الوقت ده نحضر الحشو فى الاول
نضرب الكريم شانتيه بعصير المنجا اللى يكون بارد جدا متلج ونضرب لحد ما تعلى الكريمه نقوم ضايفين اللبنه والسكر والجيلاتين المدوبه ونضرب لحد ما تختلط المكونات
نقوم ضايفين قطع المنجا او ممكن نحطها بين الحشو يعنى نحط طبقه كريمه وبعدين قطع المنجا وبعدين طبقه تانيه من الكريمه
المهم نطلع الصينيه ونحط الكريمه وقطع المنجا وندخل الصينيه الفريز عشان الكريمه تجمد نقوم مجهزين الطبقه العلويه الاختياريه
هتكون بالنسبه ليكى يعنى زى ما تحبى يا ما تتكتفى بقطع منجا على الوش او تعملى زى ما عملت تدوبى جيلى منجا فى نص كمية الميه المخصصه ليه عشان يطلع طبقه تقيله يعنى الكيس عليه كوب ميه سخنه تحركيه وتستنى اما يبرد شويه واما تجمد طبقة الكريمه تطلعى الصينيه وتصبى طبقة الجيلى فوق الكريمه
انا عملت طبقه رقيقه جدا يا دوب كده لو عايزينها طبقه عاليه زودو الكميه يعنى كيسين جيلى منجا عليهم اتنين كوب ميه سخنه وتدخلى الصينيه تانى الفريزر لحد ما تتماسك طبقة الجيلى وبس
تزينى الوش بقطع منجا انا قطعتها بمعلقه الخاصه بالكانتلوب والبطيخ والفاكهه فادتنى شكل كور جميله اوى وبس كده تقدميها لحابيبك وبالف هنا وشفا وطبعا فى الحر والصيف وبعد الفطار فى رمضان بتبقى عز الطلب لازم تجربوها وباذن الله تعجبكم يا بنات













