السلام عليكم
اخواتي الفاضلات
ترددت كثيرا قبل ان اكتب موضوعي هذا
لاني مالي احد غير الله ثم انتم
حتى اني سجلت باسم جديد لاكتب معاناتي
اخواتي انا تزوجت وانا صغيرة كان عمري19
وحملت على طول وبعد نفاسي حملت للمرة الثانية على طول
طبعا هذا كله لرغبة زوجي ولانه دايم يردد ويقول انا ماتزوجتك الا عشان العيال
وكنت دايم اعاني معاه لان هو بعد صغير تزوجني وعمره 20
ودايم يسافر ويروح للبحرين ودبي ويروح للخرابيط وكل مرة يرجع فيها يروح يسوي تحليل من الايدز
وانا كنت اشوف ومرة اسكت ومرة احاول اكلمه ومرة اشكي لاهلي عليه لعل وعسى يتعدل
وهو ولاهمه ودايم احصل رسايل في جواله من بنات واذا واجهته ينكر اشد الانكار
انا كنت ادعي ربي يهديه ويعقل
واهلي كل ماشكيتلهم يقولون ادعيله هو توه صغير وبيعقل
والمصيبة انه يكلم متزوجات وفجأة يجي مستعجل يقول جهزي شنطتي اقوله ليش يقول اسكتي مو من حقك تحققين معي
اجهزها وانا ساكتة يسافر ويرجع بعد يومين او ثلاث ويرجع يتأسف ويقول كنت مواعد اخوياي في الشرقية
ولما افتح جواله اشوف رسايله مع خويته متزوجة وزوجها مسافر وتبيه يجيها قبل مايرجع زوجها
والله يابنات اني كنت اقرا واتعذب واموت في اليوم مليون مرة ولاحد داري عني
انا الحمدالله مو ناقصني شي
والحمدالله كل من يشوفني يمدحني
الا هو مايشوف فيني شي
ودايم يشوفني مقصرة
مع اني ساعات من كثر ما اشتغل وانظف وبعدين اروح اتصلح له قبل مايجي والله مايجي الليل الا وانا دايخة من التعب اقول يمكن يبين في عينه بس ابد ماحولي احد
انا وقتها للاسف كانت علاقتي في ربي مو قوية
وكنت استغفر الله اذا تضايقت شغلت اغنية وسمعتها
الله المستعان
صارتلي معاه مشاكل كثير
من اكبرها انه جاب شغالة اهله اندنوسية للبيت واستغفلني ووداني بيت اهلي
بس ربي فضحه
كرهته من بعدها وماكنت ابغى ارجعله بس هو كلم اهلي وقالهم انه تاب وانه تغير ومن هالكلام
انا قلت دامه تاب هذا اهم شي وبيني وبينه عيال
رجعتله ولقيته زي ماهو وبالعكس تمادى اكثر
ويسافر بالشهور بعذر انه ياخذ لغة وابوه يصرف علينا
وكنت اشوف صور يحطها في الفيس بوك وهو حاضن بنات ويشيش معاهم
واذا كلمته يسويلي مشاكل اني ادخل النت فصرت اسكت
واتبعت معاه اسلوب التطنيييييش واشوف واطنش واذا مرة ماقدرت اطنش ادخل غرفة ابكي لحالي واطلع كل الي فيني وانزل وانا ابتسم وماكأن فيني شي<<صرت زي المجنونة
المهم وقتها ما ادري وش صار فيني
ابليس حصل له طريق
وتعرفت على واحد وصرت اكلمه
لاتستغربون
وحدة علاقتها في ربها ضعيفة
وزوجها مو فاكر فيها ولاهي مع الشقر والسمر
ويسافر شهوووور ولايكلم ولايسأل وابوه يصرف علينا
وكل يوم صورة مع وحدة ومايمديه يرجع الا ويسافر على طول
الله يتوب علي
المهم اني كلمته فترة وبعدين سبحان الله كشفني اخو زوجي واخذ جوالي واتصل على اهلي وعلمهم
وصارتلي فضيحة وقتها
والحمدالله من بعدها انقلبت 180 درجة
صرت انسانة ثاااااانية
مو خوف من احد
بس خوفي كان من ربي لجأت له وتبت توبة صادقة وحافظت على صلاتي وصرت اقوم الليل وحالي تغير عن قبل
المهم زوجي رجع من برى وطبعا استقبلوه اخوانه وعلموه باللي صار
وصارو كل فترة يجون ياخذون العيال كم يوم وبعدين يرجعونهم
لين قبل شهر خذوهم ولين الحين مارجعوهم
انا قلبي متقطع على عيالي
مدري وش اسوي
تعرفون صعبة اتصل اسأل عنهم
كلمت ابوي وراح ابوي اتصل عليه
تخيلو قام ينافخ على ابوي ويقول بيحط جدول بيننا وبينهم!!!
ويقول انه يبي يطلقني بس بعد مايتزوج علي!!!
والله يابنات انه استانست وابغاه يطلقني
لاني احس نفسي خلاص كرهته
من بعد سالفة الشغالة وانا احس اقرف منه
وقتها ماكنت ابين واحاول اضغط على نفسي
بس الحين خلاص دامها جات منه خليه يطلق
والحمدالله ربي رزقني بأمه الله يسعدها ذيك الانسانة
على كثر مايسوي فيني ولدها بس ماعمري بنسى افضالها علي وهي تحب عيالي وتمووووت فيهم
والي مريحني انها تخاف عليهم اكثر من عيالها
وتقول لوتزوج ولدها مابتخلي وحدة غريبة تربي عياله هي بنفسها بتربيهم
والحين يابنات انا واهلي خايفين
نبغى نطالب بالعيال بس خايفين من هالبزر يعاند وكمان خايفين انه يروح يفضحني عند جماعتنا
لانه الحين يعاند في موضوع الطلاق
وساعات يقول والله ما اطلقها وبخليها معلقة طول عمرها
وساعات يقول اذا تزوجت غيرها طلقتها
بنات انا خايفة والشي الوحيد الي مريحني ان ابوي واقف معي
على الرغم من اني سودت وجهه بفعلتي
لكن الحمدالله لما شاف توبتي صادقة وقف معي
ووقف في وجه اعمامي
ولو احد بيتكلم علي يوقف في وجهه
الله يحفظه ويطول بعمره
بنات الله يخليكم دلوني وش اسوي
خايفة نطالب بطلاق او حضانة ويقوم يفضحني
مع انه اخوانه قالو لاهلي حنا بنستر عليها عشان العيال واذا احد سألنا عن سبب الطلاق بنقول ما اتفقو
الله يجزاهم خير ماقصرو بس انا خايفة من ولدهم لانه عليه حركات وينخاف منه
حتى ابوي متضايق ويقول مصيرنا ومصير العيال انحط بين يدين واحد سفيه
ادري طولت عليكم
بس مالي الا الله ثم انتم
والي ماعندها حل لي يكفيني ترفع يدها وتقول يارب استر عليها ولاتحرمها من عيالها
ويارب عسى كل من تدعيلي ان الله يفرج همها ويسخر لها زوجها ويرزقها الذرية الصالحة
الموضوع مغلق