سلام يا خوله كيفك ؟؟
في البدايه ماعرفت هو انك تبينه يصير رومنسي معك ؟؟ولا صريح معك ؟؟ولا يسمع لشورك ويشاورك في اموره ؟؟
وبعدين اللي اعرفه ان الوحده كل ما تطول علاقتها بزوجها تزداد الموده بس ممكن تكون بالفعل اكثر من الكلام بالنسبه للرجل ..
والصراحه هذي ما تكون عند الرجال كلهم لان بعضهم يحبون يكونون غامضين مع حريمهم لارضاء رجولته وخلاص زوجك تعود يكون كذا ويمكن انتي عودتيه لان اهل مصر يقولون : زوجك على ما تعوديه وابنك على ما تربيه
بالنسبه لكلامك يوم تقولين انك طيبه وعلى نياتك وتحبين الخير وصادقه فانا مثلك واردى وللاسف الناس فهموني غلط وتصدقين انهم يعتبرون اللي كذا انها يا ساذجه وصحيحة عقل او نجسه تخبي ورى هالطيبه بلاوي
واما كلام الناس اللي ما ينسى .. اااااااااخ انا زيك لي فتره ماانام الليل من كلام جاني من ناس مضطره اقابلهم دايم واجاملهم واعزمهم على حساب نفسيتي ..
وياليت كلامهم صح .. لاوالله مظلومه بس الغيره والحسد والبغض يسوي الهوايل
فصرت احقرهم لان الحقران يقطع المصران .. واذا قابلتهم اضطر اقرط على لساني يعني مااستعجل الكلام لا اوزنه قبل اقوله واحاول تكون اجاباتي بــــــــ مدري
وكل ما شافوني اخاف الله ولا اجيب سيرة احد بالشينه وادافع عن الناس اللي هم يتكلمون فيهم انبطت كبودهم قهر لان اللي يقول لك يقول عليك
سؤال : ايش المثاليه اللي تبحثين عنها ؟؟
وليش تقلقين بشأن تصرفاتك ؟؟
وضحي ...
وما شاءالله زوجك مواصفاته مثاليه وش تبين بعد..
والديون مافي احد خالي منها الكل مديون حاولي توصلين له هالفكره ..وياليتك انتي وياه تقولون دعاء الدين في كل صلاة
وانا عارفه ان الدين يسبب ازمه نفسيه للرجل مجربه والله بس تعاوني معه واقتصدي وساعديه علشان يتجاوز هالمحنه
وبعدين هو مو كتوم زي ماقلتي لانك تقولين انه يقول لي فيما معناه ان الحب فعل مو كلام
والحركات اللي في المنتدى والله تجيب نتيجه مع الزوج وتغير فيه اشياء للاحسن لازم من كسر الروتين
وهو قال لك انتي مره اقصى اليمين ومره العكس طيب اسأليه ليش قال كذا وين الخطأ بس يكون بأسلوب حلو وهو رايق طبعا
وطاري السحر لا تجيبينه له لان فيه ناس دايم يفشلون في مشاريعهم لانهم يدخلون في اشياء ماهم عارفينها زين يعني ماهم قدها خليه يستخير قبل لايقدم على شيء
وتعالي له من الناحيه الدينيه وكوني قدوه له ولاطفالك والناس
لاننا اذا بعدنا عن منهجنا الاسلامي كثرت مشاكلنا
وبالنسبه لفارق السن انا زوجي اكبر مني بتسع سنين وعادي احس انه كبر وهو نفس الشيء ..لاننا تعودنا نكون اصدقاء قبل مانكون ازواج
هذا والله المستعان
بسرعه قبل فوات الاوان ........انصحوني الله يصلحكن 00000
متابعة النقاش، صفحة 2