بقولك شي محد يبي من احد شي
بقولك عن نفسي انا ساكنة مع حمولتي بس اني
اتعامل معهم بما يرضي الله يعني انزل يوميا عشان يشوفون ولدهم اللي هو ولدي
احاول اكون خفيفة نفس يعني مالقيت البنات اروح اجيب القهوة واتقهوى مع خالتي وخالي او اصب القهوة ان كانت موجودة ممكن يوم اسوي العشاء يوم اسوي شي مع القهوة او مرة انزل الضحى واسوي الغدا او الفطور
يعني مو كل الاسبوع يعيني مثلا مرة في الاسبوع او مرتين هالاطباق
اذا جوهم ضيوف سويت معي شي اذا كان فيه مجال او اكتفي باني استقبل الضيوف وارحب بهم واصب القهوة واتحرك كانهم ضيوف لي هذا من ناحية الشغل
مع العلم مرات ماانزل نادرا طبغا بس حلو تغير للروتين
اما من ناحية التعامل اولا خالي وخالتي لهم كامل الاحترام والتقدير واحب روسهم واسالهم عن اخبارهم
واتعامل معهم بتقديييير واتغافل عن بعض حركات خالتي امشي لها وهي ماتغلط كثير
ولازم هدية كل عييييد فقط مااكلف على نفسي لازم مثلا ذهب لخالتي لا مرة دراعة عطر شرقي يعني زي كذا سجادة صلاة كشميرية واحتسب الاجر
بالنسبة للبنات وسلفتي
اضحك معهم سوالف وناسة بس مااتدخل في خصوصياتهم راحوا مااسال وين راحوا الا ان تكلموا
دق احد وانا موجودة مااسال من او وش يبي فلان اسال عن البنات المتزوجات اسال خالتي وش اخبارهم وعيالهم من فترة لفترة
اهم نقطةةةةةةةةة ماانتقدهم ليش وماليش
اذا رحت لاهلي امرهم اسلم عليهم قبل اروح وامرهم اذا رجعت
اوجبهم يعني اللي ولدت اقهويها واحط على مولودها
وبما اني معهم اسوي لها شي مثلا تمرتي لاني معروفة فيها اسويها لهم وكل كم يوم شوربة نفاس او اكلة نفاس
انزل اذا عندهم نفاس واستقبل ضيوفها واساعدها لله ماابي مدح ولا غيرة
اهم شي اكون بسيطة مثلا دخلت وغرفتهم حوسة مااتكلم واذا بينوا انه معليش وغيرة اقول عادي حنا خوات ماانتقد وحنا واخواتي وهياط ماله داعي
اجيب من فترة لفترة هدايا رمزية لعيالهم او حمواتي اشياء رمزية
مااكلف على نفسي صراحة
اذا عجبني شي صراحة امدح بس ماامدح مدح اللواقة واذا ماعجبني وسألوني اقول ماشاء الله
اهم شي تكونين راقية معهم
والله العظيم يقولونه بانفسهم ماعندك لقافة
طبعا السهرات مااسهر عندهم 10 بالكثير وارقى بيتي الا ان كان فيه سبب مثلا سهرة مخطط لها او استراحة
وسوالفي عامة ووناسة وتبادل معلومات اهم شي ابعدي عن القيل والقال والعصبية القبلية
والشرهههههه اهم شي لاتشرهين عليهم ليش وغيرة
وش بعد
.
.
.
.
ايه ذكرت احتسبي الاجر ولا تدققين في حركات السلايف ترى حمولتي يطيرون بسلفتي بس مايحقروني بس بزيادة بس والله كنت اتضايق بس الحين اكتشفت حركات الحريم وفي نفس الوقت هي معهم تستاهل تقدسهم
مررررره هههه رغم انها مو معنا بالبيت
بس هذا اللي عندي
تعبت من كلمة ( خليك رسمية مع اهل زوجك )/ غير متابع
متابعة النقاش، صفحة 7