السلام عليكم ورحمة الله..
كيفكم يا صبايا..
أنا براسي 100 دوامة وبآخر مشاركتي بقلكم شو صاير معي..
بس كلو ولا زعلك يا أم أنس..
أنا حبيت موضوعك.. وحبيت أشارك فيه من الأول بس التهينا الله يلعن الشيطان..
بالنسبة للمحبة في الله.. أنا حبيباتي أجعل دوما مقياس محبتي للمرء هو مدى قربه من الله والحمد لله وبفضله تعالى .. أحتفظ بمقدار كبير من صداقاتي.. وبعضها وصل الآن لحد 22 سنة وأكثر.. مع أن عمري 27 سنة..
وأنا حسيت بقيمة هالمحبة وكيف انها وحده اللي بتكون محبة صادقة ومن غير مصالح.. بموقفين..
أولهما..
مرض ووفاة جدتي.. قبل أكثر من 5 سنوات.. كنت بالأردن وحسيت قلوب كل صديقاتي.. وأخواتي في الله معي
وهم اللي أعانوني بعد الله إني أتحمل صعوبة تلك المرحلة علما بأني كنت سنة 3 جامعة وأنا الكبيرة عند أهلي.. وكان مرض جدتي ((سرطان رئة)) وكنت أنا الوحيدة اللي ريحة جاي عالمستشفيات بحكم كوني المستشارة الصحية لعيلتي((كنت طالبة وراثة وميكروبيولوجي))
ومرت فترة المرض.. وفترة الوفاة.. بما فيهما من صعوبات.. وساعدوني كتير من خواتي بالجامعة عشان ألحق على المناهج.. يارب يوجهلهم الخير وين ما راحو..والله حتى 3 من زملائي الشباب كانو واقفين جنبي مع اخواني.. وما تركونا حتى بوقت الدفن كانو واقفين مع بابا واخواني..
زملائي الشباب كمان كانو كتير محترمين وأهم شي كانو بيخافو ربنا في بنات الناس زي أخواتهم وكانو يذكرونا بوقت الصلاة ويستغلو وجودنا في مصليات البنات بالكلية عشان نوصل الفعاليات والأنشطة اللا منهجية الإسلامية داخل تجمعات البنات..الله يوفقهم ويفتح عليهم وين ما راحو.. وهلأ صفو صحاب إخواني اللي درسو معي بنفس الجامعة..ولحد الآن من لما تخرجت طبعا انتهت الزمالة بيننا..ومعها انتهت علاقتي المباشرة فيهم وصرت أعرف أخبار عنهم من اخواني.. و بعضهم حضر عرسي.. و علاقتهم مستمرة مع اخوتي.. وقبل فترة كنت عند أهلي.. وكان واحد من زملائي سابقا جاي يشتغل هون بالسعودية..وعزمه أخوي عالبيت..
وبالصدفة أنا وصلت من السفر عبيت أهلي يوم العزومة .. طبعا..احنا عيلة ما عنا إختلاط..بنقعد رجال لحال ونساء لحال..وفجأة راح ابني يحبي ودخل الغرفة عند الرجال..إخواني بيقولو..الشب مسكه ويقله ياخالي ويلعبه وانبسط عليه وكإنه عن جد خاله والله وقتها حتى ماما دمعت..
آخر شي.. من أهم آثار الأخوة والمحبة في الله في حياتي الخاصة.. حكاية زواجي..
أنا وزوجي معرفة((مش قرايب)) من 25 سنة..
وأتوقع إنو محبة وأخوة أبوي وحماي وعلاقة العائلتين اللي استمرت ربع قرن من الزمن لحد الآن
الله يتمها نعمة ويديمها علينا.. قولو آمين..
كانت هاي المحبة سبب من الأسباب اللي يسرت زواجي أنا وزوجي بإرادة ربنا.. علما أنه لا يجمع بيننا ولا شيء غير علاقة أهلنا.. لا مصلحة دنيوية ولا مكان سكن (هم في عمان وإحنا في إربد)
ولما زوجي خطبني كنت مش شايفته من 8 سنوات من لما تحجبت مزبوط وما عدنا نشوف بعض..
كان بيننا زيارات بين الأهل مش أكتر..
وهلأ الحمدلله حاسة اني طلعت من بيت أهلي لبيت أهلي كمان.. والسبب.. محبة العيلتين.. كانت على أساس التقوى والصلاح.. والحمدلله دامت وربنا يديمها ..آمين..
المهم بعد كل هاي القرقرة.. اللي بدي أوصله..إنه مهما كانت طبيعة العلاقة..أخوة- زواج- صداقة..
إذا كانت محبة ربنا هي الأساس اللي بتقوم عليه العلاقة.. أنا واثقة إنها تدوم وربنا بيبارك فيها..
وهذه بعض المواقف التي حدثت معي في حياتي وأتوقع أنها جسدتلي معنة المحبة والتآخي في الله..
لقاء الأحبة---تتمه---
متابعة النقاش، صفحة 979