مشكلتي مع اهلي مالقيت لها حل

السلام عليكم

انا واختي الكبيرة متزوجين عيال عم .. وابوان ازواجنا داخلين في شراكه ويكسبون منها وبعد زواجي بسنتين توفى ابو زوج اختي اللي هو عم زوجي ... اللي صار ان ابو زوج اختي لله يرحمه خسر فلوس كثيرة قبل لا يتوفى واضطر انه يبيع نصيبه في الشراكة لأبو زوجي بس ما اردي ليش ما قال لعيالة انه باع نصيبه .. يمكن لأنه كان تعبان ومشغول بالعلاج

يوم توفى الله يرحمه جو عياله يطالبون ابو زوجي بنصيب ابوهم وتفاجأوا ان ابوهم بايع نصيبه وابو زوجي معه صكوك شرعية تثبت البيعه وقاموا الدنيا وما قعدوها واولهم زوج اختي ومحاكم وطلايب مع انهم تجار مشالله ماهم بحاجه

وصار زوج اختي الله يهديه في كل مجلس يجيب سيرة عمه ابو زوجي وعياله انهم نصابين وانهم لعبوا عليهم

المشكله ماهي هنا المشكله ان اهلي واقفين مع زوج اختي واختي نفسها بكل مجلس تردد كلام زوجها وكأني انا مالي اي اهميه عندهم وغير كذا امي بمناسبه وبدون مناسبة تدعي على ابو زوجي ان ربي يفقره وجعله يخسر وجعله وجعله ... طيب يا امي وانا وعيالي ؟؟ اذا ربي فقره افتقرنا احنا لانه يصرف علينا زوجي حالته ضعيفة

وما يحبون زوجي يحبون زوجها اكثر ويعزمونه ولا يعزمون زوجي ... لان زوجي ساكت ما يحب الشر ولا يحب يتكلم في المجالس مثل زوجها لأنه يحترم صلة الرحم اللي بينهم

صرت ما احب اروح اهلي لأن عيالي كبروا وصاروا يفهمون ما ابيهم يسمعونهم يسبون جدهم وعمامهم

ما ادري وش اسوي .. هل اتكلم او اظل ساكته

7 تعليق 1,991 مشاهدة

شاركي في النقاش

سجلي الدخول لإضافة تعليق.

التعليقات

7
  1. @am_mhmd1407

    مشكلتك قويه شوي من جهه زوجك ومن الجهه الثانيه اختك وزوجها واهلك بس انا من رايي انك تكونين محايده لاتوقفين بصف احد كلن يقول عيني مفقوعه ويمكن اهلك تعاطفوا مع زوج اختك حسو انه مظلوم وبعدين دعوا على ابو زوجك مو على زوجك وهو واخوه وعيال اخوه يصلحون لاتدخلين فيهم طنشي وبيسكتون ولاتتركين اهلك عشان احد لو شدت شدايدها اهلك هم اهلك اذا فتحوا الموضوع قولي انا مالي دخل انا لي في بيتي وزوجي وعيالي وبس لايحسون انك مع اهل زوجك واهل زوجك لايحسون انك مع اهل زوج اختك كلامي مخربط اتمنى فهمتي وهذا رايي
  2. @hrfalghla

    الله يكون بعونك و يصلح الحال يارب حبيبتي خلك بعيده أنتي و عيالك و مالك شغل بأحد و طنشي إللي تسمعين من أمك و أختك الكلام إللي قالوه بوقت زعل و إذا زيارتك لأهلك تضايقك وتسبب لك مشاكل خففي الزيارات ولا تقطعينهم
  3. @ghrb_alohdh

    خلك محايدة وقللي الزيارات ولا تنقلين لزوجك سب أهلك له أو لابوه ، ولا تنقلين لأهلك شي عن زوجك وابوه أبدا ...

    وطنشي الموضوع كله أنت مالك ذنب في شي ...

تابعي تجارب أخرى من هذا القسم.