كيف اتصرف مع هالبنت

يازين اسلوبك ماشاءالله وياوسع صدرك وحلمك على بعض الردود

بصراحة البنت ميب صغيرة 24 يعني كبيرة وناضجه وتفهم وتعرف الصح من الغلط
عموما لو انا بتصرف على مراحل:
1- بجيب طاري اي احد او صديقتي مثلا وأقول انها عاقلة وتكانة ورزينه وثقيلة والحياء في البنت مطلوب و و و....

اذا مانفع:
2- برجع اجيب طاري صديقتي اللي بخطبها لأخوي وبقول فيها كل المواصفات اللي يبيها عقل وثقل وتكانه ورزانه
وبقول حتى اخواني وافقوه على مواصفاته ويبون زيها عشان اذا صرفت النظر عنه لواحد ثاني يصير مايمديها لأن كلهم نفس رايه.

واذا مانفع:
3- صراحة وحدة من ثنتين لأن واضح ان الطق في الميت حرام يا ابلعن جدفها واهجدها واذا شفتها متحركة صرت لها بالمرصاد لأن جد خير تسوي ذا الحركات في بيت فيه عيال وهالعيال بيجون عندهم اخوياهم وصدق الشباب موب دارين من تكون بيحسبونها اخت خويهم وبتمشي سمعه عليه انهم خفيفات. أو بقترح على اخوي اذا شافها ينزرها ويصرخ عليها ويقولها تغطي او انتبهي لغطاك او لعد اشوفك هنا او اي جملة.

صراحة انا حاسه فيك وجد قهرتني واكره هالنوعيات اللي تبي العرس تجلس مؤدبة وخطيبها يجيها وياخذها وهي معززه مكرمه
موب تترزز واضح ان تفكيرها على قدها والا كان عرفت ان الرجال مايقبل بوحدة من هالنوعية وشافوها كل أخوانه وأكيد علقوا عليها وعلى تصرفاتها بيناتهم يمكن كل واحد علم الثاني او سأله اذا شافها زيه او انتبه لحركاتها.

وانا خالي قد ودى امه وامي يشوفون له وحدة وأول ماطلعوا مدحوها قال هي لابسه كذا وكذا قالوا ايه وش دراك قال ماابيها حتى لو زينه يقول لما كان باب الشارع مفتوح جت وقفت في المدخل من جوا ومدري اذا ابتسمت بس هي وقفت قاصده تبيه يشوفها قال اللي ارخصت بنفسها كذا ماأأتمنها على بيتي ولاتصلح تصير أم كان صبرت للشوفه الشرعية مو توقف قدام باب شارع مفتوح وأي أحد يمر فالشارع يقدر يشوفها فيما معنى كلامه وخطب غيرها وتزوج الحمدلله

بنت خالتك مدري اذا النصيحة بتنفع معها بس حاكيها كـ قصص لصديقاتك أو أحد مو مباشرة وعسى تتعظ

واستغرب خالتك وينها عن هذا كله معقوله مالاحظت
اقلها خير تتمشى في البيت وفيه عيال المفروض ماتتحرك من مكانها إلا للضرورة هي ضيفة!


الله يكون بعونكم

بصراحه انا سوف اكون لها بالمرصاد وماراح اعطيها مجال ابد بأي طريقه .لأن هاذي قلت أدب وجرأه زايده عن الزوووووووم وأخاف سمعتكم تتشوه بسببها وياليت تكلمين امها

أولا استهدوا بالله وقولوا استغفر الله والحمدلله اللي عافانا مما ابتلى به غيرنا
وركزوا انها مشكله وتبغى حل فماله داعي بعض الكلام اللي فيه شماته

أما بالنسبه للمشكله

أنا بصراحه أحس المشكله الأكبر أن الرجال يحسبونكم أنتم اللي تسوون هالحركات وهالشي بالتأكيد محد يرضاه على نفسه أنه يتهم بالباطل بس ليش أخوانكم مادافعوا عنكم ؟؟

أما بخصوص البنت وأخوانك انا اللي فهمته انو مو دايم يزورونكم يعني زيارة نصف سنويه تقريبا ويباتون عندكم

ممكن زي ماقالت وحده من البنات جيبي سيرت أخوانك بشكل غير مباشر انهم مايحبون اللي يتكشفوا على الرجال ويبغون الثقيلة ومن هالكلام

وفي نفس الوقت أنت حاولي مثلا تقفلين الباب اللي بين جهتكم وجهة الرجال أو إذا صار في أحد بيعدي يكون فيه احد منكم يا أنت يا وحده من أخواتك
أو مثلا تدخلوا الحريم بغرفه وقفلي الباب بحجة لا يجي احد من الصغار ويفتحه
يعني دبري مكيده من هالناحيه على حسب وضعكم وبيتكم

وأخوانك حاولي تكلمينهم لا أحد يطلع إلا وهو معطيك خبر


وإذا نهائيا مانفعت أي وسيلة كلمي أمها مره ثانيه بس لا تجيبي طاري أخوانك علشان لا تصير حزازيه قوليلها الكلام اللي قالوه الشباب عن بنتها