قصتي مع العالم السفلي ولا فلم مرعب

الله يشفيك
بنتظار التكملة

سلااااااااااااااااااام اخواتي معليش على تاخيري ولكن تعرفوا الافطار ومشاغلوا
شكرا لتفاعلكم معايا الله لا يبتليكم ولا يمرضكم ولا تشوفوا شر يارب
بالنسبه للاخت الي تسال عن عمري لمن كنت مريضه توي كنت 19 سنه وما دريت الين سار عمري 26 والان انا داخله 30 فترة العلاج كانت 4 سنوات
طيب اكمل الحكاية .....
اليوم الي كنت فيها تعبانه جدا كان نفس يوم زواج بنت عمتي وانا الين عشره الصبح في حالتي دي وبابا جلس يقولي ماتروحي الزواج لانك تعبانه وانا اقوله خلاص سرت صاحيه واكابر التعب عشان ما ابغى انكد على احد المهم يوم رحت الزواج كان عادي لانوا بس دفوف واخر الليل بدأت الزفه وطبعا انا مسؤولة تصوير الفديو وكلنا وقفنا نستنى العروسه الا مشغلة موسيقى في زفتها وانا لسه توهم محضرين الي جوتي فما اتحملت ورميت الفديو وسرت اصيح من بطني وخرجت اجري على الشارع واصحى الا انا متعلقه الي في الحاجز الي قدام باب الحريم بطولي في الشارع واطلع مني صوت غريب
اتصلو على بابا جا اخدني من يوم خرجت من القصر وانا طبت لمن غلقت الزفه ورجعت القصر الحمدلله كملت باقي الليله ..
من تاني يوم كورس قرأة القران بالذات سورة البقره كل مره اقدر عليها احيانا كنت اقرأها 4 مرات في اليوم
مره يغمى عليا ومره اصيح ومره ما اقدر اكمل قرأه والكلمات توقف في حلقي ما تخرج ولساني تقيل وانا اقاوم واقرأ حتى اسير مدري عن نفسي طبعا لازم يكون احد جنبي لاني احيانا اقرأ القران غلط لان الكلمات غير الي انا اشوفها اكتر شي كا يتعبني سورة الكافرون واخر البقره (انصرنا على القوم الكافرين) وكل ما ازيد انا تزيد المقاومه من الي جالسين في الداخل واتاذيت جدا من الاحلام والكوابيس واكتر شي اشوفوا كنت الاسد والكلاب السودا تجري وريا ...
سار بابا يسقيني عشبه اخدها من الشيخ سالم الحقوي من جده للسحر وطبعا انا ما ادري ان بابا كان يتواصل مع اي شيخ لان كان يضغط علي اني اقرأ بنفسي لان التاثير اقوى وبدأت بطني يطلع منها اصوات زي النهيق واصوات الخنازير لمن يقرى بابا علي وانا مغمى علي وكمان اكون باكيه من شده الالم والاهتزاز والتخبط في الارض ويطلع من فمي صوت ضحك وقهقه ووجهي باكي طبعا دايما ساروا اهلي مستعدين لاي طارئ اسير عليا ...
ومره طحت في صالة البيت وبابا مو موجود ماما اتفجعت لاني سرت اكلمها بصوت مختلف واقولها انا ( اسم الي كان داخلي) نادي زوجك اتصلت تجري على بابا وجاني يجري الي لقاني زي العاده طايحه في الارض واقول الاسم وانادي بابا باسموا واقولوا انا فلان تعال خرجني وسار بابا يتكلم معاه ويقولوا انت مين وليش جيت وايش تسوي الا فلان ما رضي يرد الا على سؤال واحد انوا مو لحالو بس هوا تعب من القران وبدوا يطلع ....
وسار بابا يقرا مدري ايش يقول وانا اتخبط في كل مكان ويقرى وثبتني الين فجأه فقت وقدرت اتكلم (انا في كل دي الحاله واعيه بس ما اتحكم في نفسي )....
بعدها سرت احس وانا نايمه كانوا احد نايم معايا ودايما احلم كلاب نايمين مع حريم اعزكم الله وانواع التخويف بس كنت استعيذبالله واقول امكن تخيلات الين مره صحيت وانا صاحيه واحس الفعل وقمت اجري على بابا وانا مروعبه انتفض ومن شدة خوفي مني عارفه كيف اقول لبابا اني حسيت كده الا هوا عرف من تلميحاتي وبكائي والرعب الي فيا ... خلاني ادهن جسمي بزيت مقري ومسك اسود في كل مكان في جسمي ودايما اكون متوضيه ....
بعدها سرت احس جسمي مولع زي النار ورجولي كانها قوالب تلج وراسي كانوا قدر ضغط ودايما دايخه واحب اضارب اخواني واناديهم ياسماء غريبه هيا اسماء من بسم الله (اذا تبغوا اكتبلكم هيا اكتبها بس والله مدري ايش يسير اذا احد يقولها خوفا عليكم محى اكتب اسماء بسم الله )
حتى ماما كنت اقولها اذا زعلت اختي والله لافضحك ياحيوان بس مدري من هوا الحيوان واذا احد سب ياكلب انا اسير انسانه مختفله والشرر يتطاير من عيوني ...
المهم اهلي شالوا كل الادوات الحاده من حولي لاني حاولت اقتل نفسي وطبعا ما كنت في وعيي وسار يقفلوا باب البيت لاني بضوا حاولت اخرج من البيت وانا مدري عن نفسي كده بطولي لانهم طول الوقت مشغلين قرأن ومدري ايش كنت انا مره اتضايق..
كنت اصحى اخر الليل واجلس اتفرج على التلفزيون على افلام دم وتقطيع ورعب وتخويف وطبعا ما كنت انا لان مره بابا صادني وجا قفل التلفزيون وقالي قومي صلي صلاة الوتر قمت وانا ساكته ولا كلمتوا الين وصلت بابا الغرفه وقلتلوا ليش قفلت التلفزيون قالي بس الا طحت في الارض من طولي وسرت اتخبط في الارض واتخبط زي السمكه الي برة المويه وجات تجري ماما على صوت راسي الي انخبط في الارض ...
وكل مره افوق اسير متالمه وموجوعه من الي يسيرلي وانا مو انا واستمر سورة البقره والاذكار والرقيه الخاصه باحلام الكلاب ورقية الحرق..
بعد فترة فجأه سرت ما اتكلم وبس ابكي كاني عمري خمس سنوات واقول ابغى امي (..) جاب بابا ورقه وقلم واعطاني وسرت اكتب بخط غير خطي والله العظيم للان مانساه داك الخط كانوا خط كوفي واكتب واكتب واكتب الين عبيت 3 ورقات وجه وقفى وبعدين سريت الله يكرمكم استفرغ الين عيوني طلعت ومدري ايش كتبت ومدري ايش استفرغت لان بابا مرضي اقرى ايش كتبت ورمي كيس الاستفراغ في البحر ...
بس الي عرفتوا انوا لسه باقي 3 ما خرجوا يوووه ياليل ما طولك
بعدها بفترة وبرضوه مع الاستمرار على القراءه سرت اصرخ في الركوع والسجود واقول ما ابغى اصلي وكانت اختي جنبي الله يستر عليها تمسكني عشان لا اخبط راسي في الارض بس كنت احاول المقاومه على قد جهدي وما اقطع الصلاه ورغم الصراخ احاول اركع واسجد وبعد ما اغلق الصلاه صوتي يتغير ويسير بابا وماما واختي واخويا الكبير يمسكوني كل واحد من طرف وبابا يرش عليا موية مقرية ويقرى وانا ادفعهم كلهم من عليا محد يقدر يثبتني انا كنت اقوى منهم كلهم
وبعدها بدات اشرب حلتيت والله ثم والله اني اول مره شربتوا اني احس شي في بطني يجري او يشرد من موية زمزم بالحلتيت واصوات في بطني اقسم بالله زي افلام الرعب وطبعا انا اسك فمي عشان لا اشرب من ريحتوا اعرف ايش هوا وطبعا مو انا الي اعرفوا لاني عمري ما شفتوا الي جوا هم يعرفوا وكان بابا يشربني غصب عشان اتعالج شربت سدر حلتيت اتروش او استحم بالسدر وجسمي يسير كلوا رضوض وادهن معد الترويش الكافور مع المسك لاسود طبعا مو انا الي ادهن امي او اختي لاني انا كنت اقولهم دهنت وانا كذابه واحيانا اكسر قوارير الكافور والمسك عشان لا يدهنوني بيه للان اثار الكافور والمسك الاسود ماسكه في جدار الغرفه ما راحت ....
المهم بعد فترة تقريبا سنتين من دي المعاناة رحت للشيخ سالم الحقوي في جده هوا ما يقرى بس اعرف اشبك من نوع القراءه وانا لمن بدأ بالقراءه علي سرت اصيح باعلى صوتي في المحل ويديني اتشنجت وسار بابا مثبتني في الارض عشان لا اتعور المهم رفع معنوياتي مرررررررررره لمن قال دا الشي سار ضعيف جدا والمقاومه اضعف وانهم ما لمسوني بس يخيل ليا انهم ناموا معايا وانا اشرف من الشرف ولازم احط سماعات القران على بطني وادهن نفسي واكون على طهاره دايما واذا قدرت احط عسل مقري عليه من الداخل حتى ما يؤذوني.
مع المعنويات الرائعه الحمدلله استمريت بالقراءه رغم الالم والمعاناة وانا نايمه قران وانا صاحيه قران وانا في السياره قران حتى سرت اجلس بين اخواني لاني كم مره حاولت اني ارمي نفسي من السياره وهيا مسرعه ...
حتى اخواني ساروا يسألوني انتي مين اختي ولا احد منهم طبعا هم عارفين الاسماء فكانوا يسالوني انا مين لمن اكون معاهم تخيلوا هههههههه شر البلية ما يضحك..
وبعدين سرت احس بالم شديد اعزكم الله من مخرجي وشي كبر البرتقاله بدوا يخرج مني والله ما انسى في رمضان وانا امشي مع اهلى عشان ملابس العيد والكهرب تضرب في رجولي والم تفر منو عيوني وبابا حبيبي يسالني طيبه اقولوا ايوه بس عشان لا انكد على اخواني حرام وانا في كل خطوه اموت كل مره مية مره
وبعدها سرت لمن اسمع سورة الصافات ابكي بكاء بصوت عالي من خوفي من الحرق والموت والعذاب ومن الله يقطع القلب الين انام من البكاء والتنهيدات وطبعا مو انا الي ابكي انا محبوسه في داخلي ...
الين مره وانا في حالة الاستحضار سرت اقولهم على محل في المكان الفلان بالشكل الفلاني في مدينه غير الي احنى فيها حتلاقوا شجره كبوا عندها عشره لتر موية زمزم مقرية عشان اتفك وفعلا وانا لسه دايخه مو صاحيه ميه في الميه بابا خلاني عند اختي امانه وركب السياره وسافر هوا وماما وفعلا وصلوا للمكان دا ولقواالشجره وكبوا المويه حولين الشجره واتصلوا على البيت لقوني صاحيه جالسه اطبخ لاخواني عشا والحمدلله انفك السحر الي شربتوا ونصوا مخربط في التراب تخيلوا كيف الشر وانا حلمت قبلها بوحده وعرفت انها مسويه السحر وطلع دا المكان قدام بيت اختها
...وبعدها سار كل شي بدوا يطلع اطيح واسير في حالة كاني صاحيه بس مو صاحيه الين اجي بابا ويقرى ويخرجهم مني والي يقول عين والي مس والي سحر بالغلط انا مشيت عليه المهم خرج مني بدون مبالغه حدود 29 خلال فترة العلاج والان الحمدلله يارب للك الحمد المداومه على القران والاذكار والتحصين حتى اهلي اتعلموا التحصين واخواني لان الله هوا الحافظ والناس ما تخلي احد في حالوا وعرفت كمان لمن يجي شي واحد يكون الجسم مرتع لباقي الاشياء يعني انا شربت السحر وجا معاه المس والعين المهم عرفت من السحر نفسوا لمن بيغي يخرج مين الي سواه وليش ومتى شربتني هوا بس سبحان الله محى تروح من الله ربنا حيجيبها ولو بعد حين ..........
سورة البقره والدعااااااااااااااااء (امي كانت كل يوم تدعي لي بالشفاء الين عيونها اتنفخت يارب ما يحرمني منها )
لا تسيبوها ابدا لو بعد 3 ايام عشان ربنا يحميكم والله الي مريت فيه الالم ما يتوصف والاكتئاب والضيق والهم بسبب هادا المرض ولكن ربنا يفرج الهم ولو بعد حين ولمن ربنا يكرم الانسان يكرموا بغير حساب

الله يشفيك :(

الله يشفييييييك يارب
ويعافيك بس كملي قولي لنا الاسباب سحر عين

سبحان الله الي شفاك
اللهم ابعد عنك كل خطر
ويخلي لك أمك وأبوك وأخوانك ولا يحرمك منهم