قصة حملي و ولادتي للعظة حتى لا تقنطوا من رحمة الله :)
بسم الله الرحمن الرحيم
بدي أبدا من دون مقدمات فكرنا انا وزوجي في الطفل الثاني و الحمد لله و الفضل من الله أني طلعت حامل بعد شهرين ما شاء الله و كان الحمل طبيعي الحمد لله .. عملت سونار وكل شي طبيعي و كنت في الأسبوع 15 و قالولي كل شي طبيعي وموعد الولادة في السونار قبل موعد الدورة بثلاث أيام و جنس الجنين ذكر ما شاء الله و انا كنت أتمنى تكون عروسة بس الحمد لله يهب لمن يشاء إناثا و يهب لمن يشاء الذكور .. وكملت الحمل للأسبوع 20 و هنا بدأت المأساة عمل السونار وقالتلي الدكتورة ان الجنين عنده مشكلة في البطن ولازم عملية بعد الولادة و حولتني على أخصائي أجنة و حكى معي الأخصائي و عملولي موعد ثاني يوم والصدمة كانت ان الأخصائي قالي ان الجنين عنده سائل في البطن و تحت جلد الصدر و لازم نعمل تحليل للسائل الامنيوسي للتأكد من التشوهات و متلازمة داون و العدوى وكانت كل النتائج سليمة و الحمد لله و كنت اراجع دكتورتي كل اربع أسابيع و مع الأخصائي كل أسبوعين وكل مراجعة صدمة جديدة اول صدمة ان عظام القفص الصدري الخلفية ضخمة بس اللي خفف علي شوي ان الماء في البطن اختفى و الماء خلف جلد الصدر خف و ظهر ماء على القلب الحمد لله بكرة وأصيلا و المراجعة اللي بعدها قالولي ان الماء اختفى و الحمد لله بس اسفل عظمة في القفص الصدري من جهة القلب قصيرة جداً و أعلى عظمة في القص مفقودة سبحان الله الحمد للهو المراجعة اللي بعدها قالولي ان السائل حول الجنين قليل وكانت نسبته 7سم و الطبيعي بين 5-14ولازم نراقبة و انه في زيادة جلد على الصدر و صرت أروح عشان يراقبوا السائل و يراقبوا نموا الجنين و قالولوا لازم نعملك MRI التصوير بالرنين المغناطيسي عشان يتأكدوا ان قلب الجنين بخير لانه اوضح من السونار و الالتراساوند و عملت التصوير و كنت خايفة يأثر على الجنين بس قالولي ان هذه كثير بنعملها للأجنة يوم نشك في التشوه حتى نتأكد أن الجنين ما بيحتاج رعاية خاصة أو عملية بعد الولادة و ما بضر لانها مو اشعة و عملت التصوير و كنت أردد باسم الله اللذي لا يضر مع اسمه شيء في الأرض ولا في السماء وهو السمع العليم. و الحمد لله و ما شاء الله النتيجة كانت ان الجنين طبيعي و عظام القفص الصدري طبيعة ولا تقنطوا من رحمة الله و صرت أراجع الأخصائي عشان السائل حول الجنين ومراقبة نموا الجنين و صرت أراجع كل أسبوع بعد ما دخلت الثامن بس الصدمة الجديدة ان الجنين متأخر نموه كانت النسبة من الأسبوع 22 إلى الأسبوع 30 تقريبا 28٪ و صارت في الأسبوع 33 13٪ و قالولي طبيعي بيكون خطر يوم يكون نموه اقل من 10٪ و الصدمة في الأسبوع 35 صار اقل من 5٪ وقرروا لي ولادة و الحمد لله و حكى الاخصائي مع دكتورتي و شرحلها الوضع و هو كان يبعثلها تقرير عن الحالة في كل مراجعة و الحمد لله و قالولي لازم ولادة لان الجنين وزنه كيلو و700غ وإنتي في الأسبوع الثالث من الشهر الثامن و حولني على المستشفى حالة طارئة و رحت على المستشفى الساعة تقريبا 12 الظهر و حكوا مع دكتورتي و حكيت معها و قالتلي انا راح اجيك الساعة 4:30 العصر لانها عندها مواعيد هذه الساعة قالتي انتي بتقرري طبيعي مع طلق صناعي أو عملية بس بنصحك بالعملية لانه حجم الجنين صغير كثير و ما راح يتحمل الطلق الصناعي و يمكن إذا قل نبضه نعملك عملية فقررت قيصري لانه من مصلحة الجنين المهم اجت النرس و حكتلي لسا قدامك شوية وقت و فكري شوي إحنا ما راح نبدأ بالترتيبات للقيصري غير تا تفكري لانه قرارك انتي و راح نمهلك شوية وقت لان دكتورتك باقيلها تقريبا ثلاث ساعات و نص حتى توصل قلتلها لا جيبي أوراق القيصري أوقعها لان القيصري من مصلحة الجنين و وقعت الأوراق و عملولي الفحوصات و الحمد لله وكانت النرس كل شوي تتكلم معي و تهديني و كان زوجي و ابني و سلفاتي عندي بالغرفة و كنت احكي مع أمي وأهلي على التليفون لان انا ببلد و هم ببلد و اجت دكتورتي و حكتلي عن الوضع و عن القيصيري و طمنتني و دخلوني على العمليات الساعة 5:00 و دخل معي زوجي و جهزوني للعملية كان التخدير نصفي و التعامل قمة الروعة غطولي كل الجسم بس مكان العملية حطولي انبوب الأوكسجين و عملتلي دكتورتي العملية و كان معها دكتور الجراحة و دكتور التخدير و كانوا النرسس و دكتورة الأطفال في الغرفة و كل شوي يقولولي التطورات و بعد عشر دقائق طلعوا الجنين و وروني إياه من فوق الستارة و أخذوه يفحصوه و قالوا لازم حضانة لانه عنده التنفس سريع و جابوه شفته شوي و أخذته الدكتورة على الحضانه و خيطولي الجرح و كان خياطة ليزر و رجعوني على الغرفة اللي كنت فيها عشان المراقبة بعد العملية جلست فيها ساعتين و اخذتني النرس على السرير شفت البيبي و نقلوني على الغرفة اللي راح اجلس فيها و ثاني يوم اجت النرس ساعدتني أني أقوم و امشي و الحمد لله ما شاء الله صرت أقوم و امشي لوحدي و صرت أروح أشوف البيبي مشي لوحدي ما شاء الله بدون مساعدة بس النرس كانت تمشي معي خوف أني اسقطو دكتورتي كانت تيجي تزورني كل يوم وتطمئن على حالتي و أما الصدمة الأخيرة ان الجنين كان وزنه 2 كيلو و نص و طبيعي بالنسبة لعمر الحمل و كان وضعه طبيعي ما شاء الله تبارك الرحمن و كانت الرئة ما اكتملت لسا و جلس في الحضانة حتى كمل 37 أسبوع و كنت أروح أرضعه بعد الأسبوع 36 أما قبل كانوا يحطوله الحليب في أنبوب و الحمد لله عل كل شيء و ما شاء الله تبارك الرحمن و لا تقنطوا من رحمة الله و عسى ان تكرهوا شيءً وهو خيرا لكم و بكتب في قصتي و طفلي بجانبي الله يحفظه و يحميه و يجعله بار تقي حافظ لكتابه الكريم.
طولت عليكم بس حبيت احكيلكم قصتي للعظة و العبرة ووسعت رحمته كل شيء سبحان الله تبارك و تعالى و ان أخطاء السونار واردة حتى في الأجهزة المتطورة
أعوذ بكلمات الله التامات من كل شيطان و هامة و من كل عين لامة.
و أسفة على الأخطاء و السرد غير المرتب داخلة من الجوال.