ازيكم اخواتى فى الله
ياااااااااااااااا رب تكونوا كلكم بخير
انا النهادردة جيبالكم طريقةالعيش الفينو المعتمدة عندى فى البيت
و كل حبايبى و اصحابى لما داقوه علاطول خدو طريقته و عملوهو نال اعجاب الجميع بفضل الله
و ادى صورة تشويقية تجويعية ههههههههههههههه
عشان كدا قولت لااااااااااااازم انزله لاخواتى حبايبى
لانه اكيد الحاجة اللى بتتعمل فى البيت بتكون انظف و اضمن
يلا نبتدى بسم الله
المقادير
انا هنا قولت طريقة يعنى تلات اربعات عشان نفضل فاكرين المقادير بسهولة
جدااااااااااا و هنفسرها كلاتى :-
4 كوب دقيق
4 معالق صغيرة زيت
4 معالق صغيرة سكر
نصف معلقة صغيرة ملح
قطعة خميرة فى حجم الليمونة
كوب و نصف ماء دافئ( يقل او يزيد حسب نوع الدقيق)
اهى دى بقى المعادلة السهلة ههههههههههه
الطريقة
1- هناخد قليل من الماء الدافئ و معلقة سكر و قطعة الخميرة و ندوبهم مع بعض و نغطيها تخمر لحد ما نجهز باقى الحاجات
2- هنضيف على الدقيق الملح و السكر و الزيت و الخميرة والماء بالتدريج و نعجن من10 الى 15 دقيقة
ممكن تلاقى العجينة بتلزق شوية فى الايد عااااااااادى جدااااااااااااااا
3- اكيد لازم نغطيها و نسيبها تخمر ...انا كنت بسيبها فى الصيف تخمر ساعة لكن فى الشتاء يفضل
ساعتين
4- و بعدين نحضر الصوانى بتعتنا و ندهنها زيت و بعدين نشكل العجين حسب الرغبة يعنى ممكن تعمليه كيزر و ممكن طويل
و كمان شكل ضفيرة انا عملت منه اشكال تانية مختلفة
يا رب تعجبكوا
و على فكرة الكيلو عندى 5 كوبايات بعمل 4 كوب بيعملى حوالى من 20 الى 22 رغيف
و بقرص الاول 22 كورة و بعمل نصهم كيزر و النص التانى بفردهم فينواو على شكل ضفيرة بس الافضل انك نحشى شكل الضفيرة قبل ما نخبزه
5- طريقة الكيزر معروفة هتقرص العجينة فى حجم البيضة و اما الفينو الطويل طبعا هتفرد كورة العجين بالنشابة
و بعدين تلفيه رول و طبعا لازم تقفلى الجانيبن بتوع العجين عشان الهوا ميطلعش منها فى السوا فى الفرن
و بعدين ترصيه فى الصوانى و تغطيه يخمر ساعة و نص فى الصيف يبقى 3 ساعات اكيد فى الشتاء
6- و بعدين نشغل الفرن يسخن جامد و بعدين اجيب العيش ادهن وشه زيت بالفرشاة
براحة جدا عشان ما اطلعش الهواء العجين و ممكن تدهنيه بصفار البيض مع فانيليا بس انا بفضل الزيت
7- تدخليه الفرن على نار متوسطة وبعد مايطلع من الفرن نغطيه بفوطة او بقماشة
نظيفة عشان يفضل طرى و بالف هنا و كلى احلى عيش فينو
وادعى لاختك ام يحيى و مازن
استنوووووووووووو لسه فى باااااااقى
انا كمان عملت اشكال تانية زى ما قلت لكم
**عملت قرص الشمس و طريقته
ان هنا انا فردت العجينة زى ما بعمل فى الفينو بالظبط و بعدين افرد عليها الحشو بتاعى
انا هنا فردت جبنا فيتا مع الزيتون مقطع مع الشبت و لفيتهم رول و بعدين لزقت طرفين
الرول ببعض كويس جدا و حطيته فى الصنيه
** و بعدين جيت بالمقص و قصيت حروف الرول بالمقص بالورب تقريبا
و جيت من قلب الدايرة بتاعة الرول و بقيت اوسع فى العجينة و افرد فيها براحة
عشان الفتحتات توسع و متلزقشى فى بعضها
**و كمان عملت رول تانى و قطعت منه بالسكين عادى
**و عملت رول كمان و قطعت منه مثلثات
يااااااااااااارب يعجبكوا
و عايزة اعرف منكم انا استاهل كام على 10
فى رعاية الله اخواتى فى الله
