السلام عليكم ورحمة الله وبركاته
اخواتي والله اني خجلانه انزل موضوعي لكن قلت يمكن الاقي حل مايخليني اطلع السالفه برا البيت انا وزوجي لنا حوالي 15 سنه وكل هالسنوات في صراع مع هذا الزوج تصرفاته دايم في عجله اوقات يتصرف مثل الاطفال اتحملته سنين طويله صرت ماعاد اتحمل وارد عليه وزادت مشاكلنا وصل الموضوع لمدة اليد وحلفت ان مديتها لاسجنك وصرنا حاقدين على بعض اذا زعل مستعد يسوي اي شي يحبسني في البيت ويرفض يطلعني يعني يقلبها ذل وصرت اطنشه ولاعاد افكر اطلع او اطلبه شي طلبات البيت يجيبها لكن بطرف النفس ويرميها رمي كنت افكر اطلع من البيت واطلب الطلاق لكن عيالي واهلي الي رافضين هذي الفكره اجبروني اتحمل الوضع وعشان عيالك وهالكلام الي انتم عارفينه صرت اطنشه احقره واقوم بعيالي وطلباته نادر ماانفذها صرت حتى الاكل اسوي الشي الي مايحبه وانا والله ابي اذوقه واعامله بنفس اسلوب المذله لانه ماغيره من سنين يعني طلباته ماتمشي نفس الاول مع اني يشهد الله اني سنعه والكل يشهد لكن خلاص الوحده لا لقت الجحود تستخسر فيه والله حتى لما يكون راضي وارضيه انه يستخسر الكلمه الحلوه فيه مره ارسل على الواتسب الله يعطيك العافيه وليته ماارسلها لاني حسيتها ثقيله يقولها بوجهي
المهم ............!!
لما اهملته صار يمسك الجوال ويصور غداه وعشاه واذا لقي شي مونظيف يصوره انا انصدمت يابنات يعني ماتوصل الخسه والحقاره فيه لهالدرجه يعني ماخذه اسلوب اشهر فيك !!! يعني توصل فيك انك تطلع اسرار البيت وتشتكي وتقول شوفو غداها وبيتها وش هالحقاره !!! الرجال اذا الحرمه ماتوفقت معاه طلقها وراحت بحالها مو تكسر عينها !! ادمي زي هذا بالله عليكم كيف اتصرف معاه والله اني افكر بافكار اتعوذ من ابليس تكفوون دلوني انا كارهتته ومستحيل قلبي يصفى عليه يوم من الايام جرح والله مايبرا كيف اتصرف معاه والله اني استحي اقول لاي وحده انه صور قلت له عيييب هذي مهي مرجله ولاهي حركات رجال اتريق على كلامي وراح تكفون دعواتكم يابنات
شاركي في النقاش
سجلي الدخول لإضافة تعليق.
التعليقات
31- اختي دامكم تستقزون بعض
توقعي اي شي منه
وتصويره للناس بأيش مضايقك
فكري بالدائرة الداخلية لعلاقاتك
زوجك واطفالك
هذولا اهم من الدائرة البعيده
المعارف والجيران واهل الزوج
كلهم لا يهمونك بشي
ترى كل واحد لاهي بمشاكله
محد درى عن الثاني
يعني وش بيقولون؟ وسخه؟ مهملة؟
طز يقولون اللي يقولونه
اهم شي انتي عارفه نفسك
وعارفه قدرها وقيمتها
لاتشغلي بالك بتصويره
هالشيء يسيء له هو مو لك
يبين تفاهته وسطحيته
ولو ارسلها لاحد بيستخفون فيه
لانه كشف خصوصية بيته
فلا تحملي نفسك ذنب غيرك
مو معقوله هو يخطئ وانتي اللي تحزني!
مشكلته يدري انك تهتمي لصورتك
ويهمك تكوني مثاليه قدام الناس
وماسك عليك هالممسك
اظهري له عدم الاهتمام
وبيتفشل من تصرفاته
اضحكي وقولي لاتنسى تصور كذا
بهدوء وروقان
هذا اللي بيقهره ويرجعه لصوابه
راجعي نفسك حبيبتي
احسك طيبه ومضحيه
بس مشكلتك سهله الاستفزاز
قوي قلبك وروقي
وعالجي مواطن الخلل بصمت - و
لاحول ولاقوة الا بالله الله يعينك ياقلبي ويصبرك ويسخرلك زوجك ويهديه ادعيلو بالهدايه ادري وصلت معاكي خلاص تعبتي منو لاكن اسمعي الكلام ياقلبي اتغيري وارجعي سنعه مو عشانو عشان نفسك وبيتك وعشان مايلقى عليكي طريق ياقلبي والله يكون ف عونك كثري من الدعاء والاستغفار
- و
- صار تحدي بينكم من يمسك على الثاني زلة ماصارت عشرة وحياة
لاحول ولاقوة الابالله
الله يعينك عليه ويصبرك
مالك الا انت تغيرين تعاملك معاه واسلوبك لان الرجال اذا عاند يصير كور معد يفهم يصير ابله وخبل في تصرفاته - يمكن مو غرضه التشهير ، شافك مهملته و مطنشته فحب يسوي هالحركة عشان يستثيرك و يخليك تكلمينه و تنشغلين به و باللي يسويه ، سوي اللي يعجبك و يريحك و ماعليك من التصوير ، أتوقع 15 سنة كافية لاحتواء شخص ، إذا مافاد الله المستعان ، إذا تقدرين تعيشين لنفسك و عيالك يكون أفضل ...
- الله يكون بعونك ويفرج همك اختي الجئ الي الله داومي علي الصلاه علي النبي صلاه الله عليه وسلم حاولي تقومين اليل اقران اقري سوره البقره قد ما تقدرين اشغلي نفسك بلقرب من الله لا تجعلينه شغلك الشاغل وش سوي وش ما سوي شوفي طالما انتي دايم تفكيرك فيه ماراح ترتاحين لا تجعلينه كل حياتك اهتمي بنفسك بعيالك اسعدي نفسك تري مو مجرد كلام اقوله لك فعلا احنا ليه ما نسعد نفسنا ليه نقعد نفكر بفلان وعلان وناسين نفسنا العمر مره وحده بس بنعيشه خلينا نعيشه واحنا مرتاحين طنشي قد ما تقدرين لا تتدققين علي كل شغله هو يسويها وعيشي حياتك ولا تعتقدين انك ما تقدرين لا تقدرين اذا قربتي من الله والله العضيم اشياء كثييير تهون اشياء انتي ما كنتي تعتقدين انك ممكن تقدرين تسوينها راح تحسينها هينه راح تتغير حياتك بلكامل بئذن واحد احد لاكن ثقى بالله وكلي امرك له والله يفرج همك وهم المهمومين
مواضيع مشابهة
تابعي تجارب أخرى من هذا القسم.