قصة ولادتك + نصائحك

8 فبراير 2017

سلمكم الله
ماعاد اصدق هوال منيثي هههه كلام الحريم اقصد بوصف الولاده يعني الالم موب موت مثل ماقالوا الله مايكلف نفس فوق طاقتها

انا كنت امشي من الشهر السابع وجسمي مرن تعود عالمشي يعني غلط تنسدحين طول فترة الحمل وتجين تمشين بشهرك الاخير هاذا اكبر غلط
الشهر السايع والثامن امشي بالاسبوع مره ٦ كيلو وشهري التاسع قضيته نوووووم وراحه اوفر الجهد للولاده
وبالتاسع سويت التمرين اللي تحطين يديم على خصرك وتتحركين مره يمين ومره يسار هذا يساعد البيبي ينزل تحت مره كل يوم اسويه واتحمم بمويه اقرب للساخنه واركزها على بطني وظهري
المهم بنفس اليوم اللي محددينه لي الاخير من التاسع الساعه ١١ ونص قبل الظهر انسدحت باخذ لي غفوه الا سمعت صوت زي الفقاعه مرتين ورا بعض ووقفت بسرعه وعالحمام لقيت نفس افرازات التبويض كثيره وغليظه وبدم عرفت انها السداده قلت بس ي حرمه جاك الموت اللي يقولونه الحريم ههههه وانا اتروش بمويه حااااره يعني شوي وتحرقني صراحه وركزتها على بطني واخر ظهري وشلت جسمي وجهزت نفسي والوضع عادي ماحسيت بشي وشغلت رقيه للولاده باليوتيب واسمعها واردد معها لما جا العصر واسوي لي كوب زنجبيل ومعه صحن رطب والوضع الى الان عادي ويصحى زوجي من النوم وقبل يطلع قلت ابي اروح اشيك عالوضع قال فيك شي قلت لا بس اتطمن حاسه بولد قريب
والبس ولدي البكر ووقتها حسيت بشد مسك بطني ثواني وراح واروح للطواري وقالت ايش فيك قلت السداده نزلت بس وجيت اشيك وتفحصني قالتت واحد سانتي بس الراس ماشا الله هذا هو حسيته بأصابعي قلت طيب متى تتوقعين اولد بعد كم يوم قالت قولي بعد كم ساعه هههههه كانت الساعه ٦ الا المغرب وقالت تبين تجلسين او تروحين وترجعين لي الساعه ٩ العشا قلت لا بجلس وراح زوجي يجيب شنطتي وللحين ماحسيت بشي ابد ولما جلست بالعربه وطلعوني للتنويم بدأت احس بطني يوجعني كأن الدوره بتنزل المغص يمسكني ثواني ويفكني وبعد ١٠ دقايق يمسكني ثواني ويفك هذاهو الطلق وكنت جوعانه مره والاقي على الطاوله جنبي التمر المغلف يوزعونه بالمشفى مع الوجبات واكلهم يمكن ثلاث حبات والمغص صار يطول ويفكني ٥ دقايق وهكذا وجت فحصتني قالت ٤ سانتي بنطلعك لغرفة الولاده واخذوا اغراضي حتى الشراب نزلوه ونوموني بسرير جنت غرفة الولاده وركبوا حق الطلق التخطيط ويبدأ المغص يزيد ويوجع اكثر مره كانت الساعه ١١ واسمع صراخ الحريم وانا خايفه كل شوي اقول بعد شوي بوصل لهالمرحله واصيح مثلهم ومن الخوف ماصحت بس اتنفس من قلب شهيق زفير اذا جتني الطلقه وحسيت انه يخف الالم صراحه وجت فحصت قالت ٨ سانتي وراحت وعيوا يعطوني مسكن ابد قلت طيب بس حطي لي حق الغثيان خايفه استفرغ وحطت لي مع الغذايه ومن كثر ماكنت عالصامت بس اتنفس من قلب فقدوني يجون يطلون علي خايفين متت والا شي ههههه
المهم على الساعه ١ بدا شي يدفع خلاص واناديها قالت عادي ماما وتخليني وجنبي وحده تصارخ وقطعت ملابسها والستاره وانا اقول ياويلي اكيد شوي بسوي نفسها الا جتني النيرس وقالت يلاا ماما انزلي بنروح لسرير الولاده وانزل من السرير وتمسكني طلقه واتمسك بقوه بحديد السرير واقول لها استني لما يفكني المغص وتقول لا لا بسرعه انتي ولاده هنا اللحين واناظرها بنص عين اقول كيف بولد اللحين ماجاني الموت اللي يقولونه الحريم تستهبل ذي واضحك منها ماني مصدق
ويسدحوني على السرير ويشبكون رجولي ويعلموني كيف لو جا دفع اتمسك بالمسكات الحديد والتموا حواليني وفكت المويه الا جتني طلقه على طول قويه مع دفع واضغط بقوه وجتني مغصه ثاني مع دفع وماكملتها الا بنتي طالعه والمشيمه وراها على طول وكلهم يصفقون ماشا الله ماشا الله والدكتوره تقول ماشا الله ولادتك مره سهله ويحطون بنتي على صدري ياحلوها فديتها اختفى كل الوجع والالم والدموع كلها راحت من طلعت وجت على صدري ومت من البرد وقتها وغطوني ببطانيه دافيه تجيب العافيه ما انساها طول عمري
والحمدلله
نصيحه لاتصدقون كلام الحريم وكل وحده وجسمها وطاقتها وقدرة تحملها وياربي لك الحمد

التعليقات

قصة ولادتي بكورونا ولادة ( )٣

قصة ولادتي وانا مصابه بكورونا الحمدلله

و هذي قصة ولادتي القيصريه )) و كل وحده خايفه من القيصريه الثانيه تعالي

حبيباتي عدت اليكم من جديد مع قصة ولادتي

قصة ولادتي 😊