والله العظيم اتمنى اني اعيش بمشاكل ماتخلص ولا اعيش هذا الوضع 💔

صباح الخير
يسعد لي صباحكم
بنات انا فعلا ً احس ان حالتي غريبه ويشهد علي الله اني كل احساس كتبته هنا صح وماكتبته الا فعلا ابي حل
باحاول اختصر السالفه
انا اذ قعدت فاضيه اروح اتفحص جسمي لو الاقي لو شي بسيط اقول شكله سرطان ولو احس بظهري يومين وراء بعض يعورني اقرا بقوقل يقولون يمكن ورم اروح مستشفيات واشغل العالم تحاليل واشعات واخر شي يطلع سليم
والله اكثر من موضع بجسمي احس فيه اقرا عنه ع طول للمستشفى
المشكله مو هنا اليوم رحت اتفحص فمي لقيت بالخد من داخل كان فيه بقعه رماديه كان فيها بياض خفييف متساويه مع الجلد وفيها عروق حمرا وزرق وسوست انه سرطان بالفم ورحت قريت وقالوا يمكن سرطان ويمكن لاني مركبه تلبيسه ببعض الاسنان
عشان خاطري اللي تقرا تشوف بفمها كذا او لا ؟ والله جد اتكلم !! 😿💔
اخر مره رحت للدكتور وسوا تحاليل على الكلى لاني كنت اشتكي من جنبي وقلت له الاعراض قال انتي مافيك شي قلت سوا تحاليل بالغصب سواهن مع ان الاعراض ماتستدعي وسوا وطلعو النتيجه قال وش تبيني اسوي لك اتبلاك بمرض عشان اعطيك علاج نشبت له
ايام الدراسه جتني عين ع كلام المشايخ كنت طايحه بالفراش اروح للمستشفى الله يكرمكم وانا استفرغ 3 مرات وكل التحاليل سليمه واطلب تنويم عشان الاختبارات ماقدر اروح الا بعذر طبي ومافيني طايحه على الفراش وقتها جاني وسواس الموت وعدت الحمدلله
مرتين بالحياه تجيني نوبات الهلع عسى ماحد تمر عليه
قبل سنتين مريت باصعب مراحل حياتي واعتذر عن التفاصيل
المشكله مو هنا المشكله والله اني احس مشكلتي نفسيه او وسواس مدري وش بالضبط
وصلت فيني المواصيل اتمنى عندي حموله اتهاوش معهم واخذ واعطي
اتمنى اني ادخل بمشكله واطلع بمشكله اتمنى زوجي يقعد بالبيت كثيرر
عشان اتهاوش معه ولا اعيش بالحاله ذي
واذ جتني هذي الحاله ماحب اقعد بلحالي ادق على خواتي او صديقاتي اسواف
احس لو قعدت لحالي وافكر يرتفع معي القالون ولا اكل لاني افكر ان فيني مرض خطير بس اذ صرت بجمعه ومناسبه او مشغوله ماتجيني هذي الحاله مدري وش اللي فيني بالضبط
يعلم الله ماكتبت هنا الا انا واثقه بانكم بتعطوني حل لمشكلتي والله لايجعل احد يجيه اللي جاني

39 تعليق 16,280 مشاهدة

شاركي في النقاش

سجلي الدخول لإضافة تعليق.

التعليقات

38
  1. @anyn_ohnyn

    والله انا مثلك تماما
    اي الم احس به في جسمي اقول اكيد سرطان
    ولي شهر تقريبا احس بالام في اذني وخايفة يكون مرض خبيث
    انا ماجاني هذا الاحساس الا بعد ماعشت مع امي الله يرحمها معاناتها مع السرطان
    والله اكلها المرض اكل
    وحتى خالي جاه نفس المرض
    والان فكرة المرض مسيطرة على تفكيري
    الله يلبسنا لباس العافية ويمتعنا بصحتنا
  2. @kmr_khaft

    الاعتراف بالمشكله هو نصف الحل
    انتي طيبه ومافيك الا العافيه
    كآي وسواس علاجه هو الاستغفار والتسبيح حتى يطرد هذا الشيطان
    استغفري الف مره اول ماتحسي باي وسواس واسترخي واغمضي عينك وتذكري نعم الله عليك هل تستحق الجحود منك ! ام الشكر
    اذا الهجي عودي لسانك على الشكر انظري حولك منزل عافيه شبع امن اشكري الخالق ولا تنظري الى السلبيات في ايييي شي بالحياه
  3. @abo_frh_2

    انا فيني جرثومة معده وتجيني الاعراض اللي تجيك بس احس بآلام لكن الاعراض النفسيه نفسها بالضبط خوف من الامراض خوف من الموت بس دامك قلتي فيني استفراااغ روحي افحصي عن جرثومة المعده انا جتني الجرثومه عن طريق عين ولها سنتين والله يشفيك ويشفي جميع مرضى المسلمين وترى كشفها بسيط تحليل بالنفخ بس لازم تكونين صايمه ودامك ماتحسين بالام تتعبك ان شاءالله مافيك الا العافيه لاني انا احس بالام شديده مرررره
  4. @abo_frh_2

    أبو فرح..
    انا فيني جرثومة معده وتجيني الاعراض اللي تجيك بس احس بآلام لكن الاعراض النفسيه نفسها بالضبط خوف من الامراض خوف من الموت بس دامك قلتي فيني استفراااغ روحي افحصي عن جرثومة المعده انا جتني الجرثومه عن طريق عين ولها سنتين والله يشفيك ويشفي جميع…
    انا جديد بالمنتدى ولا اعرف كيف اتعامل معاه زين وهذا اول تعليق لي هل الطريقه صح هههه لاني بصراحه اول مره اسجل بمنتدى عجبني المنتدى لمن صرت اقرى عن اعراض الجرثومه وسجلت
  5. @smahr_39

    صاحبة الموضوع
    أبو فرح..
    انا فيني جرثومة معده وتجيني الاعراض اللي تجيك بس احس بآلام لكن الاعراض النفسيه نفسها بالضبط خوف من الامراض خوف من الموت بس دامك قلتي فيني استفراااغ روحي افحصي عن جرثومة المعده انا جتني الجرثومه عن طريق عين ولها سنتين والله يشفيك ويشفي جميع…
    لا ياقلببي الحمدلله راحت الاعراض حقات الاستفراغ الله يكرمك يوم تخرجت
    لكن مشكلتي اللحين اللي ذكرتها تتعلق بموضوع ثاني

تابعي تجارب أخرى من هذا القسم.