اخصائية جلدية وتجميل للرد على استفساراتكم مجانا

زى ما العنوان مكتوب بالظبط :
معاكم الدكتورة صفاء أبو العزم اخصائية الجلدية والتجميل والليزر .. واللى عاوزة تتأكد اكتر تكتب فى جوجل أو اليوتيوب : دكتورة صفاء أبو العزم ..

أولا : قبل ما الطب يكون مهنة ده خدمة إنسانية .. دورنا إننا نخفف عن الناس أوجاعهم .. دورنا أننا نكون سبب سعادتهم .. وبدون أى مقابل .. ده القسم اللى أقسمنا عليه لما اتخرجنا من كلية الطب ..
لما فكرت أتخصص فى قسم الجلدية والتجميل كان أهم سبب بالنسبالى إنى أشوف البسمة فى عيون كل مراجعينى لما يحققوا كل اللى نفسهم فيه ..
أنا مش برد عليكم علشان تراجعونى فى عيادتى .. ولا برد عليكم علشان أى هدف مادى .. كفاية عليا دعوة حلوة من قلوبكم الجميلة ..
كفاية عليا إنى أرضى ربنا سبحانه وتعالى وحبيبنا النبى محمد صلى الله عليه وسلم لما قال : " إذا مات ابن آدم انقطع عمله إلا من ثلاث : صدقة جارية .. أو علم ينتفع به .. أو ولد صالح يدعو له " .
وفى حديث آخر : " أفضل الصدقة أن يتعلم المسلم علما ثم يعلمه أخاه المسلم " .
فأنا مينفعش أكتم علم اتعلمناه .. مينفعش اتجاهل سؤالكم ولا احتياجكم ..