تعبت نفسيتي بسببه

السلام عليكم يابنات
هذا يابنات متزوجة سنة ونصف من واحد يا الله منه
مدري كيف اوصف عيشتي معاه
ماني متهنية ابدا معاه للرجال هذا
طبعه لئيم معاي يهيني ويجرحني على طول بكلامه احسه مايتهنى الا لما يجرحني ويهين كرامتي
يصرخ علي ب اتفه سبب وكله يتكدر لي هو واهله
ويقولي انا كذااا طباعي
وانا ساااكته ما اقول شي له
فوق م انا اصرف على البيت وادفع نصف الايجار معاه وفواتير كهرباء ومياه كله علي
يعني راتب وظيفتي وايرادات المشروع لي داخلته مع اختي كله يروح مصاريف لبيتي
ما اجمع شي
وهو راتبه بالاصل ضعيف وكله يروح مصاريف له ووضعه المادي صعب
دخان كل يوم لازم اكثر من 60 ريال مصاريف دخان
بالله عليكم هذا عقل يتحملها
60 ريال تفطرنا وتغدينا وتعشينا وتخلينا ننام مستورين ببيتنا
60 ريال ناس يشتهون ريال منها
للان ماصار حمل بينا ومو راضي يحلل كله يتهرب من هالموضوع ويجرحني ويهين كرامتي
ماعنده طموح ولا شخصية ابدا ولا شي
خرب علاقتي ب اختي
هذا اختي من ابوي علاقتي فيها قوية جدا وفاتحين مشروع مع بعض وتتسلف مني واتسلف منها
يعني احنا ستر وغطا على بعضنا
جات اخر مرة اتصلت علي تبغى تتسلف مني مبلغ عشان ولادتها ويجي يسمعها كلام وذيك سكرت ومن يومها صارت علاقتنا عادية وتسلك معاي وتتحاشى تفتح الموضوع
فوق كل هذا يبغى يخطب علي مطلقة وعندها ولد وبنت ويبغى يتزوجها
كيف يتزووج وهو وضعه المادي صعبببب ما اجامل على نفسي ولا اقصد اي شي بس والله انا لي شايلة كل مصروف البيت علي
طفشت منه ومن اهانته ويبغى يمارس علي دور الزوج المتسلط يبغى يستأجر شقة لزوجته الجديدة تحت شقتي وكله يقولي بسفرها برا هي وعيالها شهر عسل
وبعدها يقولي بالعدل لك سفرة مثلها بس انتي تدفعين فلوسها
بعدين يقولي اذا مو عاجبك خلاص تروح السفرة لها
شوفو كيف يتكلم معاي
وغيره كثير اهانات لي هو اهله
قمت اغار من علاقة اختي مع زوجها كيف علاقتهم حلوة وبينهم طفل وعايشين بهناء ورفاهية وسعادة
وعلاقات صديقاتي مع ازواجهم
وهو مو حاسس فيني ابدا
وجا قبل اسبوع يقولي قررنا نسوي حفلة انا وهي ونجيب ابنها وبنتها ينامون عندك
شوووفو الوقاحة بقى انا هنا قمت عليه وقام يصرخ فيني ويسبني ويقولي احلف ما ادخل غرفة نومك اربع شهور
يومها قررت اشكي ل اخوي وتكلمت له شوي والله برسالة وحدة
بس قاله خيريافلان وش فيك مع اختي
انقلب وصار مثالي ويتودد لي وبعدها قام يسب اخواني ويسب امهم وابوي ويرجع يتوعد لي
هم بالاصل اخواني من ابوي بس مافي اي حساسية بينا بالعكس علاقتنا ممتازة وهو يبغى يفرقها بينا كله يحرضني عليهم
مع العلم يخااااف من اخواني وخصوصا ابوي وهو مريح لاني مستحيل اشكي لهم
كل مايشوف ابوي يبي يزورني ينقلب 180 درجة
وابوي مايحبه بالاصل ولا يطيقه
انا خلاااص ودي اتطلق منه واشوف مستقبلي ويمكن الله يعوضني بزوج ثاني احبه ويحبني
كافي اهانات وتجريح وش لي جابرني اعيش حياة مثل هذي ولا فوقها يبغى يتزوج علي وحدة ثانية وش ذنبي اعيش ضرة وانا عمري لسا 26 سنة وموظفة وابووي عنده خير كثير ولله الحمد
وش يجبرني اكمل حياتي مع انسان معقد نفسيا مثله يبغاني جارية عنده وخدامة