مواقفكم اللي ماتنسي بعزايم رمضان 😩😭😑تعالوا اقول لكم موقفي

مره كنا ناوين نعزم ع الفطور وبديت من الليله الي قبل اجهز الاغراض والنواقص واخر الليل زوجي بدى يعزم ناس قالو جايين وناس اعتذرو طلع واحد من جماعتنا بنفس الوقت يعزم للفطور طبعا فطور دوري نعزم
فصار صعبه نعتذر الي وصلتهم دعوه
يوووووووه اصعب واتعب يوم مر عليه ف حياتي زوجي نط قال بعزم جيرانا عوايل
اخ بس ياوقتها انحست بس ربي يسرها وكل شى تمام بس الشربه طلعت ثقيله مره
والخبز نشف وصار قاسي ماعرف ليه ولاعمرها صارت لي ابد
ومره جاء زوجي الساعه ٢ الظهر ويعزم للفطور خواته ٢ وازواجهم وعمي وزوجته وطيران اجهز يدوب لحقت اجهز ايدام شربه مكرونه سمبوسه لقيمات وعصيرات وقهوه وتمر حسيت الكميه قليله فشله واللقيمات مازبطت مره

ي ويلي اتخيل شكلك وانت تركضين

بس احس لما يكونوا رجال لحال اهون من الحزيم

يالله ٣٠ شخص كيف لحقتي عليهم 😢😢

وقت العزايم تتوتري وفيه اشيا دايم تزبط معك بس مع التوتر تخرب

موقف ما انساه ما حييت .. اول ما تزوجت ما كنت اعرف اطبخ .. يمكن حلويات فطاير بس عيوش وطبخات ثقيلة لا .. وكان الفطور تسويه خدامة خالتي الله يرحمها وانا كنت انزل بفطاير .. المهم ان ذاك اليوم انحاشت خدامة خالتي وكانت توها جديدة .. وطبعا مافيه غيري بالبيت يطبخ العيش لان خالتي حرمة كبيرة وانا توليت مهمة الافطار ذاك اليوم .. سويت شوربة ومرق لحم حق التشريب وسويت عيش والمصيبة كانت بالعيش ... انا عليمية ولا عمري سويت عيش ..الجدر صغير وترسته عيش ومبطله الغطا مال الجدر ..وعيا يستوي العيش ..امسكه حب واقعد ازيد الماي وكل شوي ازيد الماي اذن المغرب والعيش عيا يستوي وانا ازيد بالماي
دخل زوجي يسال وين العيش بسرعة اذن قتله عيا يستوي قال انشبي خلاص ما كو وقت اذن .. نشبت يا بنات العيش حب من فوق وعجينة من تحت والماي بقاع الجدر متروس .. قعدت ابجي ولا افطرت ذاك اليوم من الحرة .. وخالتي يمال الجنة قامت تمدح عيشي ما تبي تفشلني