ذكريات الأمس :

السلام عليكم كيفكم بنات..وكيف الريجيم معكم .. ردي بيكون طويل بس اعتقد انه يستحق القراءه من مجربة بصراحة انا متابعتكم من فتره طويلة ..واشكر الكيكة من كل قلبي اللي فتحت عيوني على هالريجيم الرائع والصحي.. بصراحة انا كنت متابعة التجمع الأول وهو اللي ساعدني على بدأ الريجيم قبل 3او4 شهور ما اذكر..والآن متابعة الثاني.. بس ما كنت اشارك معكم لأني ما ألتزم 4او 5 ايام بالكثير واكسره .. والسبب ماهو بصعوبته ..بس بسبب الالتزامات الاجتماعية..وحنا عائلتنا تجتمع اسبوعيا .. فنادرا ما اقدر اطول عليه.. دخلت اليوم علشان اقولكم اذا كسرتوا الريجيم لا تيأسون وتحزنون ومن بكره ابدأي ثاني مره.. لأني اختكم في الله(اللي هي انا) نزلت عليه الى الآن 13 كيلوا..وانا ما كملته ولا مره وحده.. واكثر مره استمريت عليه كانت 3 اسابيع ..وبعدين خلاص كم يوم واكسره..بس باليومين او الثلاثة اخسر من 1,5 الى كيلوين...حسب اذا كنت مسوية رياضة او لأ... الأشياء اللي حبيت افيدكم فيها هي الآتي.. اولا: اكبر غلط انك تسوين الريجيم علشان الأجازه جات والعروس بدأت..لازم تسوين الريجيم علشان نفسك وصحتك في المقام الأول..واكيد انك ما تحبين توصلين الى سن الثلاثين وتبدأ معكي امراض السكر والضغط ..وتكونين ما تهنيتي بشبابك... ثانيا : انتي تستحقين انك تعيشين حياتك بسعاده..بجسم رشيق وهمة عالية ..وصحة موفوره بأذن الله... فليش تخلين رغبة معينة تسيطر عليكي... العمر يجري...واذا ما اتمتعتي بجسمك وانتي بشبابك متى بتتمتعين اذا كبرتي وبدأت الترهلات والتجاعيد والأمراض...وساعتها حتى لو تنزلين بالوزن ما راح تكونين مبسوطة لأنه الآن همك الوحيد لكن بكره عندك ألف هم.... ثالثا: اذا اشتهيتي اكل معين طلعي ورقة واكتبي فيها اللي اشتهيتيه ..علشان تكافئين نفسك فيه اذا وصلتي للوزن المطلوب.. اذا انتي ما راح تنحرمين منه طول عمرك..هي فترة كم شهر الى ما ينزل وزنك..وبعدين ترجعين مره ثانية تاكلينه من غير خوف لأنك تقدرين ساعتها تتحكمين بوزنك اللي ما وصلتيله الا بعد تعب... يعني آكل اللي ابغاه بس اهم شي احرقه بالمشي او الرياضة..لأن ذيك الساعه مافيه شحوم بجسمك ما فيه غير هاللي اكلتيه يحرقه ... لكن ألحين شوفوا الحالة كيف ..تشتهين الشي قوة..وتكسرين الريجيم عشانه..واذا شبعتي بدأ تأنيب الضمير وحالة الاكتئاب.... رابعا :لاتوزنين الا في نهاية الاسبوع..لأن السوائل تلعب بالوزن كثير..توزنين اليوم تلقين نفسك زايده بالرغم من انك امس كنتي ناقصة ..فتنهارين وتقولين ما فاد معي انا الميزان شلته عن عيوني ما أطلعه الا نهاية الأسبوع او اذا كنت ابكسر الريجيم.. ألحين انا في بداية الأسبوع الثاني ..خسرت الأسبوع الأول كيلوين من غير رياضة بالعكس كنت مريضة وبالفراش طول النهار...واتمنى ان وزني ينزل بسرعه.. لأن الآن فترة امتحانات وكلا قاعد في بيته...وهالشي يساعد على اتمام الريجيم كتبت هالكلام من حبي لكم ..وشعوري اني لازم انقل تجربتي لكم...يمكن لو وحده تستفيد منها... اتمنى لكم عزيمة مثل الحديد.....

السلام عليكم كيفكم بنات..وكيف الريجيم معكم .. ردي بيكون طويل بس اعتقد انه يستحق القراءه من...