كلامك درر
وانا مقتنعه فيه لكن شهيتي للطعام مقتصره على الاكلات الدسمه والحلويات
الاكل الصحي ما استسيغ طعمه وهذي مشكلتي
الصفحة الأخيرة
خلينا نتفرض انه اقتنعنا بالنظام الصحي واخدنا نظام حياة وقررنا نخسر وزن ونكسب عضل وصحة, وعملنا شوية دراسات وعرفنا المجموعات الغذائية وعرفنا التمارين وطريقة ممارستها صح وصار عنا فكرة واضحة عن شو لازم نعمل لنوصل لهدفنا...
بتيجي المشكلة الي بتواجه خليني احكي 80% من الناس وهي انه ببلش متحمس وبعدين بتفتر الهمة وببلش يتحجج بأعذار لحتى ياكل مثلا حبة شوكولاتة او لحتى ما يتمرن اليوم وياخده يوم راحة.... كلنا مرقنا بهالشي...
وعلى الاغلب بتخلص القصة بانه حبة الشوكولا بتجر وراها اشياء كتير زاكية , واليوم الراحة بجر وراه ايام, وهيك بنكون فعلا انجرينا ورى رغباتنا وفرحنا لفترة وقتية وبعدها بندخل بمرحلة تأنيب الضمير لمدة يوم او يومين وبننسى وبنرجع لحياتنا القديمة وعاداتنا المضرة.
لو تسأل اي بنت ليش هيك صار معك؟ بتقلك ببساطة ما عندي ارادة او ارادتي ضعيفة او مالقيت الحافز او بلشت متشجعة وبعدين مليت وغيرها من الحجج...
*لو الوقت الي بنقضيه واحنا بنفكر لنخترع حجج قضيناه بالتفكير كيف رح نستمر كان حالتنا بتكون مختلفة تماما
هالي النقطة انا بلشت آمن فيها وبلشت لما اصير افكر بالاعذار احاول انه اغير تفكيري وافكر بطرق لأكمل الي بدأت فيه, بالنهاية الحياة ماشية وما عم تستنى اي حدا فالك الخيار يا بتلحقيها يا بتضلي قاعدة تتفرجي من بعيد على الناس الي لاحقتها وعايشتها صح.
بالنسبة للارادة رح احكيلكم خلاصة تجربتي الي مدتها 33 سنة :) وطبعا لا تفكروا اني نجحت بخسارة وزني, لا بعدني سمينة, لكن مجرد ما غيرت تفكيري وغيرت نظرتي لنفسي قدرت اعرف اغلاطي وين وكيف كنت بتعاطى مع الامور سابقا وحاليا بلشت اغير شوي شوي ويارب اشوف نتائج بترضيني :)
أهم نقطة لازم تخليها دائما ببالك وتضلي تذكري حالك فيها يوم بيوم وساعة بساعة وهي:
* الارادة متل بطارية التلفون بس تخلص بدها شحن مرة اخرى
مثلا لو تلفونك خلصت بطاريته وطفى شو بتتصرفي؟
بتقولي خلاص خرب التلفون وبترميه وبتعيشي بدون تلفون او بتشتري واحد جديد؟
او بتقومي بتحطيه على الشاحن وبتشحنيه من جديد؟؟
هيك الارادة, كل حدا فينا بطاريته مختلفة عن غيره, في ناس بطاريتهم (ارادتهم) بتكون طويلة المدى وفي ناس قصيرة المدى.
المطلوب منك بس تخلص هالبطارية تشحنيها وما تستسلمي.
القصة مش اختراع مفاعل نووري, القصة سهلة جدا المطلوب منك بس تكوني صادقة مع نفسك وراغبة فعلا انه تتغيري لاجل نفسك فقط.
رح نرجع نحكي بعدين عن الهدف وتحديد الهدف.
بس لما تشوفي حالك خلاص قربتي تزهقي وبلشتي تتعبي المفروض تعرفي بطاريتك(ارادتك) كيف بتنشحن, والناس مختلفة ما بيشبهوا بعض.
في عدة طرق رح اذكر منها:
الكتابة ورح احكيلكم بالتفصيل عن كتابة اليوميات وتاثيرها على التغيير والنفسية.
تحديد الاهداف الي مشانها حابة تخسري وزن.
الكلام مع صديقة بتشجعك دائما او مع عدة اصدقاء.
شراء لبسة حابة انك تلبسيها لما تنحفي او لو عندك لبسة قديمة طلعيها وخليها بوجهك ليل نهار.
الصور لو كنتي رشيقة سابقة خلي صورك القديمة بوجهك وبكل مكان خصوصا على الثلاجة :)
عبارات تشجيعيه بتلاقيها بكل مكان بالنت اكتبيها او اطبعيها وخليها دائما قدامك.
خلفية الموبايل وخلفية الكومبيوتر خليهم شي مشجع مثلا صورة لقصة ناجحة قبل وبعد.
احتفظي بعدة صور قبل وبعد وعدة قصص لناس نجحوا في خسارة وزنهم وضلي كل يومين اقرأيهم وتفرجي على الصور.
احكي مع حالك دائما واقنعي اللاوعي عندك بانك رح تنجحي ورح تكملي ورح تكون حياتك افضل واحسن ورح تحصلي على الجسم الي بدك ياه, هالشي ضروري يكون قبل النوم لانه اي شي بتفكري فيه قبل النوم بيترسخ اكتر باللاوعي عندك, هالطريقة تاثيرها سحري ومجرب :)
وفي كتير اساليب تخليكي تشحني ارادتك, ابحثي عن هالاساليب وانت بقمة الارادة واحفظيهم مشان لما تخلص ارادتك تتطلعي عليهم, صعب كثير تكوني مارقة بحالة الاحباط وتيجي تدوري على شي يرفع معنوياتك, فنصيحتي مثل ما بتجهزي الاكل والتمارين جهزي قائمة بالمحفزات اليومية لحتى تكملي.
جهزتي كل شي وبلشتي نظامك متحمسة ومرقت الايام وبلشتي تحسي بفتور واشتهيتي اكلة غير صحية, انت قدام خيارين:
الخيار السهل انك تروحي تاكلي منها.
الخيار الصعب انك تشحني ارادتك باختيار عدة طرق من الي ذكرتها او غيرها.
بالحالة الاولى رح تفرحي وتنبسطي لفترة ساعة او ساعتين وبعدها تانيب ضمير واسوأ شي حالة عدم الرضا عن النفس وكره الذات ويمكن تصيبك انتكاسة وتبطلي تكملي دايت.
الحالة الثانية رح تتعبي لمدة ساعة او ساعتين وانت تقاومي ولكن بعدين رح تاخدي دفعة معنوية تكفيكي ايام عديدة لحتى تستمري غير عن حالة الرضا عن الذات والانبساط.
السؤال كيف اقرر اي حالة اتبع؟؟؟ الخيار المنطقي بقول انه الحالة الثانية والاصعب هي الي لازم اتبعها, لكن هالشي مش سهل وكلنا بنعرف هالشي ومرقنا فيه.
انا بجيب الاكلة الزاكية قدامي وبجيب كل المحفزات وخصوصا كتاباتي القديمة وببلش اقرا واتفرج على الصور واكل, اول مرة باكل 6 او 7 ملاعق وبوقف وبعدين بتبلش تخف لحد ما اوصل انه ممكن اكل معلقة من الاكل الي بحبها وبكتفي وبستمر وهالشي كتير حلوو وبطلع كسبانة على الجهتين:)
ان شالله تفيدكم تجربتي :)