اهم شي تتغطين زين رجولك وراسك
وقشر القهوه مره حلو يشيل البطن
وخلطة العتيبيات مره حلوه مع الحليب ومع الشوربه والمرقه مع الاكل بشكل عام مره حلوه
تقومي بالسلامة يارب

اهم شي لاتكثرين من الاعشاب
عليك ب الحلبه مع التمر اول عشرين يوم واشربي كاسة حليب بحلبه مره وحدة في اليوم
وال20 الاخير تمر برشاد
والاعشاب اشربي يانسون عن المغص فقط واشربي قشر قهوة مهمه تنظف الارحام وتنحف واعتمديها يوميا ،،
اهم شي لاتجوعين ولاتاكلين من المطاعم انصحك ب اكل البيت فقط من مرق واكل شعبي
واشربي شاهي الاعشاب للنحافة زنجبيل مع شاي اخضر مع قطعة ليمون مع نعناع حطيهم بترمس وصبي عليهم ماء مغلي وحليها بعسل افضل من السكر
واهتمي بشعرك ووبشرتك وبجرح الخياطة اهم شي لايجيك شمم يتعبك

رفع

مرحبا حبيبتي وربي يتمم حملك ويقومك بالسلامه انتي وطفلك 💕

انا والد لي اربع شهور وحبيت افيدك بتجربتي بالنفاس واكتب لك كل شي اتذكره وما ابي الا دعواتك الجميلة ❤


1/ اول شي اعتقاد خاطئ انك تجلسين متسدحه طول الاربعين لازم من اول يوم تحاولين تقومين بالراحه وبشويش ع نفسك
2/ تدفي تدفي تددددفي ضروري تدفين نفسك وخصوصا الحين الاجواء باردة واشتري مشد واستخدميه بعد اسبوعين تقريبا
3/ رتبي وجهزي اغراضك من بدري سواء الخلطات او دواليبك او اغراض البيبي وطبعا شنطتكم حقت المستشفى وكثير مواضيع بالنت عن ايش مفروض تاخذين ولو زوجك بيرافق معاك جهزي له شنطه صغنونه 
4/ بالشهر التاسع اذا انتي باقي ماولدتي كثري مويه وتمر وخليه مفرد اتباع للسنه و تدربي على طريقة التنفس لانها راح تساعدك بعد الله في تيسير ولادتك والطريقة بسيطه : شهيق من الانف والفم مسكر وبعدها تزفرين من فمك + تمارين الحوض واذا عندك درج اطلعي كم مره بس باليوم بدون ماترهقين نفسك واذا حابه تمشين امشي عالراحه بس اذا ظهرك يعورك او ركبك بلاش 🙅
وفي سكوات للحوامل وطبعا كمان لاتسوينه بتعب واذا خايفه انه ممكن تسوينه غلط او يأذي ظهرك كمان بلاش منه
5/ اشتري طشت للتنقيع ينباع بالصيدليات لان راح تقدرين تتنقعين فيه من اول الايام وراح تعطيك دكتورتك غسول مثل بيتادين تحطينه بمويه دافيه وتجلسين فيه ربع ساعه تقريبا ، انا كنت اتنقع بمر (والمر اكون حاطه قطعه صغيره بعلبة مويه كم ساعه وبعدين اخذها الحمام الله يكرمك واحط ربعها بس بمويه وقالت لي صاحبتي انو مو كويس للغرز لكن ماشفت اي ضرر) وتقدرين تتنقعين بمويه دافيه وملح خشن يعني عندك كذا شي .
6/ قبل الولاده جهزي مر كم قطعه ومعاها شاش عالجنب بس بمجرد ماتحسين بطلق نقعيها بمويه وغرقي الشاش وشميه او تعطري عشان بعدين لاتستجرح المنطقه وبعد الولاده اشربي مره ثلاث ايام ورا بعض .
7/ تقدرين تتروشين من اول يوم لكن انا ما انصح .. تروشت ثاني يوم لما طلعت وبحالتك انتي جهزي حمامك وشغلي الحار لين يدفا الحمام واجلسي ع كرسي الحمام وانتي بكرامه ومدي الشور جنبك وخليك لافه منشفه عليك وبسرعه تروشي والبسي عشان لايدخلك هوا 
8/ النفاس مقسم لقسمين : العشرين يوم الاولى تاخذين حلبه وطريقتها ( تطبخ ملعقه حلبه حب مع كوب ونص ماء و10 حبات تمر يشرب دافئ  لمده 20 يوما ويعمل على تنظيف الرحم ) 
والعشرين يوم الاخيره تاخذين رشاد وطريقته ( ملعقه صغيره رشاد "ملعقة الحلا الصغيره" وتفتح التمره  ويوضع الرشاد داخل التمره  وتوكل ويشرب بعده حليب دافى ، هذي الخلطه مفيدة جداً للظهر )
بالاضافة لخلطه سويها وخذي اغراضها من محل عطاره نظيف ( كراويه + يانسون + شمر ... تغسل وتجفف ثم يأخذ مقدار كوب من كل نوع وكوب زنجبيل و ربع كوب فلفل اسود وربع كوب حبه سودا وتطحن مع بعض توضع في قاروره ثم يؤخذ مقدار ملعقه من المطحون وتضاف للحليب مرتين في اليوم... فوائدها تخفف المغص بعد الولاده وتدر الحليب ) وتقدرين تاخذينها بوقت الدوره
9/ لو كنت والده طبيعي لاتجلسين عادي حاولي تميلين عشان الغرز و اذا قيصيري اهتمي بالجرح كويس
10/ اذا انتي باخر شهر جهزي لك شوربات انواع وفرزنيها بالثلاجه (شوربة شوفان بلحم .. شوربة عدس..شوربة خضار..مرقة دجاج) واي انواع انتي تحبينها لكن اللحم والدجاج جدا مفيدين وقت نفاسك ويصير وقتها خلي زوجك يساعدك ويحميها ويعطيك اياها مع سلطات
11/ رضعي بعد الولاده ع طول ضروري ترضعين مفيد لك وللبيبي .. بعد كل رضعه امسحي بقطنه مبلله وبعدها دهني بزيت زيتون واذا حسيتي بدا يألمك سوي كمادات مويه دافيه مرره بالمنشقه واعصريها وحطيها ع صدرك .. تفرجي ع مقاطع وشوفي كيف وضعية الرضاعه واصلا بعد الولاده بتجيك ممرضه خاصه بالرضاعه تعلمك واذا ماجاتك انتي اطلبي وفي مقاطع لوحده اسمها رولا قطامي استفدت منها .. وفي كثير اكلات تدر الحليب : الحلبه .. حلاوه طحينيه .. العدس .. الحليب وخذي حليب خالي من اللاكتوز عشان الغازات .. الورقياااات .. مرق اللحم والدجاج .. اليانسون .. الشمر .. القشر طبعا مفيد كمان وتقدرين تضيفين معاه بعد ماتغسلينه تمر كذا حبه وملعقه من الخلطه واشربي فيه طول اليوم عادي .. وطبعا الاهم المووووويه اشتري كراتين موية نوفا وووزعيها بكب بيتك واشربي كثيرررر 
12/ بالاول وبالاخير والاهم هو توكلي على الله وادعي واستغفري كثير .. الولاده تجربة تختلف من وحده للثانيه حاولي ماتتوترين كثير وادعي بكل الطلق لك ولزوجك وولدك واهلك ومن يعز عليك .. انا الشي اللي ندمت عليه ما اخذت ولدي وضميته اول ماطلع من بطني :(


طولت عليك 😂 
ربي يسهل لك و يكتب اجرك حبيبتي 
واي سؤال انا حاضره

ماشاء الله عليك كفيتي ووفيتي