بسم الله الرحمن الرحيم
كيفكم يا اخواتي وشو اخباركم :)
اليوم حابة اكتب تجربتي في انزال وزني
طبعا الواحد لما يكون وزنو زايد ويبدأ يفكر يعمل رجيم ويدخل النت ويدور ويشوف اسرع رجيم واكثر رجيم ينزل وزن وهذا شي خطأ لانو ما فكرنا بأساس المشكلة وشو الي وصلنا لهاد الوزن وهاد الشكل
اول شي انا طولي 156 كنت وانا صغيرة يعني عمري اقل من 10 سنوات كنت نحيفة وبعديها بديت اسمن شوي شوي يعني اتذكر كان وزني في اول متوسط 53 وصار كل سنة يزيد كيلو او اثنين حتى صرت بالثانوية العامة وكان وزني 63
بعدها بسنة تزوجت وكان وزني 65 يعني انا مليانة من صغري
ولحد الان كنت اشوف نفسي مو سمينة ولا فكرت اعمل رجيم وكان اكلي متوسط مو كتير وماكنت اكل شوكولاته كتير بس بموت بالبيتزا والمعجنات وما كنت اتحرك كتير يعني النشاطات اليومية ومافي مشي والمشاوير كلها بالسيارة
بس متى صارت النقطة الفاصلة بحياتي بعد ولادتي ابني الثاني اتذكر بعد ما خلصت الاربعين بيوم وقفت على الميزان وهنا كانت المفاجأة كان وزني 75
يومها كان الوقت المغرب وكان يوم سبت وبديت الرجيم من وقتها طبعا كنت ارضع ابني والحمدلله خلال شهر ونص كنت نازلة عشرة كيلو ورجع وزني زي قبل الحمل 65 بعدها جات الاجازة وسافرنا على بلدنا وكانت الاجازة في رمضان والعيد وبتعرفو طبعا هاي الفترة كلها عزايم وحلويات وطلعات المهم لما رجعنا الحمدلله ما كنت زايدة الا كيلو طبعا لانو كنت ارضع واتحرك هناك كتير وشغل بالبيت
بعدين بديت رجيم مرة تانية كنت اعمل رجيم شهر وارتاح شهر او اسبوعين وارجع اكمل حتى وصل وزني ل 54 والحمدلله نزلت ال 12 كيلو خلال اربع شهور وماكانت متواصلة طبعا حافظت على وزني حتى نزلنا اجازة وكانت مفاجأة لجميع انو نحفانة وكان عندنا مناسبات بالاجازة وكنت واثقة من حالي ومبسوطة لانو الملابس طالعة على بتجنن وبلبس الي نفسي فيه خصوصا بنطلون الجينز لانو كانت سمنتي بالجزء السفلي
طبعا زاد وزني بالاجازة مع انو كنت اخبص بالاكل والحلو كتير بس كنت اتحرك كتير وعندي ولدين ودايما مطاردة وراهم
زاد وزني 3 كيلو ولما رجعنا رجعنا على مدينة جديدة غير الي كنا فيها كانت مدينة جديدة علي و جوها مو متعودة عليه رطوبة وحر صار عندي كئابة وزاد وزني كمان 2 كيلو طبعا بعديها صحيت على حالي ورجعت لنظامي القديم وخلال شهرين نزلت وزني وهلأ وزني 52 وقفت الحمدلله صار لي 3 شهور محافظة على وزني ونفسي انزل واوصل ال 50
طبعا اانا عارفة كلام كتير وتفاصيل بس انا كتبت بالتفصيل عشان تعرفو النقاط التالية :
1- انو وزني نزل بشكل بطئ او بشكل طبيعي عشان هيك ماكنت ازيد بسرعة بس اوقف رجيم
2- انا ما كنت اوقف الرجيم على طول يعني ازيد في اكلي شوي شوي مو مرة وحدة اكل ضعف الاكل الي كنت اكلو بالريجيم طبعا اكيد رح ازيد
3-مو مستحيل تنزلي وزنك حتى لو كنتي طول عمرك مليانة او سمينة
اكيد رح تسألو شو الرجيم الي مشيتي عليه
مشيت على التخفيف وبعدين السعرات فقط فقط
مع رياضة بس مو دايما لاني ام وعندي ولدين واحد بالروضة والتاني سنتين وماعندي شغالة يعني يادوب الحق على الشغل الي علي
اخر شي انا صار تقريبا ثلاث شهور موقفة رجيم ومحافظة على وزني و الحمدلله
تلخيص تجربتي بالرجيم ::
1- الاستعانة بالله والدعاء انو الله يقدرك على الرجيم وتوصلي الوزن الي بدك ياه وينحفك على خير
2- الارادة والعزيمة والصبر نعم الصبر الموضوع بدو صبر لانو مع الرجيم حتى الاشياء الي ما بتحبيها بتصير ما ازكاها والاكل مارح يطير ولا يخلص بس جسمك الي بويد وبتراكم فيه الدهون
3 - شرب الماء كنت اشرب 3 الى 4 لتر باليوم واليوم الي اشرب فيه 2 لتر اعتبر نفسي شربت شوي
4 - كنت اتبع رجيم السعرات السبت والاحد 900 والاثنين والثلاثاء 1100 ولاربعاء و الخميس 700 والجمعة 2000 وكنت اعتبره يوم مفتوح اكل الي نفسي فيه بس بمقدار واكافئ نفسي فيه يعني اعمل طبخة انا بحبها اول حلا معين نفسي فيه وهكذا
رح اكتب لكم نظام اكلي بشكل عام
الفطور
2 كأس ماء
2 بيضة مسلوقة +خيارة
او 1 توست + بيضة مسلوقة +خيارة
او 1 توست + جبنة شرائخ خالي الدسم +خيارة
او صحن كورن فلكس رشاقة + نص كوب حليب خالي الدسم + سكر دايت
سناك
2 كأس ماء
نص كأس عصير قريب فورت او برتقال من غير سكر
او حبة فاكة
او حبة جزر
الغدا
2كأس ماء
نص صدر دجاج + يعني على حسب شو طابخة ازا طابخة طبخة رز يعني مقلوبة كبسة برياني احط لي كأس رز + سلطة وعلبة زبادي خالي الدسم
واازا كنت طابخة يخنة يعني ملوخية بامية مع لحمة احط لي زبدية رز وزبدية خضار وقطعة لحم
شاي اخضر
والعشا سلطة او زبادي
اتمتى تكونو استفدتو من تجربتي واي سؤال انا جاهزة
رح انزل موضوع جديد كمان فترة واكتب فيه كيف حافظت على وزني ونظامي باليوم من غير حرمان ولا زيادة ووزن
اخر شي قولو ماشاء الله وفي امان الله وحفظه
والسلام عليكم ورحمة الله وبركاته
براااافووووووو