الطعمية

المكونات : نص كيلو فول مقشور ومنقوع طول الليل -بصلة -راس توم صغيرة او نص راس كبيرة -شبت وبقدونس -ملح -ملعقة شمر جاف وممكن الاستغناء عنه -نص رغيف خبز عربي منقوع ومصفي ميته

اخلط المكونات وافرمهم في المفرمه او الكبة او الفود بروسيسور المهم انها تتفرم ناعم وابدا اخد كمية صغيرة في ايدي اشكلها او في قالب الطعمية المخصوص بس ما ابطط كتير علشان مايخرجش الهوا وتفضل منفوشة وممكن ارش علي ناحية سمسم
واحط في الزيت الساخن



بعد لما اشكل واحط في الزيت اوطي النار لفترة صغيرة علشان تستوي من جوة ولما تاخد لون اقلبها علي لناحية التانية ولما انوي اطلعها اعلي النار علشان لو نشلتها والنار واطية حتشرب زيت


وبالهنا وشفا
ملحوظة : لو فائض من عجينة الطعمية ممكن اشيلها في الفريزر ولما احتاجها اطلعها تفك واضربها بمضرب البيض علشان تنفش لان دخولها الفريزر افقدها الهوا
وممكن نحطها في بولة واكسر عليها بيض واقليها علي هيئة اقراص كبيرة بمساحة الطاسة كانها اومليت في كمية زيت قليلة وعلي نار هادية
http

بسم الرحمن الرحمن الرحيم

الملوخية :

نص كيلو ملوخية مغسولة ومتصفية ومخروطة - ملعقة ونص كبيرة ثوم مفروم - ملعقة كسبرة ناشفة -حوالي 2كوب مرقة
اخرط الملوخية ناعم


ولو مش عندنا المخرطة او الروله ماجيك اعملها في الفود برسيسور بس احط عليها كمية بسيطة من المرقة علشان تساعدها علي الفرم

اسخن نص كمية المرقة واحط فيها نص ملعقة من الثوم واسيبها تغلي بيها علشان مايبقاش لاذع وبعد لما اطفي النار اضيف باقي المرقة علشان ابردها واحط الملوخية المفرومةواقلبها بشوكة لحد لما مالقاش كلاكيع

انقلها علي النار لحد لما تغلي واطفي النار وحذاري تفور زي الحليب لانها لو فارت بتسقط يعني بتنفصل عن المرقة وتسقط لتحت

اعمل التقلية احمر باقي الثوم في ملعقة سمن مع الكسبرة واطشه فوق الحلة (عادة غريبة في مصر كانت زمان اول لما يحطوا التقلية علي الملوخية يشهقوا شهقة عالية ههههه بيقولوا الطعم بيبقي احلي )


وممكن نقطع قطع دجاج صغيرة فيها وده اختياري بس بيحبوها الاطفال

وبالف هنا وشفا (وماتنسوش الشهقة هههه)

الفول بالطماطم


ده طبق بسيط للافطار او العشا بس الطعم جميل جدا
فول مدمس - ملعقة كبيرة ثوم مفروم -فلفل حامي او رومي حسب الذوق -2 حبة طماطم مقطعة -ملعقة كبيرة سمن
احمر الثوم في السمن واول لما يحمر اضيف الفلفل

اول لما الفلفل يذبل اضيف الطماطم

واغطي الطاسة لحد لما الطماطم تذبل ودي مش بتاخد وقت يعني مش امشي من قدامها

اضيف الفول واقلب واذود مية قليلة تطريه واضيف الملح حسب الذوق

وهنا بعد لما غرفناه

وبالف هنا وشفا طبق لذيذ ولما تجربوه حيبقي ادمان

تعالوا نحلي بصنف مصري قديم
سد الحنك
3ملعقة سمن -6ملعقة دقيق-كوب مية -4ملاعق سكر وممكن اكتر وممكن اقل
احمر الدقيق في السمن لحد لما يبقي لونه دهبي او بني فاتح
http

واذوب السكر في المية
واضيفه تدريجي واحنا موطيين النار واستمر في التقليب لحد لما احصل علي عجينة طرية زي الصورة ولو ذوقتيه ولاقيتيه محتاج سكر احط السكر الذيادة في شوية ميه واقلبهم واضيفهم اثناء ماهو علي النار لحد لما يتشرب الميه يعني يعتبر الصنف بدون مقادير لان السكر والسماكة حسب الذوق
https://d2s63a22uzwg40.cloudfront.net/hw-uploadcenter/up/sites/up.hawaaworld.com/files/links/2e286210aff7e3b03c79209d8621b87b.jpeg


ويقدم في اطباق صغيرة انا هنا قدمته بملعقة ايس كريم واحيانا يزين بالمكسرات والزبيب بس انا مابحطش علشان ماتضيع نكهته

وبالف صحة وعافية

بسم الله الرحمن الرحيم والصلاة والسلام علي اشرف الخلق سيدنا محمد
صينية البطاطس :

نقشر البطاطس ونقطعها ترنشات طخانة حوالي سم - طماطم معصورة -بصلة كبيرة مقطعة ترنشات -ملعقة ثوم مفروم وممكن الاستغناء عنه بس يفضل استعماله

نحط البصل في الصينية ومعاها الملح والفلفل الاسود وندعكهم باليد ثم نضيف الثوم




اسلق اللحمة
اضيف البطاطس والطماطم علي البصل واضيف لهم المرقة اواحط الصينية علي النار واغطيها ولسيبها لحد لما تستوي تلات ارباع سوا



بعد لما استوت تلات ارباع السوا زي لما قلنا ابدا ارص علي وشها اللحمة المسلوقة سوا كامل واجيب بالملعقة من الصلصة اللي مع البطاطس وارش علي اللحمة علشان تبقي كلها طعم واحد شاربة صلصة واعمل حسابي بذيادة المرقة علشان ماتنشف في الفرن وادخلها الفرن لحين اكتمال السوا للبطاطس واحمرار الوجه (ملحوظه : لو المرقة مش دسمة احط علي وش الصينية ملعقة سمن اما لو اللحم سمينة وفيها دهون استغني عن ملعقة السمن )
هنا لما رصينا اللحم وقبل دخولها الفرن

وهنا بعد خروجها من الفرن شوفي شكلها حلو ازاي ومش حقول علي الريحة

توؤكل مع الخبز او الرز وفي مصر عادة الرز ابو شعرية وده ان شاء الله اللي حنعمله دلوقتي علشان تبقي وجبة كاملة

وبالهنا والشفا