ياجماعة فيه غلطة في الكتابة اعتذر فيه 2ملعقةكبيرة سكر انا لاقيت مكتوب بدالها زيت

بسم الله الرحمن الرحيم والصلاة والسلام علي اشرف الخلق سيدنا محمد عليه الصلاة والسلام
صباح الخير يابنات

القلقاس:
اهم حاجة في القلقاس تحضير السلق ودي مرة في السنة بنعمل كمية ونشيلها في علبة وتتخزن في التلاجة
نقطف السلق ونغسله كويس ومعاه كمية من الكسبرة الخضراومقطعة وشبت

نحط الخليط ده مع شوية مية علي النار لحد لما يدبل واصفيه

اجيب طاسة وانقل فيها السلق ومعاه سمن بكمية مش قليلة واقلب علي النار لحد لما تنشف ميته واوطي النار قوي علشان مايتحرقش واسيبه يتحمص ودي بتاخد حوالي 5 ساعات او اكتر وكل حوالي نص ساعة اقلبه
اسيبه لحد لما الاقيه اتحمص وادوس بالملعقة عليه مايبقاش طري



اجيب طسة تانية واحط فيها توم مقطع او سليم في كمية من السمن علي نار هادية لحد لما يتحمص ثم يضاف للسلق (كانو زمان لما يقرب السلق يستوي يضيفوا عليه التوم بس احيانا حاجة تستوي قبل حاجة علشان كدة بنسويه لوحده )
اقلبهم مع بعض واطفي النار واستني يهدي بس يكون لسه ساخن واضربه في الكبة لحد لما يبقي معجون ناعم احطه في علبة واشيلها في التلاجة ممكن تفضل سنة وتكون صالحة علشان كدة بيتعمل مرة في السنه ودايما تلاقي كل ست مصريه في تلاجتها علبة سلق



كدة خلاص بقي عندنا سلق اي وقت اعمل قلقاس بيكون جاهز عندي السلق
نيجي للقلقاس نقشره نقطعه مكعبات وننقعه من بالليل للصبح ونغسله اكتر من مرة لحد لما تروح المادة اللزجه

نسلق اللحم وننشلها في طبق وناخد القلقاس نسلقه في المرقة ونضيف عليه عصير نص ليمونة

بعد لما يتسلق القلقاس ارجع اللحم واجيب علبة السلق واقطع قطعة حوالي ملعقة لانه بينشف بعد دخوله التلاجة واضيف القطعه للقلقاس واغلي واطفي النار


يؤكل بالخبز او مع الرز بالشعرية

وبالف هنا وشفا وممكن يتعمل بمرقة دجاج

الحواوشي بالعجين ( الحواوشي الاسكندراني )
العجينة:3كوب دقيق -ملعقة سكر-ملعقة خميرة-نص فنجان قهوة او اكتر شوية زيت -ملعقة صغيرة ملح -ما ء للعجن
نعجن لحد لما نحصل علي عجينة طرية ومتماسكة ونسيبها تستريح وبعد كدة نقسمها كرات حجم اليوسفي

حنجيب حوالي نص كيلو لحم مفروم ونحط عليها ملح وفلفل وشوية جبنة موتزاريللا ودي اختياري ممكن الاستغناء عنها ونبشر بصله وندبلها علي النار في شوية زيتولما تبرد نضيفها للحم ونقلبهم ( وفي اسكندرية بيحطوا معاها طماطم مقطعة وفلفل اخضر )

نفرد كل كرة عجين علي سطح مرشوش دقيق خفيف
نفرش اللحم علي نص الدايرة وندهن الاحرف بالبيض ونقفلها كويس

ننقل الوحدات في صينية مرشوشة دقيق خفيف ونناخد باقي البيضة ندهن الوش ونشكه بالشوكة علشان البخار يخرج ومايفتحهاش

ونسيبها ساعة تخمر ونسخن الفرن علي نار عالية الاول وندخلها الفرن لحد لما تاخد لون واول لما تخرج من الفرن ارش عليها جبنة رومي مبشورة وممكن الاستغناء عنها بس بتعطي طعم حلو
http
وبالف صحة وعافية
https://d2s63a22uzwg40.cloudfront.net/hw-uploadcenter/up/sites/up.hawaaworld.com/files/links/635c23e4dc1482da58d00be30cf4c613.jpeg
وهنا من جوة بعد تقطيعها

بسم الله الرحمن الرحيم
اللهم اني اصبحت اشهدك واشهد حملة عرشك وملائكتك وجميع خلقك انك انت الله لا اله الا انت وحدك لا شريك لك وان محمد عبدك ورسولك
صباح الفل عليكم يااحلي بنات وسيدات

كفتة الرز :
نص كيلو لحم مفروم -بصلة متوسطه-فصوص ثوم -حزمة شبت وحزمة بقدونس -كوب كبير رز (وعادة السيدة المصرية بتحضر المكونات وتروح بيها محلات مخصوصة للفرم ) انا عرفت ان بلاد كتير ماعندهاش محلات للفرم وطالما حنعملها في البيت حنعوض بدل الرز كوب دقيق رز ودي طريقة اسهل


نقلب الكمية مع بعض بعد وضع الملح ونفرم الخليط كله في المفرمة او الفود بروسيسور فرم ناعم زي الصورة
بعد الفرم اجيب طبق صغير فيه شويه زيت صغيرين وادهن منه ايدي علشان العجينة ماتلزقش في ايدي وابدا اشكل اصابع

بعد لما اخلص الكمية اقليها في زيت لحد لما تحمر ودي اهم مرحلة للاطفال في كل بيت الام تقلي وهم يلقطوها وهي محمرة
نعمل الدمعة بقي :
احمر ملعقة ثوم مفروم مع ملعقة كمون في ملعقة سمن

بعد لما يحمر اضيف عصير طماطم حوالي نص كيلو لحد لما تتصلص ولو لونها فاتح اضيف ملعقة صلصلة

اول لما الطماطم تطخن اضيف لها شوية ميه والكفتة ولما تغلي اوطي لحد لما تستوي واظبط الملح
نراعي ان المية بتنشف بسبب الرز بيشربها فنذودها شوية واعرف انها استوت ادوس عليها بحرف الملعقة ولو بتنقطع بسهولة اعرف انها استوت
تؤكل مع الخبز او الرز زي اغلب الاكلات المصرية
وده الشكل النهائي


وبالف صحة وعافية طبق يستحق التجربة بيحبوه كبار وصغار

الضلمة او محشي الفلفل
احضر خلطة المحشي بطريقتنا العادية بس كمية قليلة واعوض باللحمة المفرومة المستوية واذود يعني نسبة اللحمة تكون كبيرة شوية وانضف الفلفل واحضر طاجن بحجم كمية المحشي

احشي الفلفل وارصه في الطاجن واسقيه بكمية من المرقة ارتفاعها حوالي تلت ارتفاع الفلفل واغطيه بوق الفويل وادخله الفرن علي نار متوسطه وبياخد حوالي نص ساعة او لحد لما يستوي



وهنا بعد خروجه من الفرن


وبالف هنا وشفا
ان شاء الله لو لسة الدورة مستمرة نعمل كحك العيد وطبق السبانخ
سلام عليكم