بسم الله الرحمن الرحيم
والصلاة والسلام علي اشرف الخلق سيدنا محمد وعلي اله واصحابه اجمعين

مساء الفل والياسمين عليكم
خبز التورتيا

المقادير : 3كوب دقيق -ملعقة كبيرة ممسوحةسكر -ملعقة صغيرة خميرة-ملعقة صغيرة ملح -2ملعقةزيت - 2ملعقة زبادي او فنجان صغير رايب -ماء للعجن

نعجن المقادير مع بعض بالمية لحد لما احصل علي عجينة طرية ومش بتلزق واسيبها تستريح نص ساعة

اقسمها كرات صغيرة في حجم الليمون الكبير واكورها واسيبها علي سطح مرشوش دقيق نص ساعة تاني

افردهم ارغفة صغيرة واسيبها تستريح وبعدين اعيد فردها بشكل رقيق 2مللي


اسخن جريل مسطح او طاسة كبيرة وادهنا زيت خفيف واسخنها عالي وانقل كل واحدة بالترتيب الارغفة
احط الرغيف علي الجريل ولما ياخد لون خفيف اقلبها علي الناحية التانية وماسيبهوش لانه مش بياخد نار

ويبقي بالشكل دة

اغلف اول باول علشان بينشف بسرعة
ممكن اعمل كمية وافرزنها واطلعها للسندويتشات
الفاهيتا-البروستيد -الشاورما ... حسب الاحتياج بالف هنا وشفا

شوفوا طري ازاي
خدوا السندويتش ده هدية علشان نعمله مع الخبز ده
سندويتش البروستيد
حنتبل صدور دجاج مقطعة زي البفتيك بس شرايح رفيعة
نتبل بالتوم المفروم وملح وفلفل وكركم وبابريكا وورقة لوري ونقلي بالبيض والبقسماط بس نحط مع البقسماط المطحون كمية تساويها كورن فليكس مطحون ونقليه واسيبكم للصور




ممكن يؤكل علي حاله كدة وممكن للسندويتش

ونحضرمعاه شرايح جبنة وطماطم وخس ومايونيز

ندهن الرغيف بالمايونيز

نرص عليه الفيليه والطماطم والخس ونقطع الجبنة نوزعها بالطول ونبرم


ونحطه في السندويتش ميكر

وبالنسبة للي ماعندهاش الجهاز حنسخن طاسة وندهنها سمن خفيف جدا ونحط السندوتش وعليه طبق تقيل ونقلبه يتحمص علي الناحية التانية وبالف هنا وشفا نفس سندويتش كنتاكي

ان شاء الله المرة الجاية نحضر تفاح علشان حنعمل تارت التفاح
نتقابل علي خير باذن الله ...سلام عليكم

بسم الله الرحمن الرحيم
والصلاة والسلام عليك يارسول الله
صباح الخير علي احلي بنات
تارت التفاح

المقادير : نص كوب سكر -بيضة -2كوب دقيق -تلات ارباع كوب زبدة او سمن-فانيليا-3حبات تفاح-باتستري كريم او كستر معمول

نضرب السمن مع السكر ثم نضيف البيضة والفانيليا ونضرب ولما يندمجوا اضيف الدقيق ويقلب باليد لحين الحصول علي عجينة متماسكة وده مش بياخد وقت كتير للتقليب
اسيبها ترتاح في التلاجة 10 دقايق



بعد لما ترتاح افرها واحطها في قالب له قاعدة متحركة (ضروري) وافردها كويس في القاعدة والاجناب وانغز فيها بالشوكةفي كل مكان واغطيها بالفويل وادخلها علي فرن متسخن من قبل علي حرارة متوسطة وبعد ربع ساهة اشيل الفويل واسيبها تكمل السوا لحين الحصول علي اللون الدهبي


بعد خروجها من الفرن اسيبها تبرد حوالي 10 دقايق واصب فيها الكستر او كريمة الباتستري وارص التفاح المقشر ومقطع ممكن تسلقيه نص سلق وممكن مش يتسلق انا هنا ماسلقتوش بس سيبت واحدة بقشرها كناحية جمالية واسيبكم للصور توضح

ارش عليها سكر بودرة وملعقة كبيرة قرفة وادخلها الفرن مرة تانية علي حرارة اعلي شوية من اللي استوت فيها واسيبها ربع ساعة او اكتر حسب الفرن بس مش اسيبها علشان ماتتحرقش لحد لما الاقي التفاح بدا يذبل

لعمل الكستر :
2كوب حليب-بيضة -فانيليا -2ملعقة كبيرة دقيق-2ملعقة كبيرة نشا-3ملاعق سكر او اكتر حسب الرغبة
احط الحليب مع السكر علي النار واجيب بولة احط فيها باقي المقادير واضربهم بمضرب يدوي

وبمجرد مايسخن الحليب اوطي عليه واخد جزء صغير احطه علي الخليط اللي في البولة واقلبه واخد الخليط اضيفه الي باقي الحليب اللي علي النار واقلب لحين الحصول علي كستر له قوام غليظ

هنا بعد لما اخدنا جزء الحليب الساخن وحطيناه علي البيض


احشي بيه اي صنف حلويات :كنافة -اكلير -وتارت التفاح
وهنا بعد خروج الصينية من الفرن استني تبرد وانقلها في طبق التقديم

وعادة تقدم مع الايس كريم

وبالف صحة وعافية

الكب كيك

المقادير:
2بيضة-فانيليا-تلات ارباع كوب سكر-تلت كوب سمن يعني اكتر من الربع واقل من النص -2كوب دقيق-ملعقة كبيرة ممسوحة بكنج بودر -ربع كوب حليب-حبيبات شيكولاتة (أختياري)
اضرب الزبدة مع السكر لحد لما تبقي كريمي القوام ثم اضيف البيض والفانيليا ولما يندمجوا اضيف الحليب تدريجي مع الضرب



اضيف الدقيق المنخول والبكنج بودر واقلب لحد لما يندمجوا

احضر القوالب الخاصة بالكب كيك وورق الكوريشة واحطها فيها واسخن الفرن علي حرارة 180

وابدا اصب الخليط فيها جزء من الخليط ثم ارش حبيبات الشيكولاتة واكمل ملا القالب بخليط الكيك لحد تلات ارباعه فقط