من الدايركت 😐

مره رحت لابوي اطلب منه فلوس للعيد قلت له يبا ابي فلوس للعيد قالي العيد هو العافيه قلت له لا شكرا مابي العافيه ابي فلوس قالي طيب روحي افتحي المكيف وتعالي اعطيك ما امداني افتح المكيف الا ويطير شي منه ويدخل بعيني بلمح البصر حاولنا نطلعه بشتى الطرق وماقدرنا..والله لا يوريكم الالم اللي حسيت فيه..جلست اصارخ وادور على نفسي ..وانتفخت عيني وصارت حمراء ورحت للدكتور قالي لو متاخره شوي انعميتي لان القرنيه مدري الشبكيه ملتهبه وغطى عيني وماحضرت العيد بسببها..بعدها أيقنت ان العيد فعلا هو العافيه وان مافي شي يساويها والاهم من هذا كله ان البلاء موكل بالمنطق
#استغفر الله العظيم
استغفر الله العظيم

من الدايركت
في فتره من فترات حياتي مريت بأيام سوداء كالحه كنت مهمومه وما احد بيده يساعدني الا الله وهو وحده يعلم بحجم معاناتي وكنت لما افكر بهمي اشعر ان الابواب كلها مقفله بوجهي ومابيدي حيله ولا حول ولا قوة .
في يوم من الايام كنت صاحيه الصباح وانا بعز ضيقتي فتحت الملاحظات وكتبت رساله لربي شكيت لربي الحال و دعيته وطلبت منه العون وتفريج همي وطلبت منه يغفر لي ويرحمني
الرساله للحين محتفظه فيها من ٢٠١٢
حسيت بارتياح بعد كتابتي للرساله و دعائي لربي وطفيت جوالي ونمت.
مادريت ان رسالتي ومناجاتي لربي بتقرع ابواب السماء و بتكون الاجابه سريييعه من ربي
والله الذي لا اله الا هو ان جتني البشارة بنفس اليوم العصر ان الموضوع اللي متعسر تيسر ووقت تيسير الموضوع كان الصباح في وقت دعوتي لكن ماوصلني الخبر الا العصر و انفرج همي بدون حول مني ولا قوة من الله وحده سبحانه كانت اسرع دعوة تحققت لي الحمدلله الذي بنعمته تتم الصالحات،
كنت كاتبه في الرسالة اللي ناجيت فيها ربي وما صباحي هذا عليك يا ودود بعزيز
والله اني اصبحت بفضل الله اليوم اللي بعده و بالي خالي من همي وحالي متبدل و لله الحمد .
سأل جماعة النبي صلى الله عليه وسلم أقريب ربنا فنناجيه أم بعيد فنناديه؟ فنزل: { وَإِذَا سَأَلَكَ عِبَادِي عَنّي فَإِنّي قَرِيبٌ } منهم بعلمي فأخبرهم بذلك { أُجِيبُ دَعْوَةَ ٱلدَّاعِ إِذَا دَعَانِ } بإنالته ما سأل { فَلْيَسْتَجِيبُواْ لِى } دعائي بالطاعة { وَلْيُؤْمِنُواْ } يداوموا على الإيمان { بِى لَعَلَّهُمْ يَرْشُدُونَ } يهتدون.
لكل مهموم ولكل من يحس انه مكسور ومابيده حيله ربك قريب تكلم معه واشكي له همك بالطريقه اللي تريحك ارحم الراحمين بيرحمك اكثر من رحمتك لنفسك، العزيز بيعزك عن كل من خذلك قريب او بعيد اشرح له حالك واللي منغص عليك حياتك و ادعه وتذلل له والله وحده القادر على تبديل حالك من حال الى حال في طرفة عين .

#الحمدلله كما ينبغي لجلال وجهك وعظيم سلطانك

من الدايركت

بقولكم قصتي مرة كنا أنا وربيعاتي متفقات نطلع مع بعض ونحن 6 بنات واللهم لك الحمد ربيعاتي صحبة صالحة خصوصا اللي تسوق فينا هاي نفس طبعي بالضبط تحب الخير وتحب الإهتمام بشكلها كل شي نفس الشي أنا وياها يوم قررنا وحده طلع عندها امتحان والثانية أمها ما رضت والثالثه والرابعة عندهم أشغال واأجلناها طبعا قلت لربيعتي خليني انا وياج نطلع وهم بكيفهم وكنت وايد متضايجه لأننا من زمان مخططين للطلعة لما كنا في الطريق اقترحت عليها اقتراح مرينا الجمعية خذينا 10 عصير بارد و نفس العدد كب كيك ونفسه كرواسون ووزعناهم في أكياس ومشينا طبعا ما كلفنا اكثر عن 35 درهم (ريال) وكلما شفنا عامل ولا من اللي ينظفون الشارع عطيناه ما تتصورون فرحتهههم كيف كانت في عز الحر ولما وصلنا المول شفنا اثنين من اللي عطيناهم وقفوا شغلهم وجلسوا ياكلون والله ما أنكر إنا تأثرنا لدرجة الدموع من جمال الموقف ربي ما كتب لنا نطلع الشلة عشان نسوي شي يفيدنا في دنيانا وآخرتنا نصيحة لوجه الله نحن ندفه بالمئات والآلاف على مكياج ماركة ولا شنط ما رح تخسرون شي لو دفعتوا اقل عن ميه لإطعام مساكين تشوفون بسمتهم بعيونكم آخر شي أتمنى تدعون لي أنا وربيعاتي الله يوفقنا بالعمل الخيري اللي ناويين نسويه صدقه جاريه لنا بعد موتنا♥
#لا اله الا الله وحده لا شريك له الملك
وله الحمد وهو على كل شي قدير

من الدايركت
كنت اول سنه جامعه وحالتنا الماديه شوي على قد الحال ومكافاتي١٠٠٠ دايم اعطي اخوي الكبير وابقي بس مصروف الشرب والاكل للدوام بحكم انه هو مدبر المنزل من غير شر على ابوي بس ماسك الامور من ايجار وفواتير وانا وبعض من اخواني نساعده بس ما كانت برضاي التام يعني انقهر بعض الاحيان اشتهي اشتري شيء من الجامعه او اباشر على صديقاتي وكذا بس مقدر ..
المهم خلصت السنه الأولى وجاء الصيف واختي تنفست ( ولدت ) عندنا وامي مرررره مشتهيه تغير فرشة المقلط ومكافاتي توها نازله البارح حقت شهر ثمانيه اخره وكانت متاخره وانا ناسيتها لاني ماحتجتها بالصيف مامداني اصرف شيء منها
وقلت دامنا ماراح نسافر بالصيف وشهوله احتاج مكافاه
بعطي امي قيمة الفرشه واللي يبقى لو ١٠٠ اتونس فيها مع خواتي للسهرات وكذا 😙️
وامي تروح للسوق وتاخذ الفرشه وقالت انها غاليه باخذ مكافاتك كلها قلت ابد فداااك كل مكافاتي المهم مارجع من مكافاتي الا ٥٠ ريال تقول خليها ببوكك تحتاجينها
قلت الحمدالله اشتري بها من البقاله بكره العصر والله ياهيون انها بعد اسبوع يعني رمضان ماله ٤ايام و تنزل لي مكافاه ١٠٠٠ ريال قلت زين قدموا المكافات وناسه جتني فلوس مقاضي العيد لي ولاختي
لاني كنت مبتلشه احنا البنات كثار وابوي ميسور الحال
المهم جاء يوم ٢٦ رمضان وتنزل لي مكافاه ثانيه ١٠٠٠ وانا استغرب !! قلت ملخبطين ولا شالسالفه ولا اكراميه
وارسل على صديقاتي ولا وحده جاتها
وانا مستغربه مرررره كيف مكافاتين بشهر ؟؟؟
بعدين سمعت ان المتفوقات لهم مكافاه كل سنه وانا معدلي مو من ضمنهم ٣.٧٥ واللي يعطونهم ٤.٥٠ فما فوق
وانا لو تشوفيني الدنيا مو شايلتني من الفرحه وتذكرت انه عشاني عطيت امي بطيب خاطر وبرضاي
من بعدها صرت اعطي امي من مكافاتي كل شهر وتركت اخوي قلت امي اولى وافضل واهم من كل شيء بالحياة
اذا في قلوبكم ونيتكم تعطون احد فامهاتكم واباءكم اولى من غيرهم
ويفرحون لو مو محتاجين لانهم يحسون بطعمها غير من عيالهم
#سبحان الله عدد خلقه ورضا نفسه وزنه عرشه ومداد كلماته

من الدايركت
انا موب حريصه على الاذكار الله يسامحني ودايم زوجي يقول اقريها واقري ع بنتك وذاك اليوم مدري وش جاني روقان الفجر واصلي واقرا الاذكار بكل طمئنينه واقرا على بنيتي ووصيت زوجي يجيب تميس وعدس خاطري فيه
وراح يصلي وبيروح من عنده وحنا عندنا عمال بالسطح وشقتي جنب السطح وهالعمال مو جايين قبل زوجي المهم وجالسه بالصاله ومنسدحه على الكنب وبنيتي بمشايتها واطقطق بجوالي 😗 واسمع الباب انفتح انا بالكنب منسدحه لو رفعت جسمي شوي شفت الباب وسويت نفسي انا الخقه مابي اتحرك بنتظر زوجي يسلم على بنته الي راحت للباب وشوي يتسكر الباب وترجع بنيتي لي واستغرب ليه ماتكلم زوجي ! شكله بيفاجئني 😬 مخي ذبحته الرومنسيه ... واقوم مالقيت احد واستغرب ثم تذكرت العمال وتطقني ام الركب وادق ع زوجي وينك !!! ليه دخلت وطلعت قال انا ماجيت البيت اصلا والي دخل شكله عامل وحسيته بيعصب قلت الحمدلله قارين اذكارنا وربي حافظنا مدري كيف ربط الله على قلبي والا الموقف جد يخووووف والله عجزت اتخيل الموقف ان الباكستاني داخل علي بس ربي رده مايتقدم خطوتين بس ويشوفني وربي حفظ لي بنيتي والله يمكن لولا الاذكار من غير شر سوابنا شيءءءءءء والا اخذ بنيتي والحمدلله صرت اقفل الباب كل ماراح زوجي لان قبل اقول ماله داعي تقفل وانت بتصلي تهئ تهئ المهم عليكو بالاذكار سبحان الله حافظتنا من كل سوء والا
رحنا خبر كانا
#استغفر الله العظيم
استغفر الله العظيم